1 मादी दारा राजा जो छयर्स को लौड़ा रहै, बाकै कसदी जाति के ऊपर पहले साल मैं बेबीलोन राज्य को सासक बनाओ गौ। 2 सासनकाल के पहले साल कै दानिय्येल पवित्र किताबन को अध्ययन करत रहौं और सत्तर साल के बारे मैं सोचत रहौं कि यरूसलेम की जघा खंडर ही जागी, जैसो की प्रभु जो भविस्यवक्ता यिर्मयाह से कही रहै। 3 और मैं उपवास करकै, टाट ओढ़कै, और राख मैं बैठकै प्रभु परमेस्वर से अच्छे मन से प्रार्थना करो, और बासे बिनती करी।

4 मैं अपने प्रभु परमेस्वर से प्रार्थना करो और अपने पापन कै मान लौ।

मैं कहो, "प्रभु परमेस्वर, तू महान है और हम तेरो आदर करथैं तू अपने वाचा मैं ईमानदार है, और तू बे लोगन ऊपर अपनो प्रेम दिखाथै जो तोरे भय मानथैं और तेरी आग्यन को पालन करथैं।"

5 "हम पाप करैं हैं, हम पापी हैं, हम बगावत करैं हैं। तू जो कुछ हमैं करन की आग्या देथै, बाकै हम ठुकराए दै, और जो कुछ तू हमैं ठीक बताओ है, बासे हम भटक गै हैं।" 6 हम तेरे दास भविस्यवक्तन की नाय सुनी, जो तेरे नाओं से हमरे राजन, हाकिमन, पुरखन, हमरी सब जाति से बात करथैं। 7 हे प्रभु, तू धर्मी है, लेकिन आज हम लज्जित हैं, यहूदा के आदमी, और यरूसलेम के निवासी, और सब इस्राएल, का झोने के का दूर के, बे सब देसन मैं जहाँ तू हमकै हमारे विस्वासघात की बजह से तितर-बितर कर दौ है, बे सब लज्जित होंगे। 8 हे प्रभु, हमरे राजा, हमरे सासकन, और हमरे पूर्वजन के विरूद्ध गलत काम करी रहै और पाप करी रहै जौ कारँड़ हमकै लज्जित होन पड़ो। 9 हमरो दयावान और छमा करन बारो है, हम अपने प्रभु परमेस्वर के खिलाप बगावत करे हैं। 10 हे हमरो परमेस्वर यहोवा, जब तू हमसे कहो, कि जौ व्यवस्था तू अपने दास भविस्यवक्तन के जैसी दौ है, बाके जैसी जिन्दगी जीन कै कही, तौ हम अपने परमेस्वर की नाय सुने।* 11 सब इस्राएली तेरी बातन के नियम कै नाय मानी, और तेरी बातन कै सुनन से मना करी। हम तेरे खिलाप पाप करे, और परमेस्वर हमैं बौ स्राप दौ जो तेरो दास मूसा की व्यवस्था मैं लिखो है। 12 तू हमरे ऊपर बड़ी विपत्ती लाएकै हमरे और हमरे अधिकारिन के खिलाप कहो भै वचन पूरो करो हौ। पूरे स्वर्ग के नीचे कभी भी ऐसो कछुवे नाय करो गौ जैसो यरूसलेम के संग करो गौ। 13 हम मूसा की व्यवस्था मैं सब दंड देत रहैं। फिर अभै भी, हे यहोवा, हमरो परमेस्वर, हम अपने पापन से फिरकै, तेरे सत्य मैं चलंगे और तोकै खुस करन की कोसिस नाय करंगे। 14 हे हमरे परमेस्वर यहोवा, तू हमकै दंड देन कै तैयार रहै, और तू बैसो ही करो, काहैकि तू धर्मी के ताहीं हमेसा सई ही करथै, लेकिन हम तेरी नाय सुनथैं।

15 "हे हमरे प्रभु परमेस्वर, तू अपने लोगन कै अपने बलबान हातन से मिस्र से निकार कै अपनो नाओं करो है, और जो आज तक बौ एक यादगार है। लेकिन हम पाप करे हैं; और हम दुस्टता के काम भी करे हैं।" 16 प्रभु हमरे बीते समय मैं हमरी रक्छा करी है, तभई अब तुम यरूसलेम ऊपर से अपनो गुस्सा हटाए ले। जौ तुमरो सहर, तुमरो पवित्र पहाड़ है हमरे पापन और हमरे पूर्वजन जैसी करे गै रहैं बुरे कामन के ताहीं पड़ोसी देसन के सब लोग यरूसलेम और तुमरे लोगन कै खराब समझत रहैं। 17 हे प्रभु, अपने दास की प्रार्थना और विनती कै सुन। अपने मंदिर कै दुबारा से बना जो उजाड़ पड़ो है; ताकी सब कोई जान पामैं कि तहीं प्रभु है। 18 हमरी बात सुनौ, हे प्रभु; हमरे घाँईं देखौ कि हम कोई मुसीबत मैं हैं और बौ सहर की पीड़ा कै देखौ जो मैं तुमरो नाओं है। हम तुमसे प्रार्थना कर रहै हैं काहैकि तुमरी धार्मिकता के कामन मैं नाय बल्किन तुमरी बड़ी दया के कामन मैं भरोसो रख कै करथैं। 19 प्रभु हमरी सुनौ। प्रभु हमकै छमा करौ। प्रभु हमरी बात सुनौ, और काम करौ! जो से सब जान पामैं कि तू परमेस्वर है, तू चिंता मत करै! जौ सहर और जे लोग तुमरे हैं।

20 मैं प्रार्थना करत रहौं, और अपने पापन और अपनी प्रजा इस्राएल के पापन कै माने करत रहौं और अपने परमेस्वर यहोवा से बाके पवित्र पर्वत के ताहीं गिड़गिड़ाएकै विनती करत रहत रहै। 21 जब मैं प्रार्थना करत रहौं, जिब्राएल, जो मैं पहले दर्सन मैं देखो रहौं, उड़कै उतै आए गौ जितै मैं रहौं। जौ संजाखिन कै बलि चढ़ान को समय रहै।* 22 उनकै समझाईं, "दानिय्येल, मैं भविस्यवाँड़ी कै समझन मैं तुमरी मदद करन के ताहीं इतै आओ हौं। 23 जब तुम परमेस्वर से विनती करन लगे, तौ बौ तुमकै जबाब दई। बौ तुमसे जाधा प्यार करथै, और तभई मैं तुमकै जाको जबाब बतान आओ हौं। अब जब मैं दर्सन समझाथौं तौ ध्यान दियो।"

24 "तुमरे लोगन और तुमरे पवित्र नगर कै पाप और बुराई से मुक्त करन के ताहीं परमेस्वर जौ समय ठहराई रहै बौ सात गुना सत्तर साल हैं।" पाप माफ कर दौ जागो ताकी दर्सन और भविस्यवाँड़ी सच ही जाबै, और पवित्र मंदिर फिर से सौंप दौ जागो। 25 जा मैं ध्यान देबौ और जाकै समझौ: जब से यरूसलेम कै बनान को आदेस दौ गौ है तब तक परमेस्वर को चुनो भौ नेता नाय आगो, सात गुना सात साल बीत जांगे। यरूसलेम रास्ता और मजबूत सुरक्छा के संग फिर से बनाओ जागो, और सात गुना बासठ साल तक खड़ो रहागो, लेकिन जौ मुसीबत को समय होगो। 26 और बासठ सप्ताह के बीतन के बाद परमेस्वर को चुनो भौ नेता कै दुसरे लोगन से मर दौ जागो। एक सक्तिसाली राजा की भयानक सेना जैसी सहर और मंदिर कै खत्म कर दौ जागो। बाद मैं बाढ़ के जैसी आगो, जो लड़ाई और विनास लागो जो परमेस्वर तैयार करी है। 27 बौ सासक सात साल तक बहोत लोगन के संग वाचा बाँधैगो, और जब जौ आधो समय बीत जागो, तौ बौ बलिदान और भेंट बन्द कर देगो। घिनौनो दिखान बारो मंदिर के सबसे ऊपर जघा मैं रखो जागो और बौ तब तक उतई रहागो जब तक बाकै उतै रखन बारो कै खत्म नाय ही जातो और जो प्रभु बाके ताहीं तैयार करी है।