1 बेलसस्सर बेबीलोन को राजा होन के पहले साल मैं एक सपनो देखी, और रात को एक दर्सन देखी। मैं सपनो लिख दौ, और जौ बाको वर्ड़न है 2 बौ रात दानिय्येल जो सपनो देखी:

सब घाँईं से ब्यार चल रही है और समुद्र के किनारे से टकराए रही है।* 3 चार बड़े जानवर समुद्र से बाहर आए, सब एक दुसरे से अलग रहैं। 4 पहलो बकटा जैसी दिखथै लेकिन बाके पंखमा उकाब जैसी रहैं। जब मैं देखत रहौं, तौ पंखमा टूट गै। और बाकै पृथ्वी से बौ जानवर कै उठाए कै सीध खड़ो कर दई। और फिर जाकै एक आदमी को दिमाक दई।

5 दुसरो जानवर अपनी पच्छू टाँग मैं खड़ो भलुआ जैसी लगत रहै। बौ अपने दाँतन के बीच तीन पुसरिया पकड़ रखाई रहै, और एक आबाज उनसे कही, "अग्गू बढ़, जितनो हुई पाबै उतनो माँस खा!"

6 जब मैं देखत रहौं, एक और जानवर दिखाई दई। बौ चितौना जैसी दिखात रहै, फिर बाकी पीट मैं पक्छी के पंखमा के जैसी चार पंखमा रहैं, और बाके चार मूड़ रहैं। जाके बारे मैं अधिकारी को आदेस रहै।

7 फिर जाके बाद रात मैं मैं एक सपनो देखो, एक चौथौ जानवर सामने आओ। बौ सक्तिसाली, भयानक, रहै। अपने बड़े लोहो के दाँतन से बाकै मार दई, दुसरे जानवर के जैसी बाके दस सींग रहैं। 8 जब मैं सींगन कै देखत रहौं, मैं देखो की दुसरे सींगन के बीच मैं एक छोटो सो सींग निकारत रहै। बौ उतै पहले से तीन सींगन कै तोड़ दई। जौ सींग मैं आदमी की आँखी और मोहो रहै जो दुसरे जानवरन से अलग दिखात रहै।

9 जब मैं देखत रहौं, तौ जघा- जघा सिंहासन लगे भै रहैं बौ हमेसा लम्बी जिंदगी जीन बारो, एक राज सिंहासन मैं बैठ गौ। बाके लत्ता बरफ के जैसी सेते ही जाथैं और राज्य सिंहासन सबार और पहिया आगी से जलत रहैं,* 10 और बामैं से आगी की लपट निकरत रहै। बे बाकी सेबा के ताहीं हजारौं- हजारौं लोग हाजिर भै और लाखों-लाखों लोग बाके अग्गू खड़े रहैं। अदालत अपनो साल सुरु करी और किताब कै खोलीं।*

11 जब मैं देखत रहौं, मैं भी छोटे आबाज की डींगें हाँकत भई सुन सकथै। जैसी मैं देखो, चौथौ जानवर मरगौ, और बाको सरीर आगी की लपट मैं फेंक दई और खत्म ही गौ। 12 दुसरे जानवरन से बाकी सक्ति छीन लईं, लेकिन बे उनकै सीमित समय तक जिन्दो रहन को आदेस दई।

13 रात मैं मैं सपने मैं देखो और मनुस्य के लौड़ा के हानी कोई मेरे सामने स्वर्ग के बादरन के संग आत भई दिखाई दई। बौ प्राचीन काल के झोने पहोंचो और बाकै बाकी उपस्थिति मैं लै गौ।* 14 बौ अधिकार, सम्मान और साही सक्ति दईं, ताकि सब देसन, जातिन और भासा के लोग बाकी सेबा करैं। बाको अधिकार हमेसा बनो रहेगो, और बाको राज्य कभी खत्म नाय होगो।*

15 दानिय्येल जो दर्सन देखी बासे मैं दुखी हीगौ और मैं बड़ा परेसान हीगौ। 16 मैं उतै खड़े लोगन मैं से एक झोने गौ और बाकै सब समझान कै कही। तौ बौ मोकै मतलब बताई। 17 बे कहीं, "जे चार बड़े जानवर चार राज्य हैं जो पृथ्वी मैं आंगे। 18 और पवित्र परमेस्वर के लोग साही सक्ति प्राप्त करीं और हमेसा-हमेसा के ताहीं राज्य प्राप्त करन के ताहीं अपने झोने रखंगे।"*

19 फिर मैं चार जानवर के बारे मैं जाधा जाननो चाहत रहै, जो कोई भी दुसरे जानवर के तराहनी नाय रहै बौ भयानक जानवर जो अपनो सिकार कै अपने पंजन और लोहो के दाँतन से टुकड़ा-टुकड़ा कर देथै और फिर उनकै पाँओं से रौंद देथै। 20 और मैं बाके मुड़िया मैं दस सींग के बारे मैं, जाननो चाहथौं जो बाके बाद निकरो और बाके तीन सींग कै गिराए दई बाकी आँखी और मोहो रहै और बौ गर्व से सेखी दिखात रहै जे दुसरे सब जाधा भयानक रहैं।*

21 जब मैं देखत रहौं, तौ बौ सींग परमेस्वर के पवित्र लोगन से लड़ाई करीं और उनकै जीत लईं 22 तौ जौ हमेसा लम्बी जिंदगी जिए, बौ आओ, और परमेस्वर के पवित्र लोगन के पक्छ मैं समाधान करी। परमेस्वर के पवित्र लोगन के ताहीं साही सक्ति मिली।*

23 जौ बौ समाधान है जो मोकै दई है "चौथौ जानवर एक चौथौ राज्य है जो धरती मैं होगो और दुसरे सब राज्यन से अलग होगो। बौ पूरी पृथ्वी कै कुचल देगो और रौंद डारैगो। 24 दस सींग दस राजा है जौ बौ राज्य मैं राज करैगो। तौ एक और राजा सामने आगो; बौ पहले राजन से अलग होगो और तीन राजन के ऊपर राज्य करैगो। 25 बौ महासक्तिसाली परमेस्वर के ताहीं बोलो और परमेस्वर के लोगन कै सताए करैगो। बे उनके धार्मिक कानून और त्योहारन कै बदलन की कोसिस करैगो, और परमेस्वर के लोग साढ़े तीन साल तक उनके हातन मैं सौंपैगो।* 26 पर, जब न्याय करन बारे बैठंगे और बाकी प्रभुत्ता छीनकै मिटाई और पूरी तरह से नास करी जागी, हिंयाँ तक कि बाको अंत ही होगो। 27 धरती मैं सब राज्यन की सक्ति और महानता परमेस्वर के पवित्र लोगन कै दई जागी। बाकी साही सक्ति कभी खत्म नाय होगी, और धरती के सब राजा बाकी सेबा करंगे और बाकी आग्या को पालन करंगे।"*

28 बात हिंये खतम ही गई, मैं दानिय्येल अपने बिचारन से बड़ा परेसान रहौं और मेरो मोहों पेरो पड़ गौ रहै, लेकिन मैं बात अपने तक ही रखो।