1 ଶଲ୍‍ଟୀୟେଲରାଃ ହନ୍‌ ଯେରୁବାବେଲ୍‌ ଓଡ଼ୋଃ ଯେଶୁୟଲଃ ଅକନ୍‌ ଯାଜାକ୍‌ ଓଡ଼ୋଃ ଲେବୀକ ହିଜାକାନ୍‌ ତାଇକେନାକ, ଇନ୍‌କୁଦ ସରାୟ, ଯିରିମିୟ, ଏଜ୍ରା, 2 ଅମରିୟ, ମଲ୍ଲୁକ୍‌, ହଟୁଶ୍‌, 3 ଶିଖନିୟ, ରେହୁମ୍, ମରେମୋତ୍‍, 4 ଇଦ୍ଦୋ, ଗିନ୍ନଥୋୟ, ଅବିୟ, 5 ମିୟାମିନ୍, ମୋୟଦୀୟ, ବିଲ୍‌ଗା, 6 ଶମୟିୟ ଓଡ଼ୋଃ ଯୋୟାରିବ୍, ଯିଦୟୀୟ, 7 ସଲ୍ଲୟ, ଆମୋକ୍‌, ହିଲ୍‌କିୟ, ଯିଦୟୀୟ ନେ ସବେନ୍‌କ ଯେଶୁୟରାଃ ସାମାଏରେ ଯାଜାକ୍‌କଆଃ ଓଡ଼ୋଃ ଆକଆଃ ହାଗାକଆଃ ଥାଲାରେ ମୁଖିଆ ତାଇକେନାକ। 8 ଓଡ଼ୋଃ ଲେବୀକଏତେ ଯେଶୁୟ, ବେନୁୟି, କଦ୍‌ମିୟେଲ୍‌, ଶେରେବିୟ, ଯିହୁଦା ଓଡ଼ୋଃ ମତ୍ତନିୟ, ନେ ସବେନ୍‌କ ଧାନ୍ୟାବାଦ୍‌ ସେୱାରାଃ ମୁଖିଆ ତାଇକେନାକ।

9 ଇନ୍‌କୁଆଃ ହାଗାକିନ୍‌ ବକ୍‍ବୁକୀୟ ଓଡ଼ୋଃ ଉନ୍ନି ଆକଆଃ ଆୟାର୍‌ରେ ହର କାମି ରିକାକେଦାକିନ୍‌।

10 ଯେଶୁୟରାଃ ହନ୍‌ ଯୋୟାକୀମ୍‍, ଯୋୟାକୀମ୍‍ରାଃ ହନ୍‌ ଇଲିୟାଶିବ୍‌ ଓଡ଼ୋଃ ଇଲିୟାଶିବ୍‌ରାଃ ହନ୍‌ ଯୋୟାଦ୍‍, 11 ଯୋୟାଦ୍‍ରାଃ ହନ୍‌ ଯୋନାଥନ୍‌, ଯୋନାଥନ୍‌ରାଃ ହନ୍‌ ଯଦ୍ଦୁୟ।

12 ନେ ଯାଜାକ୍‌କ ଯୋୟାକୀମ୍‍ରାଃ ଦିପିଲିରେ ଯାଜାକ୍‌ କିଲିରେନ୍‌ ମୁଖିଆ ତାଇକେନାକ, ଇନ୍‌କୁ ହବାଅଃତାନାକ, ସରାୟ କିଲିରେନ୍‌ ମରାୟ, ଯିରିମିୟ କିଲିରେନ୍‌ ହନାନିୟ, 13 ଏଜ୍ରା କିଲିରେନ୍‌ ମଶୁଲ୍ଲମ୍‍, ଅମରିୟ କିଲିରେନ୍‌ ଯିହୋହାନନ୍, 14 ମଲ୍ଲୁକି କିଲିରେନ୍‌ ଯୋନାଥନ୍‌, ଶବ୍‌ନିୟ କିଲିରେନ୍‌ ଯୋଷେଫ୍‍, 15 ହାରିମ୍‌ କିଲିରେନ୍‌ ଅଦନ୍‍, ମରାୟୋତ୍‌ କିଲିରେନ୍‌ ହିଲ୍‍କୟ, 16 ଇଦ୍ଦୋ କିଲିରେନ୍‌ ଜିଖରିୟ, ଗିନ୍ନଥୋନ୍‌ କିଲିରେନ୍‌ ମଶୁଲ୍ଲମ୍‍, 17 ଅବିୟ କିଲିରେନ୍‌ ସିଖ୍ରୀ, ମିନ୍ୟାମୀନ୍‌ ଓଡ଼ୋଃ ମୋୟଦିୟ କିଲିରେନ୍‌ ପିଲ୍‍ଟେୟ, 18 ବିଲ୍‌ଗା କିଲିରେନ୍‌ ଶମ୍ମୁୟ, ଶମୟିୟ କିଲିରେନ୍‌ ଯିହୋନାଥନ୍‍, 19 ଯୋୟାରିବ୍ କିଲିରେନ୍‌ ମତ୍ତନୟ, ଯିଦୟିୟ କିଲିରେନ୍‌ ଉଷି, 20 ସଲ୍ଲୟ କିଲିରେନ୍‌ କଲ୍ଲୟ, ଆମୋକ୍‌ କିଲିରେନ୍‌ ଏବର୍‌, 21 ହିଲ୍‌କିୟ କିଲିରେନ୍‌ ହଶ୍‌ବିୟ, ଯିଦୟିୟ କିଲିରେନ୍‌ ନଥନେଲ୍‌।

22 ଇଲିୟାଶିବ୍, ଯୋୟାଦ୍‍, ଯୋହାନନ୍‌ ଓଡ଼ୋଃ ଯଦ୍ଦୁୟରାଃ ଦିପିଲିରେ ଲେବୀ ଓଡ଼ୋଃ ଯାଜାକ୍‌କଆଃ କୁଟୁମ୍‌ରେନ୍‌ ମୁଖିଆକଆଃ ନୁତୁମ୍‌ ଅଲ୍‌ୟାନା। ନେଆଁ ପାରସ୍ୟ ରାଇଜ୍‌ରେନ୍‌ ଦାରିୟାବସ୍‌ରାଃ ଆକ୍‌ତେୟାର୍‌ ଦିପିଲିରେ ଅଲାକାନ୍‌ ତାଇକେନା।

23 ଲେବୀ ହଡ଼କଆଃ କୁଟୁମ୍‌ରେନ୍‌ ମୁଖ୍ୟା ହଡ଼କଆଃ ନୁତୁମ୍‌କ ଇଲିୟାଶିବ୍‌ରାଃ ହନ୍ତେକଡ଼ା ଯୋହାନନ୍‌ଆଃ ଦିପିଲି ଜାକେଦ୍‌ କିଲିକଆଃ ପୁଥିରେ ଅଲ୍‌ୟାନା।

24 ଏନ୍‌ ଦିପିଲିରେ ଲେବୀ କିଲିରେନ୍‌ ମୁଖିଆକ ହବାଅଃତାନା, ହଶ୍‌ବିୟ, ଶେରେବିୟ ଓଡ଼ୋଃ କଦ୍‌ମିୟେଲ୍‌ରାଃ ହନ୍ତେକଡ଼ା ଯେଶୁୟ। ନେ ହଡ଼କ ଓଡ଼ୋଃ ନେ ହଡ଼କଲଃ ମିସାତେ କାମିତାନ୍‌ ଲେବୀ ହଡ଼କ ପାର୍‌ମେଶ୍ୱାର୍‌ଆଃ ସାହାରାଅ ଓଡ଼ୋଃ ଧାନ୍ୟାବାଦ୍‌ ରିକାନାଙ୍ଗ୍‌ ଆପାନ୍‌ ଆପାନ୍‌ ଝୁଣ୍ଡ୍‌ରେ ହାଟିଙ୍ଗ୍‌ୟାନାକ। ନେଆଁ ପାର୍‌ମେଶ୍ୱାର୍‌ଆଃ ହଡ଼ ଦାଉଦ୍‌ଆଃ ଆନାଚୁ ଲେକାତେ ହବାୟାନା।

25 ମତ୍ତନିୟ, ବକ୍‍ବୁକୀୟ, ଓବଦିୟ, ମଶୁଲ୍ଲମ୍‍, ଟଲ୍‍ମୋନ୍‌ ଓଡ଼ୋଃ ଆକ୍‌କୁବ୍‌ ଦୁଆର୍‌ ହରହଡ଼ ଲେକା ସାଲାୟାନ୍‌ଲଃ ଦୁଆର୍‌ ହେପାଦ୍‌ରାଃ ଭାଣ୍ଡାର୍‌ ଅଡ଼ାଃକ ହରକେଦା। 26 ନେ ହଡ଼କ ଯୋଷାଦକ୍‌ରାଃ ଜାଇହନ୍‌ ଅକ୍‌ନିଃଚି ଯେଶୁୟରାଃ ହନ୍ତେକଡ଼ା ଯୋୟାକୀମ୍‌ରାଃ ଦିପିଲିରେ, ଲାଟ୍‌ସାହେବ୍‌ ନିହିମିୟା ଓଡ଼ୋଃ ଆଇନ୍‌ ଇତୁନିଃ ଯାଜାକ୍‌ ଏଜ୍ରାରାଃ ଦିପିଲିରେ ତାଇକେନାକ।

27 ଯୀରୁଶାଲେମ୍‌ରାଃ ପାଚ୍‌ରି ସାଂସ୍‌କାର୍‌ ଦିପିଲିରେ ସବେନ୍‌ ଠାୟାଦ୍‌ଏତେ ଲେବୀ ହଡ଼କକେ ଯୀରୁଶାଲେମ୍‌ତେ ଆଉକେଦ୍‌କଆକ, ଜେ'ଲେକାଚି ଇନ୍‌କୁ ତିଃଇ ଥାପ୍‌ଡ଼ି, ମୁର୍‌ଦୁଙ୍ଗ୍‌, ବିଣା ଓଡ଼ୋଃ କେନ୍ଦ୍‌ରା ସାଡ଼ିକେଦ୍‌ତେ ଧାନ୍ୟାବାଦ୍‌ରାଃ ଦୁରାଙ୍ଗ୍‌ ଗାମୁତାନ୍‌ଲଃ ରାସ୍‌କାତେ ପାଚ୍‌ରି ସାଂସ୍‌କାର୍‌ ହବାଅଃଆ। 28 ଯୀରୁଶାଲେମ୍‌ରାଃ ଚାରିଓସାଃରେ ତାଇନ୍‌ତାନ୍‌ ଦୁରାଙ୍ଗ୍‌ ହଡ଼କକେ ହଗି ଆଉୟାନା। ଏନ୍‌ ଦୁରାଙ୍ଗ୍‌ ହଡ଼କକେ ନଟୋଫାତିକଆଃ ହାତୁଏତେ, 29 ବୈଥ୍‌ଗିଲ୍‌ଗଲ୍‌ଏତେ, ଗେବାଏତେ ଓଡ଼ୋଃ ଅସ୍‌ମାବତ୍‌ ପାର୍‌ଗାନ୍‌ଏତେ ଆଉକାନ୍‌ ତାଇକେନାକ। ଚିଆଃଚି ଏନ୍‌ ଦୁରାଙ୍ଗ୍‌ ହଡ଼କ ଯୀରୁଶାଲେମ୍‌ରାଃ ଚାରିଓସାଃରେ ଆକଆଃ ଆପ୍‌ନାଃ ନାଗେନ୍ତେ ତାଇନଃ ନାଙ୍ଗ୍‌ ହାତୁ ବାଇୟାକାଦ୍‌ ତାଇକେନାକ।

30 ଯାଜାକ୍‌କ ଓଡ଼ୋଃ ଲେବୀ ହଡ଼କ ଆପାନ୍‌କେ ଫାର୍‌ଚିୟାନ୍‌ ତାୟମ୍‌ତେ ହଡ଼କକେ, ନାଗାର୍‌ରାଃ ଦୁଆର୍‌କେ ଓଡ଼ୋଃ ନାଗାର୍‌ରାଃ ପାଚ୍‌ରିକେ ଫାର୍‌ଚିକେଦାକ।

31 ଆଇଙ୍ଗ୍‌ ଯିହୁଦାରେନ୍‌ ଆଗୁଆଇକକେ ପାଚ୍‌ରି ଚେତାନ୍‌ତେ ଆଉକେଦ୍‌କଆଇଙ୍ଗ୍‌। ପାର୍‌ମେଶ୍ୱାର୍‌ଆଃ ଧାନ୍ୟାବାଦ୍‌ ଓଡ଼ୋଃ ଦୁରାଙ୍ଗ୍‌ ଗାମୁ ନାଙ୍ଗ୍‌ ବାରିୟା ମାପ୍‌ରାଙ୍ଗ୍‌ ଝୁଣ୍ଡ୍‌ ବାଇକେଦାଇଙ୍ଗ୍‌। ମିଆଁଦ୍‌ ଝୁଣ୍ଡ୍‌ ଜମ୍‌ସାଃରେ ତାଇକାନ୍‌ ପାଚ୍‌ରିରାଃ ଚେତାନ୍‌ ହରାରେ ଗୁରିଃକ୍‌ଗାଡାରାଃ ଦୁଆର୍‌ସାଃତେ ସେନଃୟାନାକ। 32 ନେ ଦୁରାଙ୍ଗ୍‌ ହଡ଼କଆଃ ତାୟମ୍‌ସାଃରେ ହଶୟିୟ ଓଡ଼ୋଃ ଯିହୁଦାରେନ୍‌ ଆଗୁଆଇକଏତେ ଆଧା ଆଗୁଆଇକ ସେନ୍‌କେନା, 33 ଆଡଃଗି ଅସରିୟ, ଏଜ୍ରା, ମଶୁଲ୍ଲମ୍‌, 34 ଯିହୁଦା, ବେଞ୍ଜାମିନ୍, ଶମୟିୟ, ଯିରିମିୟ 35 ଓଡ଼ୋଃ ଚିମିନ୍‌ ଯାଜାକ୍‌କଆଃ ହନ୍‌କ ବିଙ୍ଗୁଲ୍‌ବାଜା ସାବ୍‌କେଦ୍‌ତେ ହନର୍‌କେଦାକ, ଇନ୍‌କୁଏତେ ଆସଫ୍‌ କିଲିରେନ୍‌ ଜିଖରିୟ ହଗି ତାଇକେନା। ଜିଖରିୟରାଃ ଆପୁ ଯୋନାଥନ୍‌, ଯୋନାଥନ୍‌ରାଃ ଆପୁ ଶମୟିୟ, ଶମୟିୟରାଃ ଆପୁ ମତ୍ତନିୟ, ମତ୍ତନିୟରାଃ ଆପୁ ମିଖାୟ, ମିଖାୟରାଃ ଆପୁ ସକ୍‌କୁର୍, ସକ୍‌କୁର୍‌ଆଃ ଆପୁ ଆସଫ୍‌ ତାଇକେନାଏ। 36 ଜିଖରିୟଲଃ ଆୟାଃ ହାଗାକ ଶମୟିୟ, ଅସ୍‌ରେଲ୍‌, ମିଲ୍‌ଲୟ, ଗିଲ୍‌ଲୟ, ମାୟିୟ, ନଥନେଲ୍‌, ଯିହୁଦା ଓଡ଼ୋଃ ହନାନି, ନେ ସବେନ୍‌ ଯାଜାକ୍‌କ ପାର୍‌ମେଶ୍ୱାର୍‌ଆଃ ହଡ଼ ଦାଉଦ୍‌ଆଃ ହରାତେ ସାଲାକାନ୍‌ ସାଡ଼ିତେୟାଃ ସାଡ଼ିତାନ୍‌ଲଃ ସେସେନ୍‌ୟାନାକ। ଆଇନ୍‌ ଇତୁନିଃ ଏଜ୍ରା ଇନ୍‌କୁଆଃ ଆୟୁର୍‌ ଆୟୁର୍‌ ସେସେନ୍‌ୟାନାଏ। 37 ଇନ୍‌କୁ ସେତେଙ୍ଗ୍‌ରାଃ ଦୁଆର୍‌ ହେପାଦ୍‌ତାଃ ସେଟେର୍‌କେଦ୍‌ତେ ସିଧା ଦାଉଦ୍‌ ନାଗାର୍‌ରାଃ ସିଢ଼ି ହରାତେ ପାଚ୍‌ରିରାଃ ଚେତାନ୍‌ରେ ରାକାବ୍‌ୟାନାକ ଓଡ଼ୋଃ ଦାଉଦ୍‌ଆଃ ମାହାଲ୍‌ ହରା ସେନ୍‌ ପାରମ୍‌କେଦ୍‌ତେ ପୁରାବ୍‌ସାଃରେୟାଃ ଦାଆଃଦୁହାର୍‌ ଜାକେଦ୍‌ ସେନଃୟାନାକ।

38 ଏଟାଃ ଝୁଣ୍ଡ୍‌ରେନ୍‌ ଧାନ୍ୟାବାଦ୍‌ରାଃ ଦୁରାଙ୍ଗ୍‌ଗାମୁ ହଡ଼କ, ଇନ୍‌କୁଲଃ ନାପାମ୍‌ ନାଗେନ୍ତେ ଏଟାଃ ହରାରେ ସେନଃୟାନାକ। ଆଇଙ୍ଗ୍‌ ଓଡ଼ୋଃ ଆଗୁଆଇକଆଃ ଆଧା ହଡ଼କ ଇନ୍‌କୁଆଃ ତାୟମ୍‌ ତାୟମ୍‌ତେ ପାଚ୍‌ରି ଚେତାନ୍‌ରେ ଭାଟିରାଃ ଗାଡ଼୍‌ ହରାତେ ଚାକାର୍‌ ପାଚ୍‌ରି ଜାକେଦ୍‌ ସେନଃୟାନାଲେ। 39 ଏନ୍ତେ ଆଲେ ଇଫ୍ରାଇମ୍‌ ଦୁଆର୍‌ଏତେ ମାରି ଦୁଆର୍‌, ହାକୁ ଦୁଆର୍‌, ଓଡ଼ୋଃ ହନାନେଲ୍‌ ଗାଡ଼୍‌, ମଣେୟାଁ ହିସିରାଃ ଗାଡ଼୍‌ ହରାତେ ମିଣ୍ଡି ଗୋଟ୍‌କଆଃ ଦୁଆର୍‌ ଜାକେଦ୍‌ ସେନଃୟାନାଲେ ଓଡ଼ୋଃ ହର ଦୁଆର୍‌ ହେପାଦ୍‌ତାଃରେ ତିଙ୍ଗୁୟାନାଲେ।

40 ନେ'ଲେକାତେ ବାରାନ୍‌ ଝୁଣ୍ଡ୍‌ରେନ୍‌ ଧାନ୍ୟାବାଦ୍‌ ରିକା ହଡ଼କ ପାର୍‌ମେଶ୍ୱାର୍‌ଆଃ ବିନ୍ତିଅଡ଼ାଃ ହେପାଦ୍‌ତାଃରେ ତିଙ୍ଗୁୟାନାକ। ଆଇଙ୍ଗ୍‌ ଓଡ଼ୋଃ ଆଗୁଆଇକଆଃ ଆଧା ହଡ଼କ ହଗି ତିଙ୍ଗୁୟାନାଲେ। 41 ଇନ୍‌କୁଲଃ ବିଙ୍ଗୁଲ୍‌ବାଜା ସାଡ଼ି ଯାଜାକ୍‌କ ତାଇକେନା। ଇନ୍‌କୁ ହବାଅଃତାନାକ, ଇଲିୟାକିମ୍‍, ମାସେୟ, ମିନ୍ୟାମୀନ୍‌, ମିଖାୟ, ଏଲିୟନାୟ, ଜିଖରିୟ ଓଡ଼ୋଃ ହନାନିୟ। 42 ଅକ ଯାଜାକ୍‌କ ଦୁରାଙ୍ଗ୍‌ଗାମୁ ଝୁଣ୍ଡ୍‌ରେ ତାଇକେନାକ, ଇନ୍‌କୁ ହବାଅଃତାନାକ, ମାସେୟ, ଶମୟିୟ, ଏଲିୟାଜାର୍‌, ଉଷି, ଯିହୋହାନନ୍, ମଲ୍‌କିୟ, ଏଲମ୍‌ ଓଡ଼ୋଃ ଏସର୍‌। ଦୁରାଙ୍ଗ୍‌ରେ ଆଗୁଆଇତାନ୍‌ ଯିଷ୍ରହିୟରାଃ ଆନାଚୁ ଲେକାତେ ଇନ୍‌କୁ ପୁରାଃ ଜୋର୍‌ଗି ଦୁରାଙ୍ଗ୍‌କେଦାକ।

43 ଏନ୍‌ ହୁଲାଙ୍ଗ୍‌ ଇନ୍‌କୁ ପୁରାଃଗି ଦାଣେଁ ରାକାବ୍‌କେଦ୍‌ତେ ଲାନ୍ଦା ରାସ୍‌କା ରିକାକେଦାକ। ଚିଆଃଚି ପାର୍‌ମେଶ୍ୱାର୍‌ ଇନ୍‌କୁକେ ରାସ୍‌କା ଏମାକାଦ୍‌କ ତାଇକେନାଏ। କୁଡ଼ିକ ଓଡ଼ୋଃ ହନ୍‌କ ହଗି ରାସ୍‌କାୟାନାକ, ଏନ୍‌ ରାସ୍‌କାରାଃ ଲାବ୍‌ଜା ଯୀରୁଶାଲେମ୍‌ରେୟାଃ ପୁରାଃ ସାଙ୍ଗିନ୍‌ ଜାକେଦ୍‌ ଆୟୁମ୍‌ୟାନା।

44 ଏନ୍‌ ହୁଲାଙ୍ଗ୍‌ ହଡ଼କଆଃ ଦାନ୍‌, ପାହିଲା ଜ', ଗେଲ୍‌ହିସା ଦାନ୍‌କ ହାରମ୍‌କେଦ୍‌ତେ ଦହ ନାଙ୍ଗ୍‌ ଚିମିନ୍‌ ହଡ଼କକେ ସାଲାୟାନା। ଇନ୍‌କୁ ଆଇନ୍‌ ଲେକାତେ ଯାଜାକ୍‌ ଓଡ଼ୋଃ ଲେବୀ ହଡ଼କଆଃ ହିସା ନାଗାର୍‌ରେୟାଃ ଚାରିଓସାଃଏତେ ହାରମ୍‌କେଦ୍‌ତେ ଭାଣ୍ଡାର୍‌ ଅଡ଼ାଃରେ ଦହରେୟାଃ ବାହାରମ୍‌ ଇଦିକେଦାକ। ଚିଆଃଚି ଯିହୁଦାରେନ୍‌ ହଡ଼କ ଯାଜାକ୍‌ ଓଡ଼ୋଃ ଲେବୀ ହଡ଼କଆଃ ସୁନୁସାର୍‌ କାମିରେ ବିଶେଷ୍‌ ରାସ୍‌କାକାନ୍‌ ତାଇକେନାକ। 45 ଯାଜାକ୍‌ ଓଡ଼ୋଃ ଲେବୀ ହଡ଼କ ଦାଉଦ୍‌ ଓଡ଼ୋଃ ଆୟାଃ ହନ୍ତେକଡ଼ା ସୁଲିମାନ୍‌ଆଃ ଆନାଚୁ ଲେକାତେ ଆକଆଃ ଆପ୍‌ନାଃ ପାର୍‌ମେଶ୍ୱାର୍‌ଆଃ ସୁନୁସାର୍‌ ରିକାକେଦାକ ଓଡ଼ୋଃ ଫାର୍‌ଚିୟଃରାଃ କାମିକ ରିକାକେଦା। ଓଡ଼ୋଃ ବିନ୍ତିଅଡ଼ାଃରେ ଦୁରାଙ୍ଗ୍‌ଗାମୁ ହଡ଼କ ଓଡ଼ୋଃ ଦୁଆର୍‌ ହର ହଡ଼କ ହଗି ଏନ୍‌ଲେକା ଆକଆଃ ଆପ୍‌ନାଃ କାମି ରିକାକେଦାକ। 46 ସିଦା ଦିପିଲିରେ ଦାଉଦ୍‌ ଓଡ଼ୋଃ ଆସଫ୍‌ରାଃ ରାଇଜ୍‌ ଇମ୍‌ତା ଦୁରାଙ୍ଗ୍‌ଗାମୁ ହଡ଼କ ନାଙ୍ଗ୍‌ ମିହୁଡ଼୍‌ ଆଗୁଆଇ ତାଇକେନାଏ। ଇନିଃ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ସାହାରାଅ ଓଡ଼ୋଃ ଧାନ୍ୟାବାଦ୍‌ରାଃ ଦୁରାଙ୍ଗ୍‌କ ଦୁରାଙ୍ଗ୍‌ ତାଇକେନା। 47 ଯେରୁବାବେଲ୍‌ ଓଡ଼ୋଃ ନିହିମିୟାରାଃ ଦିପିଲିରେ ଇସ୍ରାଏଲ୍‌ରେନ୍ ସବେନ୍‌ ହଡ଼କ, ଦୁରାଙ୍ଗ୍‌ଗାମୁ ହଡ଼କକେ ଓଡ଼ୋଃ ବିନ୍ତିଅଡ଼ାଃ ଦୁଆର୍‌ ହର ହଡ଼କକେ ଦାନ୍‌ ଏମ୍‌ ନାଙ୍ଗ୍‌ ସବେନ୍‌ ହୁଲାଙ୍ଗ୍‌ ଆଉ ତାଇକେନାକ। ଇନ୍‌କୁ ଲେବୀକଆଃ ହିସା ପାବିତାର୍‌କେଦ୍‌ତେ ଆପାନ୍‌ରେ ଦହ ତାଇକେନାକ ଓଡ଼ୋଃ ଲେବୀ ହଡ଼କ, ହାରୁନ୍‌ଆଃ କିଲିରେନ୍‌ ଯାଜାକ୍‌କଆଃ ହିସା ପାବିତାର୍‌କେଦ୍‌ତେ ଆପାନ୍‌ରେ ଦହ ତାଇକେନାକ।