1 O Vooz dželo angli e dizjakiri kapija hem beštino, a kad alo okova manuš soi paše rođako kastar o Vooz vaćerđa, o Vooz phenđa lese: "Ava akari, amala, hem beš."

I okova alo hem bešlo.

2 O Vooz tegani lelja dešen oto dizjakere šerutnen, pa phenđa lenđe: "Bešen akate", hem on bešle.

3 Tegani phenđa okole manušese soi paše rođako: "I Nojemina, koja irinđa pe oto Moav, biknela o kotor oti phuv savo pripadinđa amare rođakose e Elimelehese. 4 Adalese odlučinđum te obavestinav tut adalestar hem te predložinav tu te čine le anglo akala kola akate bešena hem anglo šerutne mle narodosere. Te tu mangeja te otkupini le, otkupin le. A te na mangeja, phen maje te džanav. Adalese so, angleder tute nikas nane pravo te otkupini le, a pala tute me injum ko redo."

A okova manuš phenđa: "Me ka otkupinav le."

5 Tegani o Vooz phenđa: "Adava dive kad ka čine i phuv oti Nojemina, čineja hem e Ruta e Moavka, e pokojnikosere udovica, te sačuvine e pokojnikosoro anav olese ki phuv."

6 Ko adava okova paše rođako phenđa: "E onda me našti te činav la, te na umanjinav o nasledstvo mla porodicakoro. Čin la tu, adalese so me našti te činav la." 7 A angleder ano Izrael o otkup hem i zamena oti imovina inele ađahar so jekh oto manuša huljaj pli sandala hem dela okole averese – adava ano Izrael inele dokaz da phandle o dogovor.

8 Ko adava okova paše rođako phenđa e Voozese. "Tu čin la", pa huljavđa pli sandala hem dinđa la e Voozese.

9 Tegani o Vooz phenđa e šerutnenđe hem sa e narodose: "Tumen avdive injen mle svedoci da me oti Nojemina činđum sa so inele e Elimelehesoro, e Kilionesoro hem e Mahlonesoro. 10 Ađahar, lava hem e Ruta e Moavka romnjaće, e Mahlonesere udovica, te sačuvini pe e pokojnikosoro anav olese ki phuv. Ađahar e pokojnikosoro anav naka našalđol maškaro lesere phralja hem ano lesoro than. Tumen injen avdive svedoci adalese."

11 A o šerutne hem sa okola kola inele angli e dizjakiri kapija phende: "Svedoci injam. Nek o GOSPOD ćerel e romnja, koja ka đerdini tuće ano čher, te ovel sar i Rahilja hem i Lija kola bijande bute čhaven e Izraelese, a tu te barvaljove ani Efrata hem te ove cenime ano Vitlejem. 12 Nek to čher, prekalo potomstvo savo ka del tut o GOSPOD oti akaja terni đuvli, ovel sar o čher e Faresesoro, kole i Tamara bijanđa e Judase."

13 Ađahar o Vooz lelja e Ruta hem uli lesiri romni. Suća olaja, a o GOSPOD dinđa la te ačhol khamni, hem oj bijanđa čhave.

14 O đuvlja phende e Nojeminaće: "Hvala e GOSPODESE, kova na ačhavđa tut bizo otkupitelji avdive. Nek lesoro anav ovel slavno ano Izrael. 15 Ov ka del tut nevo dživdipe hem ka arakhi tut ano to phuripe. Adalese so, bijanđa le ti bori, koja volini tut hem kojai tuće po šukar nego efta čhave."

16 I Nojemina lelja e čhavore hem čhivđa le pese ki angali. Oj arakhi ine e čhavore.

17 O komšike dinde le anav, vaćerindoj: "E Nojeminaće bijandilo čhavo." Ađahar dinde le anav Jovid. Ov inele dad e Jesejesoro, e Davidesere dadesoro.

18 A akavai e Faresesoro potomstvo:

E Faresese bijandilo o Esrom,

19 e Esromese bijandilo o Aram,

e Aramese bijandilo o Aminadav,

20 e Aminadavese bijandilo o Naason,

e Naasonese bijandilo o Salmon,

21 e Salmonese bijandilo o Vooz,

e Voozese bijandilo o Jovid,

22 e Jovidese bijandilo o Jesej,

e Jesejese bijandilo o David.