1 एक रात राजा बेलसस्सर एक हजार कुलीन लोगन कै एक बड़ो भोज मैं हटकी, और बे एक संग दाखरस पीं। 2 जब बे दाखरस पीत रहैं, बेलसस्सर बे सोने और चाँदी के गिलास और कटोरी लान को आदेस दई, जे बाके दऊवा नबूकदनेस्सर यरूसलेम के मंदिर से लैगौ। राजा उनकै बुलान भेजी फिर बौ, बाकै सरदार बाके बईंय्यरन और बाकी प्रेमिका बामैं से पी सकैं। 3 तब जे सोने के बर्तन यरूसलेम मैं परमेश्‍वर के भवन के मन्दिर मैं से निकारे गै रहैं, बे लाए गै; और राजा अपने प्रधानन, और बईंय्यरन, और प्रेमिका समेत उन मैं पीन लगे। 4 और सोनो, चाँदी, कठिया और पत्थर के बने देवता की महिमा करीं।

5 अचानक से एक आदमी को हात आओ और महल की पलस्तर बारी दीवार मैं लिखनो सुरू कर दई, जहाँ दिया को उजियारो सबसे तेज चमकत रहै। और राजा बौ हात कै देखी जो लिखत रहै। 6 बाकै देखकै राजा भयभीत ही गौ बाको मोहों उतर गौ और इतनो भयानक हीगौ कि बाके घुंटो कांपन लगे। 7 बौ चिल्लाए कै कोई जादूगरन और ज्योतिसियन कै बुलान के ताहीं कही। जब बे अंदर आए, तौ बेबीलोन को राजा उनसे कही, "जो कोई भी जौ लेख कै पड़ सकथै और मोकै बताए सकथै कि जाको का मतलब है, बाकै राजसाही लत्ता पहनाओ जागो, बाकी गर्दन मैं आदर की सोने की माला पहनाईं जागी, और अब मेरे राज्य मैं बाकै तीसरो सासक बनाए दुंगो।" 8 तभई ग्यानी और सलाहकार लोग अग्गू आए, लेकिन बामैं से कोई भी लेख कै पड़ नाय पाओ या राजा कै जाको मतलब नाय बता पाईं 9 तभई राजा बेलसस्सर और जाधा दुखी ही गौ और बाको मोहों उतर गौ, और बाके बुलाए गै प्रधान भी बड़ा घबराए गै।

10 तभई रानी, राजा और प्रधानन को गुलु सुनी तौ बौ रुटकुरा मैं गई जितै सब भोज मैं बैठे रहैं और बौ कहन लगी, "महामहिम हमेसा जिन्दो रहबै! इतनो परेसान मत होबै और अपनो चैहरा मत उतारौ। 11 तुमरे राज्य मैं एक आदमी है जो मैं पवित्र परमेस्वरन की आत्मा है। जब तुमरे दऊवा राजा रहैं, तौ जौ आदमी के देवतन को दिमाक, और ग्यान दिखाई। और तेरो दऊवा राजा नबूकदनेस्सर बाकै भविस्य बतान बारो, तांत्रिक, जादूगर और ज्योतिसियन मैं मुखिया ठहराईं हैं। 12 बाके झोने अलग छमता है और बौ सपनो की ब्याख्या करन की पहेलियन कै सुरजान और रहस्यन कै समझन मैं बुद्धिमान और कुसल है; तभई बौ दानिय्येल कै, जोको नाओं राजा बेलतसस्सर नाओं रखी है, बुलान भेजी, और बौ तुमकै बताए देगो कि जे सब बातन को का मतलब है।"

13 तभई दानिय्येल कै राजा बेलसस्सर के अग्गू लाओ गौ, और राजा बासे कही, का तू दानिय्येल बहे यहूदी बंधुवा है जोकै मेरो राजा दऊवा तुम्हैं यहूदा देस से इतै लै आई रहै? 14 मैं सुनो हौं कि पवित्र परमेस्वरन की आत्मा तुमरे भीतर वास करथै और तेरे भीतर समझ, ग्यान और बुद्धि है। 15 जौ लिखो भौ कै पढ़नो और मोकै जाको मतलब बतान के ताहीं ग्यानी और जादूगरन कै लाओ गौ, लेकिन बे जाको मतलब नाय खोज पाईं। 16 अब मैं सुनो हौं कि तू लुके भै को मतलब ढूँड़ सकथै और रहस्मय की बात समझाए सकथै। अगर तुम जौ लिखो भौ कै पढ़ सकथौ और मोकै बताए सकथौ कि जाको का मतलब है, तौ तोए राजसाही लत्ता पहनाओ जाएगो, और घेंट मैं आदर की सोने की माला पहनैगो, और राज्य मैं तीसरो सबसे सक्तिसाली आदमी होगो।

17 तभई दानिय्येल जबाब दई, "अपने उपहार अपने झोने रखौ या जे कोई और कै दै देबौ। मैं महामहिम के ताहीं जो लिखो गौ है बाकै पढ़ंगो और तुमकै बतांगो कि जाको का मतलब है।"

18 "परमेस्वर तुमरो दऊवा नबूकदनेस्सर कै एक परमप्रधान राजा बनाई और बौ गौरब और महिमा दई।" 19 बौ इत्तो महान रहै कि सब देसन, जातियन और भासा के लोग बासे डरात और काँपत रहैं। अगर बौ कोई कै मारनो चाहतो तौ बौ मार डारतो; अगर बौ कोई कै रखनो चाहतो तौ बाकै जिन्दो रखतो और जोकै बौ ना चाहतो बाकै घात करतो, और जो चहातो बौ बाको आदर करतो और जो चाहतो बाकै गिराए देतो। 20 लेकिन जब बाको मन घमंडी, जिद्दी और क्रूर ही गौ, तभई बौ बाकै राजगद्दी से हटा दई और बौ अपनो आदर की जघा खोए दई। 21 बौ आदमी समाज से निकार दौ गौ और बाको मन जानवरन के जैसी ही गौ। बौ जंगल के गधन के संग रहत रहै, बरधा के जैसी चारौ खात रहै और खुली हवा मैं सोत रहै, और बाके झोने ओस से बचन के ताहीं कुछ नाय रहै। बाद मैं बे मानी कि परमप्रधान परमेस्वर सब आदमिन के राज्यन कै सम्भालत है और बौ जो चाँहे बाकै दै सकथै।

22 "पर हे बेलसस्सर नबूकदनेस्सर को लौड़ा, तू सब जौ जानत भै भी अपने मन कै नम्र नाय करो।" 23 तुम स्वर्ग के प्रभु के खिलाप काम करे, और बाके मंदिर से कटोरा लै आई। तुमरे रईस, तुमरी बईंय्यरैं और तुमरी रखेलियन बे अंगूर को रस पीत रहैं और सोना, चाँदी, कांसे, लोहो, कठिया और पत्थरा से बने देवतन की पूजा करत रहैं-ऐसे देवता जो देखकै सुन नाय पात रहैं और कुछ नाय जानत रहैं। फिर तुम बौ परमेस्वर को आदर नाय करैं जौ बौ बताथैं कि तुम जिन्दे रहेगे या मरैगे और जो तुम हर काम कै संभालथौ। 24 तभईये जौ हात को एक भाग बहे के घाँईं से प्रकट करो गौ है और बे सब्द लिखे गै हैं।

25 "और जो सब्द लिखे गै हैं बे जे हैं मने, मने, तकेल, ऊपर्सीन 26 और जाको मतलब जौ है: गिनती, परमेस्वर तुमरे राज्य के दिन कै गिन लई है और जाकै खत्म कर दई है; 27 तकेल तौ मानौ तखरी मैं तौलो गौ , तुमकै तखरी मैं तोली और तुम बड़ा हल्के निकरे; 28 तुमरो राज्य बाँट दौ गौ है और मादियन और फरीसियन कै दै दईं है।"

29 फिर बेलसस्सर अपने सेवकन कै आदेस दई कि दानिय्येल कै राजसाही लत्ता पहनाओ जाबै और बाके घेंट मैं सोनो की माला पहनाई जाबै। और बौ राज्य को तीसरो सक्तिसाली सासक होगो। 30 बहे रात कसदियन को राजा बेलसस्सर मार डारो गौ; 31 और दारा मादे, बहे समय बौ बासठ साल को भौ रहै, और बौ हुँआँ को नया सासक बनो।