1 Toma Suyu'u Lo-lomu* ma dara Ma JOU 'o 'aro'o re 'O kanau ra Musa ma betongo so'o ne: 2 << Siajele toma ngowa'a Israel re no kanau ra ananga so'o ne: Na'o matengo i'a taninga sigolona mau 'o sidoa'a jou-jou ra Ma JOU, unanga balasu 'o gasa jou-jou haiwani bae sapi, bae doba bolo 'abingi tai duo-duo sa'olo 'ai jou-jou.

3 <<Na'o 'ai jou-jou gena-ge sa'olo jou-jou tau'u, enanga 'o sapi. Unanga balasu 'o sidoa'a sapi ma nau'u re ma lese lolara. Sapi gena-ge unanga balasu 'a sigasa toma Suyu'u Lo-lomu ma ngalana ma da-daku ma biono, la Ma JOU nyengara 'o dawongo unanga gena-ge. 4 Gena ḏua, unanga balasu 'o siteru 'ai giama toma sapi ma nau'u gena-ge sa'olo jou-jou tau'u. Re Ma JOU 'o dawongo jou-jou tau'u gena-ge, la unanga dadunu 'o dadi marimoi moju ra Ma JOU. 5 Pasala i'a sapi ma nau'u gena-ge unanga balasu 'a sitola'a toma Suyu'u lo-lomu ma ngalana ma da-daku ma biono re 'imam-'imam, gena-ge 'a Harun 'ai ngowa-ngowa'a nau'u, ananga 'aḏi gasa ngaunu gena-ge re 'aḏi siajala toma jou-jou tau'u ma ngi'i ma ḇuḇuku rata ma gagoro; enanga gena-ge toma Suyu'u Lo-lomu ma ngalana ma da-daku ma biono. 6 Togumu i'a, jou-jou tau'u unanga balasu 'a wati'i enanga ma eno'o re 'a tola-tola'a sapi gena-ge mete'e enanga ma balangu. 7 'Imam na-nau'u matengo ra Harun 'ai ju'uda, unanga balasu 'o 'a'a u'u re 'a silejanga toma jou-jou tau'u ma ngi'i, re 'o sifato ate tau'u toma u'u ma re'u. 8 Re unanga balasu 'o sifato haiwani ma sae'e, ma gaji re ḏi'i ma balangu ma lelegu toma ate tau'u ma re'u ga'a leja-lejanga toma jou-jou ma ngi'i. 9 Mada'a unanga gena-ge balasu 'o soso'o ma po'olo ma dara re ma busuu'u, 'imam 'a tau'u mo-moini toma jou-jou ma ngi'i ma re'u ma tero sa'olo jou-jou tau'u, gena-ge jou-jou ngo-ngoromo rema bounu ga'a sisanangi Ma JOU 'ai 'akala re sinyingara.

10 Na'o 'ai jou-jou gena-ge sa'olo jou-jou tau'u, enanga 'o doba bolo 'abingi toma duo-duo. Unanga gena-ge balasu 'o gasa ma nau'u re ma lese lolara, 11 re unanga gena-ge balasu 'a tola'a toma jou-jou ma ngi'i papolo kore mie re 'imam-'imam, gena-ge 'a Harun 'ai ngowa'a nau'u, ananga balasu ya siajala ma ngaunu toma jou-jou ma ngi'i ma ḇuḇuku rata ma gagoro. 12 Unanga 'a tola-tola'a haiwani gena-ge mete'e enanga ma balangu. Enanga gena-ge rema sae'e re ma gaji, 'imam 'a sifato toma ate ma re'u ga'a 'i leja-lejanga toma jou-jou ma ngi'i ma re'u. 13 Mada'a unanga balasu 'a soso'o ma po'olo ma dara re ma busuu'u reo ḇanyo. Ḏua 'imam ya sidoa'a mo-moini sa'olo jou-jou, re 'a tau'u mo-moini toma jou-jou ma ngi'i. Jou-jou gena-ge sa'olo jou-jou tau'u, gena-ge jou-jou ngo-ngoromo rema bounu ga'a sisanangi Ma JOU 'ai 'akala re sinyingara.

14 Na'o 'ai jou-jou gena-ge sa'olo jou-jou tau'u, enanga 'o namo-namo diwanga, unanga balasu 'o gasa namo-namo dara, bolo namo-namo pombo. 15 Re 'imam balasu 'o gasa namo gena-ge toma jou-jou tau'u ma ngi'i, ya wiri'iti ma camala re 'a tau'u ma sae'e toma jou-jou ma ngi'i. Namo gena-ge ma ngaunu 'a ti'ini sisupu toma jou-jou ma ngi'i ma gagoro. 16 Ma jolo'oro rema ga-gale, unanga balasu 'a sisupu kara upa'a toma jou-jou ma ngi'i papolo wangere ma la'o toma korou'u ma ngi'i. 17 Togumu i'a namo gena-ge 'imam balasu 'a gu'u ma kalatu'u re 'o taba'a re 'a 'acingi singadolo namo ma katere gena-ge poti mada'a tola'a ua. Ḏua, unanga 'a tau'u toma u'u ma re'u toma jou-jou ma ngi'i. Jou-jou gena-ge jou-jou tau'u, gena-ge jou-jou ngo-ngoromo rema bounu ga'a sisanangi Ma JOU 'ai 'akala re sinyingara.>>