1 ମାରାଙ୍ଗ୍‌ ଯାଜାକ୍‌ ଇଲିୟାଶିବ୍‌ ଓଡ଼ୋଃ ଆୟାଃଲଃ କାମିତାନ୍‌ ଯାଜାକ୍‌କ କାମି ଏଟେଦ୍‌କେଦ୍‌ତେ ମିଣ୍ଡିକଆଃ ଗୋଟ୍‌ ଦୁହାର୍‌ ଆଡଃମିସା ବାଇରୁହାଡ଼୍‌କେଦାକ। ଇନ୍‌କୁ ଏନା ପାବିତାର୍‌କେଦ୍‌ତେ ଏନାରେୟାଃ ଦୁହାର୍‌କକେ ଠାଉକା ଠାୟାଦ୍‌ରେ ଲାଗାଅକେଦାକ। ଇନ୍‌କୁ ମିଦ୍‌ ଶାଅ ଗାଡ଼୍‌ ଜାକେଦ୍‌ ବାଇକେଦ୍‌ତେ ପାବିତାର୍‌କେଦାକ ଓଡ଼ୋଃ ହନାନେଲ୍‌ ଗାଡ଼୍‌ ଜାକେଦ୍‌ ବାଇକେଦାକ।

2 ଇନ୍‌କୁଆଃ ତାୟମ୍‌ତେ ଯିରିହୋରେନ୍‌ ହଡ଼କ ବାଇକେଦାକ ଓଡ଼ୋଃ ଇନ୍‌କୁଆଃ ତାୟମ୍‌ତେ ଇମ୍ରିରାଃ ହନ୍ତେକଡ଼ା ସକ୍‌କୁର୍‌ ବାଇକେଦାଏ।

3 ହସ୍‌ନାୟାରାଃ ହନ୍‌କ ହାକୁ ଦୁହାର୍‌ ବାଇକେଦାକ। ଇନ୍‌କୁ ଏନାରେ ଚାଉଖାଟ୍‌ ଲାଗାଅକେଦ୍‌ତେ ଟାଟି, ସିକିଡ଼ି ଓଡ଼ୋଃ ଅର୍ଗଡ଼୍‌ ଲାଗାଅକେଦାକ।

4 ହକୋସ୍‌ରାଃ ଜାଇହନ୍‌ ଓଡ଼ୋଃ ଉରିୟରାଃ ହନ୍ତେକଡ଼ା ମରେମୋତ୍‌ ଏଟାଃ ହିସାକ ବାଇକେଦାଏ। ଏନ୍‌ ତାୟମ୍‌ତେ ମଶେଷ୍‌ବେଲ୍‍ରାଃ ଜାଇହନ୍‌ ମଶୁଲ୍ଲମ୍ ଏଟାଃ ହିସା ବାଇକେଦାଏ। ଇନିଃ ବେରିଖିୟରାଃ ହନ୍ତେକଡ଼ା ତାଇକେନାଏ। ଇନିୟାଃ ତାୟମ୍‌ତେ ବାନାରାଃ ହନ୍ତେକଡ଼ା ସାଦୋକ୍‌ ଏଟାଃ ହିସା ବାଇକେଦାଏ।

5 ଇନିୟାଃ ତାୟମ୍‌ତେ ତେକୋୟାରେନ୍‌ ହଡ଼କ ଏଟାଃ ହିସା ବାଇକେଦାକ, ମେନ୍‌ଦ ଇନ୍‌କୁଆଃ ଝୁଣ୍ଡ୍‌ରେନ୍‌ ହଡ଼କ, ଆକଆଃ ମାନ୍‌ହାନିକଆଃ ମେନ୍ତେ ଆଗୁଆଇ ହଡ଼କଆଃ ଆକ୍‌ତେୟାର୍‌ରେ କାକ କାମିକେଦା।

6 ପାସେହରାଃ ହନ୍ତେକଡ଼ା ଯିହୋୟାଦା ଓଡ଼ୋଃ ବିଷୋଦିୟାରାଃ ହନ୍ତେକଡ଼ା ମଶୁଲ୍ଲମ୍‌ ମାରି ଦୁହାର୍‌କେ ବାଇକେଦାକିନ୍‌। ଇନ୍‌କିନ୍‌ ଚାଉଖାଟ୍‌ ଲାଗାଅକେଦ୍‌ତେ ଟାଟି, ସିକିଡ଼ି ଓଡ଼ୋଃ ଅର୍ଗଡ଼୍‌କ ଲାଗାଅକେଦାକିନ୍‌।

7 ଫରାତ୍ ଗାଡ଼ାରାଃ ହାନ୍‌ପାରମ୍‌ରେନ୍‌ ଲାଟ୍‌ସାହେବ୍‌ରାଃ ଆକ୍‌ତେୟାର୍‌ରେ ତାଇନ୍‌ତାନ୍‌ ରାଜ୍‌ଗାଦିକେ ଗିବିୟୋନ୍‌ରେନ୍‌ ମେଲାତିୟା ଓଡ଼ୋଃ ମରୋଣୋଥିରେନ୍‌ ଯାଦନ୍‌, ଏନ୍ତେ ଗବିୟୋନ୍‌ ଓଡ଼ୋଃ ମିସ୍‌ପାରେନ୍‌ ହଡ଼କ ଏଟାଃ ହିସାକ ବାଇକେଦାଏ।

8 ଇନ୍‌କୁଆଃ ତାୟମ୍‌ତେ ସୋନା ବାବାଇନିଃ ହର୍ହୟରାଃ ହନ୍ତେକଡ଼ା ଉଜିୟେଲ୍‌ ବାଇକେଦାଏ। ଓଡ଼ୋଃ ଏଟାଃ ହିସାକେ ବୁଗିନ୍‌ସହାନ୍‌ ଜିନିଷ୍‌କ ବାବାଇନିଃ ହନାନିୟ ବାଇକେଦାଏ, ଇନିଃ ଚାକାର୍‌ ପାଚ୍‌ରି ଜାକେଦ୍‌ ଯୀରୁଶାଲେମ୍‌କେ କେଟେୟାନ୍‌ଗି ବାଇକେଦାଏ।

9 ଏନ୍‌ ତାୟମ୍‌ତେ ଯୀରୁଶାଲେମ୍‌ ପାର୍‌ଗାନ୍‌ରେୟାଃ ଆଧା ହିସାକେ ରାଇଜ୍‌ତାନ୍‌ ହାକିମ୍‌ ହୁର୍‌ଆଃ ହନ୍ତେକଡ଼ା ରଫାୟ ବାଇକେଦାଏ।

10 ଏନ୍ତେ ହରୁମ୍‌ଫରାଃ ହନ୍ତେକଡ଼ା ଯିଦାୟ ଆୟାଃ ଅଡ଼ାଃ ସାମ୍‌ନାଙ୍ଗ୍‌ତାଃ ବାଇକେଦାଏ। ଏଟାଃ ହିସା ହଶ୍‌ବନିୟରାଃ ହନ୍ତେକଡ଼ା ହଟୁଶ୍‌ ବାଇକେଦାଏ।

11 ଏଟାଃ ହିସା ଓଡ଼ୋଃ ଭାଟିଗାଡ଼୍‌କେ ହାରିମ୍‌ରାଃ ହନ୍ତେକଡ଼ା ମଲ୍‌କିୟ ଓଡ଼ୋଃ ପହତ୍‌ ମୋୟାବ୍‌ରାଃ ହନ୍ତେକଡ଼ା ହଶୁବ୍‌ ବାଇକେଦାଏ।

12 ଏନ୍ତେ ଯୀରୁଶାଲେମ୍‌ ପାର୍‌ଗାନ୍‌ରାଃ ଆଧା ହିସାକେ ରାଇଜ୍‌ତାନ୍‌ ହାକିମ୍‌ ହଲୋହେଶରାଃ ହନ୍ତେକଡ଼ା ଶଲ୍ଲୁମ୍‌ ଓଡ଼ୋଃ ଆୟାଃ ହନ୍‌କୁଡ଼ିକ ବାଇକେଦାକ।

13 ହାନୁନ୍‌ ଓଡ଼ୋଃ ସାନୋହରେ ତାଇନ୍‌ତାନ୍‌ ହଡ଼କ ପିଡ଼ିରେୟାଃ ମାରାଙ୍ଗ୍‌ ଦୁହାର୍‌ ବାଇକେଦାକ। ଇନ୍‌କୁ ଏନା ବାଇକେଦାକ ଓଡ଼ୋଃ ଏନାରେୟାଃ ଟାଟି, ସିକିଡ଼ି ଓଡ଼ୋଃ ଅର୍ଗଡ଼୍‌ ସବେନାଃ ଲାଗାଅକେଦାକ। ଏନ୍ତେ ଗୁରିଃକ୍‌ ଗାଡ଼ାରାଃ ଦୁହାର୍‌ ଜାକେଦ୍‌ ୪୫୦ ମିଟର୍‌ ପାଚ୍‌ରି ବାଇକେଦାକ।

14 ବେଥ୍‌ ହକ୍‌କେରମ୍‌ ପାର୍‌ଗାନ୍‌ରେନ୍‌ ହାକିମ୍‌ ରେଖବ୍‌ରାଃ ହନ୍ତେକଡ଼ା ମଲ୍‌କିୟ ଗୁରିଃକ୍‌ଗାଡାରାଃ ଦୁହାର୍‌ ବାଇକେଦାଏ। ଇନିଃ ଏନା ବାଇକେଦ୍‌ତେ ଟାଟି, ସିକିଡ଼ି ଅର୍ଗଡ଼୍‌ ସବେନ୍‌ ଲାଗାଅକେଦାଏ।

15 ମିସ୍‌ପା ପାର୍‌ଗାନ୍‌ରେନ୍‌ ହାକିମ୍‌ କଲ୍‌ହୋଷିରାଃ ହନ୍ତେକଡ଼ା ଶଲ୍ଲୁନ୍‌ ଲିଙ୍ଗିୟଃତାନ୍‌ ଦୁହାର୍‌ ବାଇକେଦ୍‌ତେ, ଏନ୍‌ ଚେତାନ୍‌ରେ ଢାଲାଇକେଦାଏ, ଏନ୍ତେ ଇନିଃ ଚାଉଖାଟ୍‌ ଲାଗାଅକେଦ୍‌ତେ ଟାଟି, ସିକିଡ଼ି ଓଡ଼ୋଃ ଅର୍ଗଡ଼୍‌ ସବେନ୍‌ ଲାଗାଅକେଦାଏ। ଓଡ଼ୋଃ ରାଜାରାଃ ବାଗାଇଚା ହେପାଦ୍‌ରାଃ ଶେଲା ପୋଖେରାରାଃ ପାଚ୍‌ରି ବାଇକେଦ୍‌ତେ ଦାଉଦ୍‌ ନାଗାର୍‌ଏତେ ଲାତାର୍‌ ଆଡ଼୍‌ଗୁନ୍‌ ସିଢ଼ି ଜାକେଦ୍‌ ବାଇକେଦାଏ।

16 ନେଆଁରାଃ ହେପାଦ୍‌ ହିସାକକେ ବେଥ୍‌ସୁର୍‌ ପାର୍‌ଗାନ୍‌ରେୟାଃ ଆଧା ହିସା ରାଇଜ୍‌ତାନ୍‌ ହାକିମ୍‌ ଅସ୍‌ବୁକ୍‌ରାଃ ହନ୍ତେକଡ଼ା ନିହିମିୟା, ଦାଉଦ୍‌ରାଃ ତପାଗାଡ଼ା ହେପାଦ୍‌ରାଃ ଠାୟାଦ୍‌, ଦାଆଃ ଭାଣ୍ଡାର୍‌ ଓଡ଼ୋଃ ପେଡ଼େୟାନ୍‌ ହଡ଼କଆଃ ଅଡ଼ାଃ ଜାକେଦ୍‌ ବାଇକେଦାଏ।

17 ଏନ୍‌ ତାୟମ୍‌ତେ ବାନିରାଃ ହନ୍ତେକଡ଼ା ରେହୁମ୍‌ଆଃ ଆକ୍‌ତେୟାର୍‌ରେ ଲେବୀ ହଡ଼କ ପାଚ୍‌ରିରାଃ ଏଟାଃ ହିସାକ ବାଇକେଦା। ଆୟାଃ ହେପାଦ୍‌ରାଃ ହିସା କେୟିଲା ପାର୍‌ଗାନ୍‌ରାଃ ଆଧା ହିସା ରାଇଜ୍‌ତାନ୍‌ ହାକିମ୍‌ ହଶ୍‌ବିୟ ଆୟାଃ ପାର୍‍ଗାନ୍‌ସାଃଏତେ ବାଇକେଦା।

18 ଏନ୍ତେ କେୟିଲା ପାର୍‌ଗାନ୍‌ରାଃ ଏଟାଃ ଆଧା ହିସା ରାଇଜ୍‌ତାନ୍‌ ହାକିମ୍‌ ହେନାଦାଦ୍‌ରାଃ ହନ୍ତେକଡ଼ା ବବୟ ବାଇକେଦାଏ।

19 ଇନିୟାଃ ତାୟମ୍‌ତେ ମିସ୍‌ପାରେନ୍‌ ହାକିମ୍‌ ଯେଶୁୟରାଃ ହନ୍ତେକଡ଼ା ଏସର୍‌, ହାଁତେୟାର୍‌ ଦହ ଅଡ଼ାଃ ହେପାଦ୍‌ଏତେ କଚା ଜାକେଦ୍‌ ବାଇକେଦାଏ।

20 ଇନିୟାଃ ତାୟମ୍‌ତେ ସକ୍‌କୟରାଃ ହନ୍ତେକଡ଼ା ବାରୁକ୍‌, ଚିହୁଲ୍‌ଲାନ୍‌ଗି ପାଚ୍‌ରିରାଃ କଚାଏତେ ଇଲିୟାଶିବ୍‌ ମାରାଙ୍ଗ୍‌ ଯାଜାକ୍‌ରାଃ ଅଡ଼ାଃ ଦୁହାର୍‌ ଜାକେଦ୍‌ ବାଇକେଦାଏ।

21 ଇନିୟାଃ ତାୟମ୍‌ତେ ହକୋସ୍‌ରାଃ ଜାଇହନ୍‌ ମରେମୋତ୍‌, ଚାଏ ଉରିୟରାଃ ହନ୍ତେକଡ଼ା, ଇଲିୟାଶିବ୍‌ରାଃ ଅଡ଼ାଃ ଦୁହାର୍‌ତାଃଏତେ ଅଡ଼ାଃରାଃ ଟୁଣ୍ଡୁ ଜାକେଦ୍‌ ପାଚ୍‌ରି ବାଇକେଦାଏ।

22 ଇନ୍‌କୁଆଃ ତାୟମ୍‌ତେ ଯୀରୁଶାଲେମ୍‌ ହେପାଦ୍‌ରେ ତାଇନ୍‌ତାନ୍‌ ଯାଜାକ୍‌କ ପାଚ୍‌ରି ବାଇକେଦାକ।

23 ଇନ୍‌କୁଆଃ ତାୟମ୍‌ତେ ବେଞ୍ଜାମିନ୍‌ ଓଡ଼ୋଃ ହଶୁବ୍‌ ଆକିନାଃ ଅଡ଼ାଃ ସାମ୍‌ନାଙ୍ଗ୍‌ତାଃ ବାଇକେଦାକିନ୍‌। ଇନ୍‌କିନାଃ ତାୟମ୍‌ତେ ଅସରିୟ ଆୟାଃ ଅଡ଼ାଃ ହେପାଦ୍‌ତାଃରାଃ ପାଚ୍‌ରି ବାଇକେଦାଏ। ଇନିଃ ଅନନୀୟାରାଃ ଜାଇହନ୍‌ ଓଡ଼ୋଃ ମାସେୟରାଃ ହନ୍ତେକଡ଼ା ତାଇକେନାଏ।

24 ଇନିୟାଃ ତାୟମ୍‌ତେ, ହେନାଦାଦ୍‌ରାଃ ହନ୍ତେକଡ଼ା ବେନୁୟି, ଅସରିୟରାଃ ଅଡ଼ାଃତାଃଏତେ ପାଚ୍‌ରିରାଃ ବିହୁରାକାନ୍‌ କଚା ଜାକେଦ୍‌ ବାଇକେଦାଏ।

25 ଏନ୍ତେ ଉଷୟରାଃ ହନ୍ତେକଡ଼ା ପାଲାଲ୍‌ ପାଚ୍‌ରିରାଃ କଚାଏତେ ହର ଠାୟାଦ୍‌ ହେପାଦ୍‌ ରାଜାରାଃ ମାହାଲ୍‌ରେୟାଃ ଚେତାନ୍‌ ଗାଡ଼୍‌ ଜାକେଦ୍‌ ପାଚ୍‌ରି ବାଇକେଦାଏ। ଇନିୟାଃ ତାୟମ୍‌ତେ, ପାରୋଶ୍‌ରାଃ ହନ୍ତେକଡ଼ା ପଦାୟ ପାଚ୍‌ରି ବାଇକେଦାଏ। 26 ଓଫେଲ୍‌ରେ ତାଇନ୍‌ତାନ୍‌ ବିନ୍ତିଅଡ଼ାଃ ସୁସାର୍‌ତାନ୍‌ ହଡ଼କ ସିଙ୍ଗିତୁରଃସାଃରେୟାଃ ଦାଆଃ ଦୁହାର୍‌ ଓଡ଼ୋଃ ଚେତାନ୍‌ରେୟାଃ ଗାଡ଼୍‌ ହେପାଦ୍‌ ଜାକେଦ୍‌ ପାଚ୍‌ରିରାଃ କାମି ଟୁଣ୍ଡୁକାଦ୍‌ ତାଇକେନାକ।

27 ଏନ୍ତେ ତେକୋୟାରେନ୍‌ ହଡ଼କ ଚେତାନ୍‌ରେୟାଃ ମାରାଙ୍ଗ୍‌ ଗାଡ଼୍‌ ହେପାଦ୍‌ଏତେ ଓଫେଲ୍‌ରାଃ ପାଚ୍‌ରି ଜାକେଦ୍‌ ବାଇକେଦାକ।

28 ଯାଜାକ୍‌କ ଆପ୍‌ନାଃ ଅଡ଼ାଃ ହେପାଦ୍‌ରାଃ ହିସା ଚାଏ ସାଦମ୍‌ ଦୁଆର୍‌ରାଃ ଚେତାନ୍‌ ହିସାରାଃ ପାଚ୍‌ରି ବାଇକେଦାକ।

29 ଇନ୍‌କୁଆଃ ତାୟମ୍‌ତେ, ଇମ୍ମେର୍‌ରାଃ ହନ୍ତେକଡ଼ା ସାଦୋକ୍‌ ଆୟାଃ ଅଡ଼ାଃ ସାମ୍‌ନାଙ୍ଗ୍‌ରାଃ ପାଚ୍‌ରି ବାଇକେଦାଏ। ଏନ୍‌ ତାୟମ୍‌ତେ ପୁରାବ୍‌ସାଃରାଃ ଦୁଆର୍‌ ଶିଖନିୟରାଃ ହନ୍ତେକଡ଼ା ଶମୟିୟ ପାଚ୍‌ରି ବାଇକେଦା।

30 ଇନିୟାଃ ତାୟମ୍‌ତେ, ଶେଲିମିୟରାଃ ହନ୍ତେକଡ଼ା ହନାନିୟ ଓଡ଼ୋଃ ସାଲଫର୍‌ରାଃ ତୁରିୟାହନ୍‌ ହାନୁନ୍‌ ଏଟାଃ ହିସାରାଃ ପାଚ୍‌ରି ବାଇକେଦାକିନ୍‌। ଇନ୍‌କିନାଃ ତାୟମ୍‌ତେ, ବେରିଖିୟରାଃ ହନ୍ତେକଡ଼ା ମଶୁଲ୍ଲମ୍ ଆୟାଃ ତାଇନଃ ଅଡ଼ାଃ ସାମ୍‌ନାଙ୍ଗ୍‌ରାଃ ପାଚ୍‌ରି ବାଇକେଦାଏ।

31 ଇନିୟାଃ ତାୟମ୍‌ତେ, ସୋନା ବାବାଇନିଃ ମଲ୍‌କିୟ, ବିନ୍ତିଅଡ଼ାଃ ସୁସାର୍‌ତାନ୍‌କଆଃ ଓଡ଼ୋଃ କିରିଙ୍ଗ୍‌ଆଖ୍‌ରିଙ୍ଗତାନ୍ କଆଃ ଅଡ଼ାଃ ଜାକେଦ୍‌, ଅକ୍‌ନାଃଚି ହମିପ୍‌କଦ୍‌ ଦୁହାର୍‌ ସାମ୍‌ନାଙ୍ଗ୍‌ଏତେ ପାଚ୍‌ରି କଚାରାଃ ଚେତାନ୍‌ ରାକାବ୍‌ ଜାକେଦ୍‌ ପାଚ୍‌ରି ବାଇକେଦାଏ। 32 ପାଚ୍‌ରି କଚାରାଃ ଚେତାନ୍‌ ରାକାବ୍‌ଏତେ ମିଣ୍ଡିକଆଃ ଗୋଟ୍‌ ଦୁହାର୍‌ ଜାକେଦ୍‌ ତାଇକାନ୍‌ ହିସା, ସୋନା ବାବାଇକ ଓଡ଼ୋଃ କିରିଙ୍ଗ୍‌ଆଖ୍‌ରିଙ୍ଗତାନ୍ ହଡ଼କ ପାଚ୍‌ରି ବାଇକେଦାକ।