ଏଟାଃ ଦିଶୁମ୍ରେନ୍ ହଡ଼କତାଃଏତେ ହିଗାଡ଼େନ୍
1 ଏନ୍ ହୁଲାଙ୍ଗ୍ ହଡ଼କ ଆୟୁମେ ଲେକା ମୁଶାରାଃ ପୁଥି ପାଢ଼ାଅୟାନା। ଇନ୍କୁ ଏନ୍ ପୁଥିରେ ନେ କାଜି ଅଲାକାନ୍ତେୟାଃ ସାରିକେଦାକ ଯେ, ଅମ୍ମୋନିୟ ଓଡ଼ୋଃ ମୋୟାବିୟ ହଡ଼କ ଚିଉଲାଅଗି ପାର୍ମେଶ୍ୱାର୍ଆଃ ହଡ଼କଆଃ ସାମାଜ୍ରେ ଆଲକାକ ବଲକା। 2 ଚିଆଃଚି ବିର୍ରେ ସେନ୍ହରା ତାଇକେନ୍ ଇମ୍ତା ଇନ୍କୁ ଇସ୍ରାଏଲ୍ ହଡ଼କକେ ଜମେୟାଁ ଓଡ଼ୋଃ ଦାଆଃ ନୁଁ' ନାଙ୍ଗ୍ କାକ ଏମ୍, ମେନ୍ଦ ଇସ୍ରାଏଲ୍ ହଡ଼କକେ ସାର୍ପାଅକ ନାଙ୍ଗ୍ ବାଲାମ୍କେ ଟାକା ପାଇସା ଏମାକାଇ ତାଇକେନାକ। ଏନ୍ରେୟ ଆବୁଆଃ ପାର୍ମେଶ୍ୱାର୍ ଏନ୍ ସାର୍ପାଅକେ ଆଶିଷ୍ରେ ବାଦ୍ଲାଅକେଦା। 3 ହଡ଼କ ନେଆଁ ଆୟୁମ୍କେଦ୍ତେ ଇସ୍ରାଏଲ୍ଏତେ ଏଟାଃ ଦିଶୁମ୍ରେନ୍ ସବେନ୍ ହଡ଼କକେ ଆପ୍ନାଃ ସାମାଜ୍ଏତେ ହିଗାଡ଼୍କେଦ୍କଆକ।
ନିହିମିୟାରାଃ ସୁଧ୍ରାଅ
4 ନେଆଁରାଃ ସିଦାଏତେ ଯାଜାକ୍ ଇଲିୟାଶିବ୍ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଭାଣ୍ଡାର୍କ ନେଲ୍ରାଃ ବାହାରମ୍ ଇଦିକାଦ୍ ତାଇକେନାଏ, ଓଡ଼ୋଃ ଟୋବିୟଲଃ ବୁଗିନ୍ ନାତା ତାଇକେନା। 5 ଇଲିୟାଶିବ୍, ଟୋବିୟ ନାଗେନ୍ତେ ମିଆଁଦ୍ ମାରାଙ୍ଗ୍ କୁଠା ବାଇକାଦ୍ ତାଇକେନାଏ। ଏନ୍ କୁଠାରେ ହଡ଼କ ହିତାଜାଙ୍ଗ୍ରାଃ ଦାନ୍, ବୁଗିନ୍ସହାନ୍ ଧୁଆନ୍, ବିନ୍ତିଅଡ଼ାଃରେ ବେଭାର୍ରଃ ଜିନିଷ୍କ, ଲେବୀ ହଡ଼କକେ ଓଡ଼ୋଃ ଦୁରାଙ୍ଗ୍ଗାମୁ ହଡ଼କକେ ଏମାକାନ୍ ଗେଲ୍ହିସା ଦାନ୍ ହିତାଜାଙ୍ଗ୍, ନାୱା ଦାଖ୍ରାସି, ଅଲିଭ୍ ସୁନୁମ୍ ଓଡ଼ୋଃ ଯାଜାକ୍କ ନାଙ୍ଗ୍ ଏମାକାନ୍ ଦାନ୍ ହଗି ଦହଃ ତାଇକେନା। 6 ମେନ୍ଦ ଏନ୍ ଦିପିଲିରେ ଆଇଙ୍ଗ୍ ଯୀରୁଶାଲେମ୍ରେ କାଇଙ୍ଗ୍ ତାଇକେନା। ଚିଆଃଚି ବାବିଲୋନ୍ରେନ୍ ରାଜା ଅର୍ତ୍ତକ୍ଷସ୍ତ ରାଇଜ୍ତାନ୍ ଦିପିଲିରାଃ ମିଦ୍ହିସି ଗେଲ୍ ଆପିୟା ବାରାଷ୍ରେ ଆଇଙ୍ଗ୍ ରାଜାରାଃ ହେପାଦ୍ତେ ସେନ୍କେନାଇଙ୍ଗ୍ ଓଡ଼ୋଃ ଚିମିନ୍ ମାହା ତାୟମ୍ତେ ଇନିଃତାଃଏତେ ବିଦା ଇଦି ନାଙ୍ଗ୍ ଆସିକିୟାଇଙ୍ଗ୍। 7 ଏନ୍ତେ ଆଇଙ୍ଗ୍ ଯୀରୁଶାଲେମ୍ ହିଜୁଃ ରୁହାଡ଼୍କେଦ୍ତେ ଇଲିୟାଶିବ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ରାଚାରେ ଟୋବିୟ ନାଙ୍ଗ୍ ମିଆଁଦ୍ କୁଠା ବାଇକେଦ୍ତେ ଅକ ଭୁଲ୍ ରିକାକାଦାଏ, ଏନା ସାରିଉରୁମ୍ କେଦାଇଙ୍ଗ୍। 8 ଓଡ଼ୋଃ ପୁରାଃଗି ଖିସ୍କେଦ୍ତେ ଟୋବିୟରାଃ ଜିନିଷ୍କ କୁଠାଏତେ ବାହାରି ହୁରାଙ୍ଗ୍ ଅଡଙ୍ଗ୍କେଦାଇଙ୍ଗ୍। 9 ଏନ୍ତେ କୁଠାକେ ଫାର୍ଚି ରିକାନାଙ୍ଗ୍ ହୁକୁମ୍ ଏମ୍କେଦାଇଙ୍ଗ୍ ଓଡ଼ୋଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଜିନିଷ୍କ, ହିତାଜାଙ୍ଗ୍ରାଃ ଦାନ୍ ଓଡ଼ୋଃ ବୁଗିନ୍ସହାନ୍ ଧୁଆନ୍କକେ ଆଡଃମିସା ଏନ୍ତାଃରେ ଦହ ଇଚିକେଦ୍କଆଇଙ୍ଗ୍।
10 ଆଇଙ୍ଗ୍ ଆଡଃଗି ଆୟୁମ୍କେଦାଇଙ୍ଗ୍ ଯେ, ଲେବୀ ହଡ଼କକେ ଆକଆଃ ନାମଃତେୟାଃ କା ନାମଃତାନ୍ ହରାତେ ସେୱା ରିକା ନାଙ୍ଗ୍ ସାଲାକାନ୍ ଲେବୀ ହଡ଼କ ଓଡ଼ୋଃ ଦୁରାଙ୍ଗ୍ ହଡ଼କ ଆକଆଃ ଆପ୍ନାଃ ଲୟଙ୍ଗ୍ତେ କାମି ନାଙ୍ଗ୍ ରୁହାଡ଼୍ୟାନାକ। 11 ଏନାତେ ଆଇଙ୍ଗ୍ ହାକିମ୍କକେ ଖିସ୍କେଦ୍ତେ କୁଲିକେଦ୍କଆଇଙ୍ଗ୍, "ପାର୍ମେଶ୍ୱାର୍ଆଃ ବିନ୍ତିଅଡ଼ାଃକେ ଚିନାଃମେନ୍ତେ ହେଡ଼ା ରିକାଅଃତାନା ?" ଏନ୍ତେ ଆଇଙ୍ଗ୍ ଲେବୀ ହଡ଼କକେ ଓଡ଼ୋଃ ଦୁରାଙ୍ଗ୍ଗାମୁ ହଡ଼କକେ କେଡ଼ା ହୁଣ୍ଡିକେଦ୍ତେ, ଇନ୍କୁକେ ଆଡଃମିସା ମିହୁଡ଼୍ ମିହୁଡ଼୍ତେ ଆକଆଃ ଆପ୍ନାଃ କାମିରାଃ ଠାୟାଦ୍ରେ ଦହକେଦ୍କଆଇଙ୍ଗ୍। 12 ଏନ୍ତେ ଯିହୁଦାରେନ୍ ସବେନ୍ ହଡ଼କ ହିତାଜାଙ୍ଗ୍ରାଃ ଗେଲ୍ହିସା, ନାୱା ଦାଖ୍ରାସି ଓଡ଼ୋଃ ଅଲିଭ୍ ସୁନୁମ୍ ବିନ୍ତିଅଡ଼ାଃରାଃ ଭାଣ୍ଡାର୍ ଅଡ଼ାଃତେ ଆଡଃଗି ଆଉ ଏଟେଦ୍କେଦାକ। 13 ଆଇଙ୍ଗ୍ ଭାଣ୍ଡାର୍ ଅଡ଼ାଃରାଃ ବାହାରମ୍ ଗଅଃ ନାଙ୍ଗ୍ ଯାଜାକ୍ ଶେଲିମିୟକେ, ଆଇନ୍ ଇତୁନିଃ ସାଦୋକ୍କେ ଓଡ଼ୋଃ ପଦାୟ ନୁତୁମ୍ ଲେବୀ ହଡ଼କେଇଙ୍ଗ୍ ସାଲାକିୟା। ଇନ୍କୁଆଃ ଲାତାର୍ରେ ମତ୍ତନିୟରାଃ ଜାଇହନ୍ ଅକଏଚି ସକ୍କୁର୍ରାଃ ହନ୍ତେକଡ଼ା ହାନନ୍ ତାଇକେନାଏ। ଚିଆଃଚି ଇନ୍କୁ ପାତିୟାର୍ରଃ ଲେକା ତାଇକେନାକ, ଏନାତେ ଆକଆଃ ଆପ୍ନାଃ ହାଗା ଲେବୀ ହଡ଼କକେ ହାଟିଙ୍ଗ୍ ରିକାରାଃ କାମି ଇନ୍କୁଆଃ ହବାୟାନା।
14 ହେ ଆଇଁୟାଃ ପାର୍ମେଶ୍ୱାର୍, ଆମାଃ ବିନ୍ତିଅଡ଼ାଃ ଓଡ଼ୋଃ ଏନ୍ତାଃରେ ହବାଅଃତାନ୍ ସୁନୁସାର୍ କାମି ନାଗେନ୍ତେ ଆଇଙ୍ଗ୍ ପାତିୟାର୍ରଃ ଲେକା ଅକ କାମିକ ରିକା କାଦାଇଙ୍ଗ୍, ଏନା କା ରିଡ଼ିଙ୍ଗ୍କେଦ୍ତେ ଆଇଙ୍ଗ୍କେ ଦାୟାତାନ୍ଲଃ ପାହାମିଙ୍ଗ୍ମେ।
15 ଏନ୍ ନେଣ୍ଡାରେ ଆଇଙ୍ଗ୍ ଚିମିନ୍ ଯିହୁଦାରେନ୍ ହଡ଼କକେ ରୁଡ଼ୁନ୍ ହୁଲାଙ୍ଗ୍ରେ ଦାଖ୍ରାସି ପେରାଅତାନ୍ ନେଲ୍କେଦ୍କଆଇଙ୍ଗ୍। ଓଡ଼ୋଃ ଚିମିନ୍ ହଡ଼କ ହିତାଜାଙ୍ଗ୍ରାଃ ବିଡ଼ା ଆଉକେଦ୍ତେ ଗାଧା ଚେତାନ୍ରେ ଲାଦିତାନ୍ ଓଡ଼ୋଃ ଦାଖ୍ରାସି, ଦାଖ୍ଜ, ଲଆ ଓଡ଼ୋଃ ଏଟାଃ ଜିନିଷ୍କ ବୋଝା ତଲ୍କେଦ୍ତେ ଯୀରୁଶାଲେମ୍ତେ ଆଉତାନ୍ ନେଲ୍କେଦ୍କଆଇଙ୍ଗ୍। ଏନାମେନ୍ତେ ରୁଡ଼ୁନ୍ ହୁଲାଙ୍ଗ୍ରେ ଜମେୟାଁଃ ଚାଏ ଜେତାନ୍ ଜିନିଷ୍ ଆଲପେ ଆଖ୍ରିଙ୍ଗ୍ୟେଁଆ ମେନ୍ତେଇଙ୍ଗ୍ ଚିର୍ଗାଲ୍କେଦ୍କଆ। 16 ସୋର୍ ନାଗାର୍ରେନ୍ ହଡ଼କ ଯୀରୁଶାଲେମ୍ରେ ତାଇନଃ ତାଇକେନାକ। ଇନ୍କୁ ହାକୁ ଓଡ଼ୋଃ ରାକାମ୍ ରାକାମ୍ ଜିନିଷ୍କ ରୁଡ଼ୁନ୍ ହୁଲାଙ୍ଗ୍ରେ ଆଉକେଦ୍ତେ ଯିହୁଦାରେନ୍ ହଡ଼କତାଃରେ ଆଖ୍ରିଙ୍ଗ୍ ତାଇକେନାକ। 17 ଆଇଙ୍ଗ୍ ଯିହୁଦାରେନ୍ ଆଗୁଆଇ ହଡ଼କକେ ଏଗେର୍ତାନ୍ଲଃ କାଜିକେଦ୍କଆଇଙ୍ଗ୍, "ଆପେ ରୁଡ଼ୁନ୍ ହୁଲାଙ୍ଗ୍କେ ସତ୍ରା ରିକାକେଦ୍ତେ ଚିନାଃ ନାଙ୍ଗ୍ ଏତ୍କାନାଃ ରିକାତାନାପେ ? 18 ଆପେୟାଃ ପୁର୍ଖାହାଡ଼ାମ୍କ ନେ’ଲେକା କାମି ଚିନାଃ କାକ ରିକା କାଦ୍ତାଇକେନା ? ଏନାମେନ୍ତେଗିଦ, ପାର୍ମେଶ୍ୱାର୍ ଆବୁଆଃ ଚେତାନ୍ରେ ଓଡ଼ୋଃ ନେ ନାଗାର୍ ଚେତାନ୍ରେ ନେ ସବେନ୍ ହାସୁ ଦୁକୁକ ଆଉକେଦାଏ। ନାହାଁଃ ଆପେ ରୁଡ଼ୁନ୍ ହୁଲାଙ୍ଗ୍କେ ସତ୍ରା ରିକାକେଦ୍ତେ ଇସ୍ରାଏଲ୍ ଚେତାନ୍ରେ ଆଡଃଗି ପାର୍ମେଶ୍ୱାର୍ଆଃ ପୁରାଃ ଖିସ୍ ଆଉତାନାପେ।"
19 ରୁଡ଼ୁନ୍ହୁଲାଙ୍ଗ୍ ହବାଅଃ ସିଦାରେ, ଯୀରୁଶାଲେମ୍ରାଃ ଦୁଆର୍କରେ ସିଙ୍ଗିହାସୁର୍ରାଃ ଉମ୍ବୁଲ୍ ଠଅଃୟାନ୍ଚି ଆଇଙ୍ଗ୍ ନାଗାର୍ରାଃ ଦୁଆର୍କ ହାଣ୍ଡେଦ୍ଗି ତାଇନଃକା ମେନ୍ତେଇଙ୍ଗ୍ ହୁକୁମ୍କେଦ୍କଆ। ରୁଡ଼ୁନ୍ ହୁଲାଙ୍ଗ୍ରେ ଜେତାନ୍ ବୋଝା ନାଗାର୍ ଭିତାର୍ତେ ଆଲକା ହିଜୁଃକା ମେନ୍ତେ ଆଇଙ୍ଗ୍ ଆଇଁୟାଃ ହଡ଼କକେ ଦୁଆର୍ ହେପାଦ୍ତାଃରେ ହର ନାଙ୍ଗ୍ ସାଲାକେଦ୍କଆଇଙ୍ଗ୍। 20 ଏନ୍ରେୟଗି କିରିଙ୍ଗ୍ଆଖ୍ରିଙ୍ଗ୍ ହଡ଼କ ରାକାମ୍ ରାକାମ୍ ଜିନିଷ୍ ଆଉକେଦ୍ତେ ବାର୍ସାତେ ଯୀରୁଶାଲେମ୍ରାଃ ପାଚ୍ରି ବାହାରିରେ ମିଦ୍ନୁବାଃ ତାଇନ୍ୟାନାକ। 21 ମେନ୍ଦ ଆଇଙ୍ଗ୍ ଇନ୍କୁକେ ଚେତାଅକେଦ୍ତେ କାଜିକେଦ୍କଆଇଙ୍ଗ୍, "ଆପେ ଚିନାଃମେନ୍ତେ ନାଗାର୍ରାଃ ପାଚ୍ରି ବାହାରିରେ ମିଦ୍ନୁବାଃ ତାଇନଃତାନାପେ ? ଆଡଃମିସା ନେ’ଲେକା ରିକାଏ ରେଦପେ, ଆଇଙ୍ଗ୍ ଆପେୟାଃ ବିରୁଧ୍ରେ ତିଙ୍ଗୁନାଇଙ୍ଗ୍।" ଏନ୍ ହୁଲାଙ୍ଗ୍ତାଃଏତେ ଓଡ଼ୋଃ ରୁଡ଼ୁନ୍ ହୁଲାଙ୍ଗ୍ରେ କାକ ହିଜୁଃୟାନା। 22 ଏନ୍ତେ ରୁଡ଼ୁନ୍ ହୁଲାଙ୍ଗ୍କେ ପାବିତାର୍ ଲେକା ମାନାତିଙ୍ଗ୍ ଦାଡ଼ିୟଃକା ମେନ୍ତେ ଲେବୀ ହଡ଼କ ଫାର୍ଚିନ୍କାକ ଓଡ଼ୋଃ ନାଗାର୍ରାଃ ଦୁଆର୍ ହର ନାଙ୍ଗ୍ ଆଇଙ୍ଗ୍ ହୁକୁମ୍କେଦ୍କଆଇଙ୍ଗ୍। ହେ ଆଇଁୟାଃ ପାର୍ମେଶ୍ୱାର୍, ନେଆଁ ନାଗେନ୍ତେ ହଗି ଆଇଙ୍ଗ୍କେ ପାହାମିଙ୍ଗ୍ମେଁ ଓଡ଼ୋଃ ଆମାଃ ପୁରାଃ ଦୁଲାଡ଼୍ ଲେକାତେ ଆଇଙ୍ଗ୍କେ ଦାୟା ରିକାଇଙ୍ଗ୍ମେ।
23 ଇମ୍ତା ହଗି ଆଇଙ୍ଗ୍ ଅକ ଯିହୁଦୀ ହଡ଼କ ଅସ୍ଦିଦିୟ, ଅମ୍ମୋନିୟ ଓଡ଼ୋଃ ମୋୟାବିୟ ଦିଶୁମ୍ରେନ୍ କୁଡ଼ିକକେ ଆଣ୍ଦିକାନ୍ ତାଇକେନାକ, ଇନ୍କୁକେ ନେଲ୍କେଦ୍କଆଇଙ୍ଗ୍। 24 ଇନ୍କୁଆଃ ହନ୍କଏତେ ଆଧା ହନ୍କ ଅସ୍ଦିଦିୟ ଜାଗାର୍ତେ ଜାଗାର୍ତାନ୍ ଓଡ଼ୋଃ ଏଟାଃ ଏଟାଃ ଝୁଣ୍ଡ୍ରେନ୍ ଜାଗାର୍ତେ ଜାଗାର୍ତାନ୍ ଆୟୁମ୍କେଦ୍କଆଇଙ୍ଗ୍, ମେନ୍ଦ ଯିହୁଦି ଜାଗାର୍ କାକ ସାରି ଦାଡ଼ିକେଦା। 25 ଆଇଙ୍ଗ୍ ଏନ୍ ହଡ଼କକେ ଏଗେର୍କେଦ୍ତେ ସାର୍ପାଅକେଦ୍କଆଇଙ୍ଗ୍। ଆଇଙ୍ଗ୍ ଇନ୍କୁଏତେ ଚିମିନ୍ ହଡ଼କକେ ଦାଲ୍କେଦ୍ତେ ଆକଆଃ ଉବ୍ ରାଚାଃକେଦାଇଙ୍ଗ୍ ଓଡ଼ୋଃ ପାର୍ମେଶ୍ୱାର୍ଆଃ ନୁତୁମ୍ତେ କିରିୟା ରିକା ଇଚିକେଦ୍ତେ କାଜିକେଦ୍କଆଇଙ୍ଗ୍, "ଆପେ ଇନ୍କୁଆଃ ହନ୍କଲଃ ଆପେୟାଃ କୁଡ଼ିହନ୍କକେ ଆଲପେ ଆଣ୍ଦିକଆ, ଚାଏ ଆପେୟାଃ କଡ଼ାହନ୍କ ନାଙ୍ଗ୍ ଇନ୍କୁଆଃ ହନ୍କୁଡ଼ି ଆଲପେ ଆଉକଆ।" 26 ଇସ୍ରାଏଲ୍ରେନ୍ ରାଜା ସୁଲିମାନ୍ ଚିନାଃ ନେ’ଲେକା ରିକାକେଦ୍ତେ ପାପ୍ କାଏ ରିକାକାଦ୍ ତାଇକେନା ? ଇନିୟାଃ ଲେକାନ୍ ରାଜା ଜେତା ଝୁଣ୍ଡ୍ରେ କାକ ତାଇକେନା। ଇନିଃକେ ପାର୍ମେଶ୍ୱାର୍ ଦୁଲାଡ଼ି ତାଇକେନାଏ ଓଡ଼ୋଃ ପାର୍ମେଶ୍ୱାର୍ ଇନିଃକେ ଗଟା ଇସ୍ରାଏଲ୍ରେନ୍ ରାଜା ରିକାକାଇ ତାଇକେନାଏ, ଏନ୍ରେୟ ଏଟାଃ ଦିଶୁମ୍ରେନ୍ ଆୟାଃ କୁଡ଼ିକ ଆଇଃକ୍କେ ପାପ୍ ଇଚିକିୟାକ। 27 ଏନ୍ ଲେକାଗି ଚି ନାହାଁଃ ଆପେ ଏଟାଃ ଦିଶୁମ୍ରେନ୍ କୁଡ଼ିକକେ ଆଣ୍ଦିକେଦ୍ତେ ଆବୁଆଃ ପାର୍ମେଶ୍ୱାର୍ଆଃ ବିରୁଧ୍ରେ କା ପାତିୟାର୍ରଃ କାମି ରିକାକେଦ୍ତେ ପୁରାଃ ମାରାଙ୍ଗ୍ ପାପ୍ ରିକାକାଦାପେ, ଏନା ଚିନାଃ ଆୟୁମେୟାଃଲେ ?
28 ମାରାଙ୍ଗ୍ ଯାଜାକ୍ ଇଲିୟାଶିବ୍ରାଃ ହନ୍ତେକଡ଼ା ଯୋୟାଦ୍ରାଃ ମିଆଁଦ୍ ହନ୍ତେକଡ଼ା ତାଇକେନାଏ। ଇନିଃ ହରୋନ୍ ସାହାର୍ରେନ୍ ସନ୍ବଲ୍ଲଟ୍ରାଃ ଆରାହନ୍ ତାଇକେନାଏ, ଏନାମେନ୍ତେ ଆଇଙ୍ଗ୍ ଇନିଃକେ ଆଇଙ୍ଗ୍ତାଃଏତେ ସାଙ୍ଗିନ୍ତେ ହାର୍କିୟାଇଙ୍ଗ୍।
29 ହେ ଆଇଁୟାଃ ପାର୍ମେଶ୍ୱାର୍, ଇନ୍କୁକେ ପାହାମ୍କମ୍, ଚିଆଃଚି ଇନ୍କୁ ଯାଜାକ୍ କାମି, ଯାଜାକ୍ ଓଡ଼ୋଃ ଲେବୀ ହଡ଼କଆଃ ରାଜିନାମାକେ ସତ୍ରାକାଦାକ।
30 ନେ’ଲେକା ଆଇଙ୍ଗ୍ ଯାଜାକ୍କକେ ଓଡ଼ୋଃ ଲେବୀ ହଡ଼କକେ ସବେନ୍ ଏଟାଃ ଦିଶୁମ୍ରାଃ ବିଷାଏକଏତେ ଫାର୍ଚିକେଦ୍କଆଇଙ୍ଗ୍ ଓଡ଼ୋଃ ସବେନ୍କକେ ଆକଆଃ କାମିରାଃ ବାହାରମ୍ ଏମାଦ୍କଆଇଙ୍ଗ୍। 31 ଓଡ଼ୋଃ ଆଇଙ୍ଗ୍ ଠାଉକା ନେଣ୍ଡାରେ ଉରୁବ୍ ଦାନ୍ ରାକାବ୍ ନାଙ୍ଗ୍ ବେଦିତାଃରେ ସାହାନ୍ ଓଡ଼ୋଃ ପାହିଲା ହବାକାନ୍ ଜ' ଆଉତେୟାଃ ଜଗାଡ଼୍କେଦାଇଙ୍ଗ୍। ହେ ଆଇଁୟାଃ ପାର୍ମେଶ୍ୱାର୍, ଆଇଁୟାଃ ବୁଗିନାଃ ନାଗେନ୍ତେ ନେଆଁ ପାହାମେମେ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)