1 दारा अपनो राज्य पद लेन ताहीं एक सौ बीस राज्यपालन कै चुनी। 2 जाके अलावा, बौ राज्यपालन कै देखन कै और राजा की देखभाल करन के ताहीं दानिय्येल दुई और आदमिन कै चुनी। 3 दानिय्येल जल्दी से दिखाई कि बौ दुसरे राज्यपालन की तुलना मैं अच्छो काम कर सकथै। बौ अच्छो काम रहै, राजा बौ पूरे राज्य कै अधिकारी बनान के ताहीं कही। 4 तौ दुसरे देखन बारे और राज्यपालन दानिय्येल के राज्य कामकाज के तरीका मैं कुछ गलत देखन की कोसिस करी, लेकिन बे ऐसो नाय कर पाईं, दानिय्येल विसवासी रहै और बौ कुछ भी गलत या बेईमान नाय करी रहै। 5 बे एक दुसरे से कहीं, "हमैं दानिय्येल के आरोप लगान के ताहीं कछु नाय मिलो जब तक कि बाके धर्म के बारे मैं कुछ नाय है।"

6 फिर बे राजा से मिलन गै और कहीं, "राजा दारा, महामहिम लम्बी जिंदगी जिए! 7 हम सब जो तुमरे राज्य कै देखन बारो करथै देखन बारो राज्यपाल, और दुसरो अधिकारी जौ बात मैं सहमत रहैं कि महामहिम को आदेस करनो चाहिए और जाकै सख्ती से लागू करनो चाहिए। और आदेस दई की तीस दिन तक कोई भी महामहिम के अलावा कोई भी देवता या कोई आदमी से कुछ भी माँगन को आदेस दई, और जो कोई आदेस कै नाय मानैगो बाकै बकटा से भरे गड्डा मैं फेंक दौ जागो। 8 तौ महामहिम को जौ आदेस दई और जा मैं दस्तखत करन दे, और जौ पता करीं मादियन और फरीसियन को एक कानून, जो बदल नाय सकथै।" 9 और तभई राजा दारा आदेस मैं दस्तखत करी। 10 जब दानिय्येल कै पता चलो कि आदेस मैं दस्तखत ही गै, तौ बौ घर चले गौ। बाके घर के ऊपर मंजिल के कमरा मैं खिड़की रहैं जो यरूसलेम के घाँईं खुलत रहैं जैसिये बौ हमेसा के तराहनी बौ खुली खिड़की के झोने घुंटो टेक कै दिन मैं तीन बार परमेस्वर से प्रार्थना करत रहै कि।

11 तभई दानिय्येल कै बाके दुस्मन अधिकारी परमेस्वर से प्रार्थना मैं कुछ माँगत भै देखीं, 12 फिर का भौ कि बे सब राजा के झोने गै, और बे राजा से बौ नियम के बारे मैं बताथैं जो बौ बनाई रहै। जबाब दई, "हाँ जौ एक सक्त आदेस है, मादियन और फरीसियन को कानून है, जोकै बदल नाय सकथैं।"

13 तब बे राजा से कही, "यहूदा परदेसी मैं से एक दानिय्येल नाओं को आदमी है, महामहिम बौ तेरे बनाए गै दस्तखती आदेस को पालन नाय करथै। बौ परमेस्वर से हमेसा दिन मैं तीन बार प्रार्थना करथै।"

14 तौ राजा जौ सुनी, तौ बौ परेसान हीगौ और बौ दानिय्येल कै बचान को रास्ता ढूँड़न की पूरी कोसिस करी। बौ सूरज डूबन तक कोसिस करत रहौ। 15 तौ दानिय्येल के दुस्मन अधिकारी राजा के झोने आए और बासे कहीं, "महामहिम जानथौ कि राजा और मादियन, फरीसियन के जरिया कानून बनाओ गौ मैं दस्तखत कर दौ जाथै तौ कोई भी बौ आदेस बदलो ना जाए सकथै।"

16 तभई राजा दानिय्येल कै पकड़कै बकटा से भरे गड्डा मैं डारन को आदेस दई। बौ दानिय्येल से कही, "तू जो परमेस्वर की इत्ती ईमानदारी से सेबा करथै, बहे तोकै बचाबै।" 17 तभई अधिकारी बकटा के माँद के मोहों मैं एक बड़ो पत्थर रख दईं, और राजा बामैं अपनी राजसाही मोहर और अपने सरदारन की मोहर लगाए दई, ताकी कोई दानिय्येल के बारे मैं कुछ बदल नाय सकै। 18 तौ राजा महल मैं लौट गौ और बाके झोने सुख-बिलास की कोई भी चीज बाके झोने नाय आई और बाकै नींद भी नाय आई।

19 भोर होथै राजा उठो और जल्दी से बकटा की माँद के घाँईं गौ। 20 जब राजा बकटा की माँद मैं पहुँचो, तौ बौ चिल्लाए कै कही, "दानिय्येल, जिन्दो परमेस्वर को सेवक! जो तू परमेस्वर की इतनी इमानदारी से सेबा करथै, तोकै बकटन से बचान की छमता है?"

21 दानिय्येल जबाब दई, "महामहिम लम्बी जिंदगी जिए! 22 परमेस्वर अपनो दूत भेजकै बकटन के मोहो बंद कर दई, कि बे मोकै नुकसान नाय पहोंचा मैं। बौ एसो तभई करी कि बौ जानत रहै कि मेरी कोई गलती नाय है और मैं तुमरे संग कोई गलत नाय कर रहौं, महाराज।"*

23 राजा बड़ा खुस भौ और बौ दानिय्येल कै गड्डा से बाहर निकारन को आदेस दई। तभई बे बाकै ऊपर खींच लईं और देखीं की बाकै एकौ चोट नाय लगी है, का बौ परमेस्वर मैं भरोसा करथै। 24 तौ राजा बे सब कै पकड़न को आदेस दई जो दानिय्येल ऊपर दोस लगाई रहैं, और उनकी बईंय्यरन और लौड़ा समेत बकटा के माँद मैं डरबाए दई। जासे पहले की बे गड्डा के नीचे पहौंचते, बकटा उनके ऊपर हमला कर दई और उनकी सब हड्डियन समेत उनकै खाए गौ।

25 तौ राजा दारा पृथ्वी के सब जातियन और सब भासा के लोगन कै जौ चिट्ठी लिखी:

"सुभकाना! 26 मैं आदेस देथौं कि मेरे राज्य मैं सब कै दानिय्येल के परमेस्वर को भय मानैं और बाको आदर करैं।"

"बौ जिन्दो परमेस्वर है,

और हमेसा राज्य करै।

बाको राज्य कहुए खत्म नाय होबै,

और बौ हमेसा स्थिर रहेगो।

27 बौ बचाथै और बचात रहगो;

बौ अदभुत काम और चमत्कार करथै

स्वर्ग और धरती मैं।

बौ दानिय्येल कै बकटन से मारे जान से बचाई।"

28 दारा राजा के सासनकाल और फारस के कुस्रू के सासनकाल के दिनन मैं दानिय्येल सुख-चैन से रहो।