1 Ma JOU 'o kanau ra Musa ma betongo so'o ne: 2 <<Nena-ne 'atoranga-'atoranga ga'a 'i siḏagi toma wangere ma sigofi, la 'imam nyengara 'o siajele toma ngowa'a ga'a sanga si-siḏi eno'o mangale unanga gena-ge 'o dadi 'ofi moju. Ngowa'a gena-ge balasu 'o sigasa i'a toma 'imam, 3 re 'Imam 'o gasa unanga gena-ge sisupu toma suyu'u ma daeraha di'a 'u disa waro. Na'o mete'e 'imam 'ai 'akala ma sanga, si-siḏi eno'o gena-ge 'i iranga toma ngowa'a ga'a sanga si-siḏi eno'o, dadi unanga ro la. 4 Ḏua 'imam 'o soma'a ngowa'a ma lelegu 'aḏi gasa namo diwanga ga'a 'ahu-'ahu romoḏiḏi ga'a 'ofi ra Ma JOU 'ai momina reo ate aras poti moi re lawe ko-kolili ngai moi re ate hisop jaga moi, mo-moini gena-ge di'a ngowa'a ga'a ḏuanga i'a 'o sigofi. 5 Re 'imam 'o soma'a ananga 'aḏi tola'a namo rimoi toma giu'u tana'a ma re'u ga'a siromanga reo ḇanyo 'ofi toma ḇanyo ma la'o ino, la ma ngaunu gena-ge 'i singosama toma ḇanyo gena-ge. 6 Namo diwanga rimoi ma lelegu ga'a 'ahu-'ahu moju reo ate aras, re lawe ko-kolili, re hisop jaga moi, 'imam balasu 'a sitono mo-moini toma ḇanyo ga'a 'uisi ma namo ma ngaunu 'i singosama nange-ge. 7 'Imam ya siji-jiri soi tumudingi toma ngowa'a ga'a ḏuanga i'a 'o sigofi toma si-siḏi eno'o. Gena ḏua, 'imam ḏuanga i'a 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga ro dadi 'ofi ra Ma JOU 'ai momina, kara namo diwanga ga'a ya tola'a ua sieanga enanga 'i soloro.

8 Gena ḏua, ngowa'a gena-ge ga'a ḏuanga i'a 'o sigofi, unanga balasu 'o 'uju 'ai pakeanga, ḇukuku 'ai utu re 'ai gogo tai lese mo-moini re ma'ori'i. Rema duhu gena-ge unanga ro dadi 'ofi ra Ma JOU 'ai momina. Unanga nyengara 'o osama suyu'u ma daeraha, mada'a nga'unu ua 'o osama tai suyu'u masiretene re balasu 'o tegoro tai suyu'u ma ḏuḏunu ma di'ara wangere tumudingi. 9 Toma wangere ma soi tumudingi ngowa'a gena-ge balasu 'o ḇukuku 'ai utu tai sae'e soi moi moju, 'ai kukumu, 'ai guru utu, re 'ai gogo mo-moini tai lese soi moi moju. Gena ḏua ngowa'a gena-ge balasu 'a 'uju 'ai pakeanga soi moju re ma'ori'i soi moi moju. Rema duhu gena-ge unanga 'o dadi 'ofi ra Ma JOU 'ai momina.

10 Toma wangere ma soi tu'angere ngowa'a gena-ge balasu 'o gasa doba ma nau'u ma ngowa romoḏiḏi ga'a ma lese lolara re doba ma were'a rimoi ga'a ma 'umuru musungu rimoi ga'a ma lese lolara, re ḏi'i gulupungu kilo ro'ange ga'a sicapuru reo goroho zaitun sa'olo jou-jou ngo-ngoromo re goroho zaitun litere rimoi ma balangu moi toma balangu ro'ange. 11 Ḏua, 'imam ga'a ḏuanga i'a 'o sigofi ngowa'a gena-ge, unanga 'u gasa ngowa'a simete'e re 'ai jou-jou gena-ge toma Suyu'u Lo-lomu ma ngalana ma da-daku ma biono. 12 'Imam balasu 'a 'oro doba ma nau'u rimoi di'a sidoa'a sa'olo jou-jou ngali rugi sirimoi rema goroho zaitun litere rimoi ma balangu moi toma balangu ro'ange, kara 'a sitede ie mo-moini di'a sijumu mangale jou-jou gena-ge di'a Ma JOU. 13 Doba ma ngowa gena-ge balasu 'a tola'a toma ngi'i ga'a siwola i'a ḏua di'a tola'a doba-doba sa'olo jou-jou tau'u re jou-jou di'a sigofi ngowa'a ra Ma JOU 'ai momina ḏi'i. Doba gena-ge balasu sitola'a toma ngi'i gena-ge, sababu jou-jou ngali rugi re jou-jou di'a sigofi ngowa'a ra Ma JOU 'ai momina, gena-ge ma balangu ga'a siwola i'a sa'olo 'ofi-'ofi madutu di'a 'imam. 14 Gena ḏua, 'imam balasu 'a 'oro doba ma ngaunu ceka'a ua toma jou-jou ngali rugi, kara 'a si'ese toma ngowa'a gena-ge ga'a ḏuanga i'a 'o sigofi: tai ngau'u ma kuwiḏa ma gogolete, tai giama ma kuwiḏa ma tuḇulelara re tai rou ma kuwiḏa ma tuḇulelara. 15 Pasala i'a, 'imam 'o 'oro goroho zaitun litere rimoi ma balangu moi toma balangu ro'ange, re 'a side-dege ceka'a ua tai giama ma sata ma kuḇali, 16 kara 'imam 'a sitono 'ai giama ma kuwiḏa ma rarag̱a toma goroho zaitun re siji-jiri soi tumudingi toma Suyu'u Lo-lomu ma dara. 17 Gena ḏua, toma goroho zaitun gena-ge ma jingianga toma 'imam 'ai giama ma kuḇali, unanga 'a si'ese ceka'a ua toma doba ma ngaunu toma jou-jou ngali rugi, toma ngowa'a gena-ge ga'a ḏuanga i'a 'o sigofi: tai ngau'u ma kuwiḏa ma gogolete, tai giama ma kuwiḏa ma tuḇulelara re tai rou ma kuwiḏa ma tuḇulelara. 18 Ma goroho gena-ge ma jingianga tai giama balasu 'a si'ese toma ngowa'a gena-ge 'ai sae'e ga'a unanga gena-ge ḏuanga i'a 'o sigofi . Rema duhu gena-ge 'imam 'o si'a'a unanga dadunu 'o dadi marimoi moju ra Ma JOU. 19 Gena ḏua 'imam balasu 'o sidoa'a doba ma were'a sa'olo jou-jou di'a sigofi ngowa'a ra Ma JOU 'ai momina di'a ngowa'a ga'a ḏuanga i'a 'o sigofi tai ga'a ma najis. Rema duhu gena-ge 'imam 'o si'a'a ngowa'a gena-ge 'o dadi marimoi moju ra Ma JOU. Togumu i'a, 'imam balasu 'o tola'a doba ma nau'u ma soi ḏiḏi sa'olo jou-jou tau'u. 20 Re 'imam balasu 'o sidoa'a jou-jou tau'u gena-ge re jou-jou ngo-ngoromo toma jou-jou ma ngi'i ma re'u. Rema duhu gena-ge 'imam 'o si'a'a ngowa'a gena-ge dadunu 'o dadi marimoi moju ra Ma JOU re unanga gena-ge ro dadi 'ofi ra Ma JOU 'ai momina.

21 Mada'a na'o unanga gena-ge ngowa'a ma dinga'unu ua singadolo 'o nga'unu ua sidoa'a jou-jou gena-ge mo-moini, unanga nyengara 'o gasa doba ma nau'u rimoi sa'olo 'ai jou-jou ngali rugi di'a sitede ie di'a sijumu mangale jou-jou gena-ge di'a Ma JOU, la unanga dadunu 'o dadi marimoi moju ra Ma JOU. Re gulupungu kilo moi sicapuru reo goroho zaitun sa'olo jou-jou ngo-ngoromo re goroho zaitun litere rimoi ma balangu moi toma balangu ro'ange; 22 ḏi'i 'oru ga'a unanga nga'unu 'o gasa sa'olo 'ai jou-jou: namo pombo romoḏiḏi bolo namo dara romoḏiḏi. Namo rimoi sa'olo jou-jou di'a sigofi ngowa'a ra Ma JOU 'ai momina re namo rimoi ma lelegu sa'olo jou-jou tau'u. 23 Toma wangere ma soi tu'angere, unanga ga'a 'o mau sigofi 'ai diri ra Ma JOU 'ai momina, unanga gena-ge balasu 'o gasa jou-jou mo-moini toma 'imam ga'a toma Suyu'u Lo-lomu ma ngalana ma da-daku ma biono. 24 'Imam 'a 'oro doba ma ngowa ma nau'u di'a jou-jou ngali rugi re goroho zaitun litere rimoi ma balangu moi toma balangu ro'ange, kara unanga 'a sitede ie di'a sijumu mangale jou-jou di'a Ma JOU. 25 Re 'imam gena-ge balasu 'o tola'a doba ma ngowa ma nau'u sa'olo jou-jou ngali rugi, kara 'o 'oro ma ngaunu ceka'a ua re 'a si'ese toma ngowa'a ga'a ḏuanga i'a 'o sigofi: tai ngau'u ma kuwiḏa, tai giama ma rarag̱a ma tuḇulelara re tai rou ma kuwiḏa ma tuḇulelara. 26 'Imam balasu 'a side-dege goroho zaitun ceka'a ua tai giama ma kuḇali ma sata, 27 re 'ai giama ma kuwiḏa ma rarag̱a 'a siji-jiri goroho gena-ge soi tumudingi toma Suyu'u Lo-lomu ma dara. 28 Ḏua, toma goroho zaitun gena-ge ma jingianga toma 'imam 'ai giama ma kuḇali, unanga 'a si'ese ceka'a ua toma ngi'i 'age doba ma ngaunu toma jou-jou ngali rugi toma ngowa'a gena-ge ga'a ḏuanga i'a 'o sigofi: tai ngau'u ma kuwiḏa ma gogolete, tai giama ma kuwiḏa ma tuḇulelara re tai rou ma kuwiḏa ma tuḇulelara. 29 Goroho ma jingianga gena-ge balasu 'i si'ese toma ngowa'a ga'a ḏuanga i'a 'o sigofi, unanga gena-ge 'ai sae'e. Rema duhu gena-ge 'imam 'o si'a'a unanga gena-ge dadunu 'o dadi marimoi moju ra Ma JOU. 30 Gena ḏua, 'imam balasu 'o sidoa'a 'oru ga'a ngowa'a ga'a ma dinga'unu ua unanga gena-ge nga'unu 'o gasa sa'olo 'ai jou-jou: pombo romoḏiḏi bolo namo dara romoḏiḏi. 31 Rimoi sa'olo jou-jou di'a sigofi ngowa'a ra Ma JOU 'ai momina re rimoi ḏi'i di'a jou-jou tau'u sirimoi reo jou-jou ngo-ngoromo. Ma duhu gena-ge di'a ngowa'a gena-ge ga'a ḏuanga i'a 'o sigofi, la 'imam 'o si'a'a unanga gena-ge dadunu 'o marimoi moju ra Ma JOU. 32 'Atoranga-'atoranga gena-ge di'a ngowa'a ga'a sanga si-siḏi eno'o mada'a unanga gena-ge nga'unu ua 'o gasa jou-jou biasa mete'e 'atoranga di'a sigofi 'ai diri sababu unanga ngowa'a ma dinga'unu ua.

33 Ma JOU 'o kanau ra Musa re Harun ma betongo so'o ne: 34 <<Wakutu ngini ni osama tana'a Kanaan ga'a Ngoi ḏuanga i'a to pula'a ra ngini sa'olo ta ngini, na'o Ngoi to singosama keho toma wala toma tana'a ga'a ta ngini. 35 Gena ḏua, wala ma dutu gena-ge 'o tagi re sapolo kara 'o siajele toma 'imam, <'Age keho ma nana'o tari wala.> 36 Ḏua 'imam 'o tagi re sapolo nyangu di'a parikisa keho ma nana'o toma ngowa'a matengo 'ai wala gena-ge, unanga 'o soma'a ngowa'a 'aḏi sisupu 'oru ḇato ga'a 'age toma wala gena-ge. Na'o so'o gena-ge ua, 'oru ḇato ga'a 'age toma wala ma dara, enanga mo-moini 'i dadi najis ra Ma JOU 'ai momina. Togumu ḏua, 'imam 'o tagi re sapolo di'a disa waro keho ma nana'o toma ngowa'a matengo gena-ge 'ai wala. 37 Re unanga 'o parikisa keho ma nana'o gena-ge. Na'o toma gegelo 'age rema nana'o rema poloḏo-poloḏo ma 'ijo bolo ko-kolili re 'a oḏi'i sa'olo 'i pata toma gegelo dounu, 38 'imam balasu 'a sisoi'i tala wala gena-ge re sidamunu wala gena-ge ma di'ara wangere tumudingi. 39 Ngadolo wangere ma soi tumudingi, 'imam dadunu 'o sapolo moju di'a disa waro. Na'o keho ma nana'o 'i sidogo lebe repe, 40 unanga balasu 'o parenta ngowa'a 'aḏi pia'olo maḏi-maḏi toma gegelo ma lese ga'a 'age keho ma nana'o kara ya upa'a toma limau ma ḏuḏunu toma ngi'i ga'a siwola i'a di'a 'ori i'a ga'a najis. 41 Gena ḏua, 'imam 'o soma'a ngowa'a 'aḏi cafa pelesteran toma gegelo ma lese sigoloḏi toma wala ma dara re ya lomu re upa'a toma limau ma ḏuḏunu toma ngi'i ga'a siwola i'a di'a 'ori i'a ga'a najis. 42 Maḏi-maḏi ga'a ya sisupu singali reo maḏi su-sungi kara singali pelesteran ga'a ya sisupu singali reo pelesteran su-sungi toma gegelo mo-moini.

43 Kalaha maḏi-maḏi gena-ge ri ngali ḏua re ma pelesteran ri su-sungi ḏua, na'o keho ma nana'o dadunu 'i baolo moju, 44 'imam balasu 'o sapolo di'a disa waro wala gena-ge moju. Na'o keho ma nana'o ma dogo repe, keho gena-ge 'i iranga yoḏu'u, wala gena-ge 'i dadi najis. 45 Dadi wala gena-ge ananga balasu ya pia'olo: Maḏi-maḏi, pelesteran, ate-ate mo-moini, ananga balasu ya gasa toma limau ma ḏuḏunu toma ngi'i ga'a siwola i'a di'a 'ori i'a ga'a najis. 46 Sidogo ḏi'i, na'o ngowa'a 'aḏi osama toma wala gena-ge toma 'orasa ya kuci ḏua, ananga gena-ge 'aḏi dadi najis singadolo wangere 'i jala, 47 re na'o ngowa'a 'aḏi otu bolo oromo toma wala gena-ge ma dara, ananga balasu ya 'uju manga pakeanga.

48 Mada'a wakutu 'imam dadunu 'o sapolo moju di'a disa waro, unanga 'o oḏi'i keho ma nana'o 'i cua ḏua toma wala ma dara, wakutu wala gena-ge ananga dadunu ya pelesteran, ḏua 'imam 'o siajele toma wala ma dutu, wala gena-ge ri 'ofi ra Ma JOU 'ai momina, sababu ma nana'o ri cua. 49 Gena ḏua, 'imam balasu 'o 'oro namo diwanga romoḏiḏi ma ceka'a, ate aras, lawe ko-kolili re hisop jaga moi di'a sigofi wala gena-ge. 50 Namo diwanga ma rimoi, unanga balasu ya tola'a toma giu'u tana'a ma re'u ga'a si gare reo ḇanyo 'ofi toma ḇanyo ma la'o ino. 51 Gena ḏua, ate aras, lawe ko-kolili, hisop re namo diwanga ga'a 'ahu-'ahu moju, 'imam balasu ya sitono mo-moini simete'e toma namo diwanga ga'a ri tola'a ma ngaunu ga'a 'i singosama toma ḇanyo 'ofi toma ḇanyo ma la'o. Togumu i'a 'imam balasu ya siji-jiri toma wala soi tumudingi. 52 Rema duhu gena-ge, 'imam balasu sigofi wala gena-ge: gena-ge reo pake namo diwanga ma ngaunu, ḇanyo 'ofi toma ḇanyo ma la'o, namo diwanga ga'a 'ahu-'ahu, ate aras, hisop jaga moi re lawe ko-kolili. 53 Togumu ḏua, namo diwanga ga'a 'ahu-'ahu balasu sieanga 'i sisoloro toma tana'a ga'a loasa toma limau ma ḏuḏunu. Rema duhu gena-ge, 'imam 'o sigofi moju wala gena-ge re wala gena-ge ri dadi 'ofi ra Ma JOU 'ai momina.

54 Gena-ge ma 'atoranga mangale si-siḏi eno'o re la'oro toma sae'e, 55 mangale keho toma baranga bolo wala, 56 mangale roboso, poloḏo-poloḏo re 'o gigianga, 57 la 'imam nyengara 'o sitantukanga 'oru ga'a ma 'ofi ra Ma JOU 'ai momina bolo ma najis: bae ngowa'a bolo baranga. Gena-ge ma 'atoranga mangale si-siḏi mo-moini toma eno'o re keho.>>