'IMAMAT 15

Najis toma manusia

1 Ma JOU 'o kanau ra Musa re Harun ma betongo so’o ne: 2 <<Siajele toma ngowa’a Israel so’o ne: Na’o na-nau’u matengo 'ai dalaḏi 'i siḏi singadolo 'i supu ḇo-ḇoanga; enanga gena-ge 'i najis. 3 Dadi gena-ge mete’e Ma JOU 'ai 'atoranga nena-ne: Bae ḇo-ḇoanga gena-ge 'i supu tau-taunu bae 'i supu yoḏu’u; ḇo-ḇoanga gena-ge 'i najis. Dadi unanga ḏi’i 'o dadi najis. 4 Jingi’i mo-moini ga’a unanga gena-ge 'a otu bolo ngi’i ga’a unanga 'a maḏegoro, mo-moini gena-ge 'i dadi najis. 5 Re 'a guna ḇato 'o cigi unanga gena-ge 'ai jingi’i, ananga balasu 'aḏi 'uju manga pakeanga re ma’ori’i reo ḇanyo, mada’a ananga gena-ge 'aḏi najis moju singadolo wangere jala. 6 Re 'a guna ḇato 'o maḏegoro toma 'oru ḇato ga’a unanga gena-ge 'a maḏegoro ḏua, ananga balasu 'aḏi 'uju manga pakeanga re ma’ori’i reo ḇanyo, mada’a ananga gena-ge 'aḏi najis moju singadolo wangere jala. 7 Re 'a guna ḇato 'o cigi unanga gena-ge 'ai lese ga’a 'i sisupu ḇo-ḇoanga, ananga balasu 'aḏi 'uju manga pakeanga re ma’ori’i reo ḇanyo, mada’a ananga gena-ge 'aḏi dadi najis singadolo wangere jala. 8 Re na’o ngowa’a ga’a 'ai lese 'i sisupu ḇo-ḇoanga, unanga gena-ge 'o obi’i toma ngowa’a matengo i’a ga’a 'ofi ra Ma JOU 'ai momina, ngowa’a gena-ge balasu 'o 'uju 'ai pakeanga re ma’ori’i reo ḇanyo, mada’a ananga gena-ge 'aḏi dadi najis singadolo wangere jala. 9 Ḇelero ma ba-bangini toma jarana ma ḏuḏunu ga’a ngowa’a ga’a 'ai lese 'i sisupu ḇo-ḇoanga ga’a unanga gena-ge 'a maḏegoro, enanga 'i dadi najis. 10 'A guna ḇato 'a cigi 'ori i’a ga’a unanga 'a maḏegoro, ananga 'aḏi dadi najis singadolo wangere jala. Re 'a guna ḇato 'o tede 'ori i’a ga’a unanga 'a ḏegoro gena-ge, ananga balasu 'a 'uju manga pakeanga re ma’ori’i, mada’a ananga 'aḏi dadi najis moju singadolo wangere jala. 11 Na’o unanga ga’a 'o sisupu ḇo-ḇoanga, 'a soso’o 'ai giama nyangu reo ḇanyo, kara 'o cigi ngowa’a ma lelegu, ngowa’a ga’a sanga cigi, balasu 'o 'uju 'ai pakeanga re 'o ma’ori’i, mada’a unanga gena-ge 'o dadi najis moju singadolo wangere jala. 12 Giu’u tana’a ga’a ngowa’a 'o sisupu ḇo-ḇoanga gena-ge 'a cigi, ananga balasu ya suka, reo pakakasa ga’a 'i si’a’a reo ate ga’a unanga 'a cigi, ananga balasu ya soso’o reo ḇanyo.

13 Na’o ngowa’a matengo ga’a sisupu ḇo-ḇoanga riwara, unanga balasu 'o totoma ma di’ara wangere tumudingi, la sitantukanga si-siḏi gena-ge mode-mode’e 'i iranga. Togumu i’a, unanga balasu 'o 'uju 'ai pakeanga, re 'o ma’ori’i toma ḇanyo ma la’o, dadi unanga 'o dadi 'ofi ra Ma JOU 'ai momina. 14 Toma wangere ma soi tu’angere, unanga balasu 'a gasa namo dara romoḏiḏi re namo pombo romoḏiḏi, toma 'imam ga’a toma Suyu’u Lo-lomu ma ngalana ma da-daku ma biono. 15 'Imam balasu 'o pake namo diwanga rimoi sa’olo jou-jou di’a sigofi ngowa’a ra Ma JOU 'ai momina re rimoi ḏi’i sa’olo jou-jou tau’u sababu si-siḏi sisupu ḇo-ḇoanga ri iranga. Rema duhu gena-ge 'imam 'o si’a’a unanga gena-ge dadunu 'o marimoi moju ra Ma JOU.

16 Na’o na-nau’u matengo 'ai ḇa-ḇanyo 'i pa’ala, unanga balasu ma’ori’i singadolo 'ofi reo ḇanyo, mada’a unanga 'o dadi najis moju singadolo wangere jala. 17 Ḇa’a bolo haiwani ma eno’o ga’a ḇa-ḇanyo gena-ge ya nga’unu, unanga balasu 'a 'uju mada’a enanga gena-ge 'i dadi najis moju singadolo wangere jala. 18 Na’o na-nau’u matengo re we-were’a matengo 'o otu malomu re 'age 'ai ḇa-ḇanyo 'i 'uisi ra munanga 'ami lese ma dara, bae we-were’a bae na-nau’u, balasu 'aḏi ma’ori’i mada’a ananga 'aḏi dadi najis moju singadolo wangere jala.

19 Were’a matengo maoḏi’i 'ami ngara, munanga mo dadi najis ma di’ara wangere tumudingi. 'A guna ḇato 'o cigi munanga, ananga 'aḏi dadi najis singadolo wangere jala. 20 'Oru ḇato ga’a we-were’a gena-ge m ma otu bolo ma ḏegoro wakutu mo maoḏi’i 'ami ngara, enanga gena-ge 'i dadi najis. 21 Re 'a guna ḇato ga’a cigi jingi’i ga’a munanga gena-ge mo otu, ananga balasu ya 'uju manga pakeanga re ma’ori’i, mada’a ananga gena-ge 'aḏi dadi najis moju singadolo wangere jala. 22 Re 'a guna ḇato ga’a cigi ngi’i ga’a munanga gena-ge ma ḏegoro, ananga balasu ya 'uju manga pakeanga re ma 'ori’i, mada’a ananga 'aḏi dadi najis moju singadolo wangere jala. 23 Bae 'ami jingi’i bolo 'oru ḇato ga’a munanga gena-ge ma ḏegoro, na’o ananga ya cigi, ananga 'aḏi dadi najis moju singadolo wangere jala. 24 Na’o na-nau’u matengo 'o otu ma lomu we-were’a ga’a maoḏi’i 'ami ngara, unanga 'o dadi najis singadolo wangere tumudingi. Re jingi’i mo-moini ga’a unanga 'a otu mai najis.

25 Na’o 'orasa we-were’a matengo mo ma oḏi’i 'ami ngara togumu i’a, 'ami ngaunu 'i supu moju, bolo munanga 'ami ngaunu 'i pa’ala 'orasa mo maoḏi’i 'ami ngara nyangu; 26 jingi’i mo-moini ga’a munanga ma otu, bolo ngi’i mo-moini ga’a ma ḏegoro 'orasa 'ami ngaunu pa’ala, enanga gena-ge 'i dadi najis ma tero sa’olo 'orasa maoḏi’i 'ami ngara. 27 'A guna ḇato ga’a 'o cigi ngi’i gena-ge ananga 'aḏi dadi najis, re balasu 'aḏi manga 'uju manga pakeanga re ma’ori’i, mada’a ananga 'aḏi najis moju singadolo wangere jala. 28 Mada’a na’o nga’unu 'i pa’ala togumu ḏua toma 'orasa ma oḏi’i 'ami ngara ua, munanga balasu mo totoma wangere tumudingi moju. Na’o 'orasa gena-ge togumu ḏua nga’unu 'i pa’ala ua ḏi’i, munanga remo dadi 'ofi ra Ma JOU 'ai momina. 29 Toma wangere ma soi tu’angere munanga balasu mo gasa namo pombo romoḏiḏi bolo namo dara romoḏiḏi toma 'imam toma Suyu’u Lo-lomu ma ngalana ma da-daku ma biono. 30 'Imam balasu 'o pake namo rimoi sa’olo jou-jou di’a sigofi ngowa’a ra Ma JOU 'ai momina re rimoi ḏi’i sa’olo jou-jou tau’u sababu 'ami nga’unu 'i pa’ala si’a’a munanga mo dadi najis moju ra Ma JOU 'ai momina. Rema duhu gena-ge 'imam 'o si’a’a munanga gena-ge dadunu mo dadi marimoi moju ra Ma JOU .

31 Ma JOU 'o soma’a 'a Musa re Harun, ananga gena-ge 'aḏi si’elingi bangsa Israel, la ya totoho mode-mode’e ananga 'aḏi dadi najis bolo 'ofi ra Ma JOU 'ai momina. Sababu na’o ananga 'aḏi si’a’a najis Suyu’u Lo-lomu ga’a tegoro ra ananga manga sigolona, tantu ḏua ananga ḏuanga i’a 'aḏi sengene.

32 Enanga ma 'atoranga di’a na-nau’u matengo ga’a 'o supu ḇo-ḇoanga 'ai ḇa-ḇanyo 'i pa’ala, singadolo unanga 'o dadi najis. 33 Re di’a we-were’a ga’a mo supu nga’unu bae 'orasa maoḏi’i 'ami ngara bolo ua re na-nau’u bolo we-were’a ga’a sisupu 'oru ḇato ga’a 'i si’a’a ananga 'aḏi dadi najis re ḏi’i na-nau’u ga’a 'o otu malomu toma we-were’a ga’a remo dadi najis .