1 Ma JOU 'o kanau ra Musa ma betongo so'o ne: 2 <<Siajele toma bangsa Israel mo-moini so'o ne: <Ngini balasu ni 'ofi-'ofi sababu Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso, Ngoi to 'ofi-'ofi. 3 Matengo re matengo balasu 'o silamo'o mode-mode'e 'ai ḇaḇa re ngina, re ni mete'e 'Ari parenta di'a Sabata ma wangere mo-moini: Sababu Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso. 4 Awa ni sicelolo ḏuḏunu Ngoi di'a ni silamo'o re siḏubuso jou'ongu ma somoara. Awa ni 'a'a dulada reo ḇesi. Sababu Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso.

5 Na'o ngini ni tola'a haiwani re na sidoa'a sa'olo jou-jou sababu dadunu ni marimoi moju ra Ma JOU, ngini balasu ni mete'e enanga ma 'atoranga, la ninga jou-jou gena-ge, Ngoi ḏuanga i'a ta dawongo di'a ngini. 6 Ma la-la'eme, ngini balasu na oromo simoini, wangere ma tero haiwani gena-ge na tola'a, bolo da-daini i'a. Mada'a na'o ma la-la'eme gena-ge na oromo nyangu singadolo wangere ma soi ro'ange, balasu tau'u simoini. 7 Na'o la-la'eme gena-ge ngini na oromo toma wangere ma soi ro'ange, enanga gena-ge 'i emo-emono ra Ngoi 'ari momina. Dadi ninga jou-jou gena-ge, Ngoi ta dawongo ua di'a ngini. 8 'A guna 'a oromo ma la-la'eme gena-ge, unanga masiretene ḏuanga i'a 'o doiti ma hukumana di'a 'ai ga'a ma rapu. Sababu unanga 'o 'a'a najis 'oru ga'a ri siwola i'a di'a Ngoi, Ma JOU. Unanga gena-ge ḏuanga i'a sisupu toma ngowa'a Israel manga sigolona.

9 Na'o ngini ni ma gutu'u, awa ni 'utu'u gandum ga'a 'i konyo taninga guḏa ma di'anga, re awa ni siḏibo di'a lomu gandum ga'a ri eta'a tala. 10 Awa ni 'oro singadolo moini 'anggur ma sowo'o, re ma durono na lomu awa. Sieanga i'a di'a ngowa'a ma dinga'unu ua re ngowa'a tagi-tagi ino. Sababu Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso. 11 Awa ngini to-tori'i, awa ngini ni sihaga ngowa'a awa, re awa ni sa-sakala ngowa'a Israel ma lelegu. 12 Awa ni masisasi ma sakala re pake Ngoi 'ari lomanga. Sababu rema duhu gena-ge ngini na sipa-pake ua 'Ari lomanga, Ma Jou'ongu Madutu ga'a ngini ni silamo'o re siḏubuso. Sababu Ngoi nena-ne Ma JOU. 13 Awa ngini sito-to'u ngowa'a, re ni ra-rabasa manga 'ori i'a rana. Ngowa'a ga'a raḏi munara ra ngini, ananga manga ngogele na tahana awa singadolo da-daini. 14 Awa ni sosowini ngowa'a popongolo, re ni sigare maḏi toma ngowa'a hafu manga biono. Mada'a ngini balasu ni silamo'o re mojongo Ngoi, Ma Jou'ongu Madutu ga'a ni silamo'o re siḏubuso: Sababu Ngoi nena-ne Ma JOU. 15 Ngini balasu ninga 'akala loasa na'o ni sijuruhakimi ngowa'a Israel ma lelegu. Awa ni pa'ala kaci moi toma ngowa'a ma dinga'unu ua, re awa ni mojongo ngowa'a rema-enanga. Mada'a ngini balasu ni pake ninga 'akala loasa re banari na'o ni sijuruhakimi ngowa'a Israel ma lelegu. 16 Awa ni tagi i'a re ino taninga bangsa ma sigolona re sipula'a fitana le'a bolo le'a. Re awa ngini ni pula'a sakisi sa-sakala singadolo ngowa'a Israel ma lelegu sanga hukumu sengene. Sababu Ngoi nena-ne Ma JOU.

17 Sigogono ruta awa tani 'akala re sinyingara ma dara tai ioronongoḏu. Mada'a ngini balasu ni siḇangata ngowa'a Israel ma lelegu, la awa ni 'a'a ḏosa sababu ngowa'a Israel gena-ge. 18 Awa ni balasa re awa ni sigogono 'akala di'a ngowa'a Israel ma lelegu. Mada'a balasu ni dadalara ngowa'a Israel ma lelegu ma tero sa'olo ni dadalara ninga diri masiretene:✝ Sababu Ngoi nena-ne Ma JOU. 19 Mete'e mode-mode'e 'Ari parenta. Sila'ata awa haiwani-haiwani ga'a ma tero ua. Ni so'ana awa toma tana'a ḇotu moi gisisi fara ḏiḏi. Ni pake awa pakeanga ga'a si'a'a reo lawe fara ḏiḏi. 20 Na'o na-nau'u matengo 'o otu malomu reo budaka we-were'a ga'a 'o sijaji ḏua di'a sipula'a toma na-nau'u lelegu, re na-nau'u lelegu gena-ge 'o tuusu nyangu toma na-nau'u ga'a 'ai budaka we-were'a gena-ge re budaka gena-ge sanga bebasa nyangu, ananga nga muḏiḏi balasu sanga hukumu. Mada'a sanga ua hukumu sengene, sababu budaka we-were'a gena-ge sanga bebasa nyangu. 21 Ḏua na-nau'u gena-ge ga'a 'o otu malomu reo budaka we-were'a, unanga balasu 'o gasa 'ai sala ma du-duusu, gena-ge doba ma nau'u rimoi, toma Suyu'u Lo-lomu ma ngalana ma da-daku ma biono sa'olo jou-jou ngali rugi ra Ngoi, Ma JOU. 22 'Imam balasu 'a tola'a doba ma nau'u gena-ge sa'olo jou-jou ngali rugi ra Ma JOU 'ai momina di'a si'a'a unanga dadunu 'o dadi marimoi moju ra Ma JOU, re ngowa'a gena-ge 'ai ḏosa ga'a unanga 'a madaga'a, Ngoi, Ma JOU ḏuanga i'a To singi-ngiranga ḏosa gena-ge.

23 Na'o ngini reni osama toma nagara Kanaan re ni so'ana ate sowo-sowo'o 'oru ḇato, ma di'ara musungu ro'ange ate gena-ge ma sowo'o, ngini na siwosono. Dadi awa ni utu ma sowo'o gena-ge, bolo na oromo. 24 Toma musungu ma soi rata sowo-sowo'o gena-ge mo-moini ga'a ri 'utu'u balasu 'i siwola i'a di'a Ngoi, sa'olo jou-jou ninga murasa ma la ra Ngoi, Ma JOU. 25 Mada'a toma musungu ma soi romotoa kara ngini nyengara na oromo enanga ma sowo'o. Na'o ngini ni mete'e 'atoranga gena-ge ninga hasili 'i madogo-dogo. Sababu Ngoi nena-ne Ma JOU, Ma Jou'ongu Madutu ga'a ni silamo'o re siḏubuso.

26 Awa ni oromo la-la'eme ga'a rema enanga ma ngaunu, awa ni pake-pake sarati bolo mamaisi. 27 Awa ni ḇukuku ninga utu taninga sae'e ma gumuḏu'u re na guti ninga kukumu ma dere, sababu gena-ge nana'o di'a ngowa'a sengene. 28 Awa ni ḏui-ḏuiti ninga eno'o, re awa ni 'a'a tato taninga lese, gena-ge nana'o di'a ngowa'a sengene. Ngoi nena-ne Ma JOU. 29 Si'u'ua awa ninga ngowa-ngowa'a were'a sababu ni sidadi ananga sa'olo we-were'a su-sudala toma jou'ongu ma somoara ma wala ma dara. Na'o ni 'a'a so'o gena-ge ninga daeraha ḏuanga i'a 'i romanga reo jou'ongu ma somoara ma wala re ga'a ma emo-emono ra Ngoi 'ari momina. 30 Ngini balasu ni mete'e mode-mode'e 'Ari parenta di'a Sabata-Sabata ma wangere, re balasu ni silamo'o re mojongo 'Ari ngi'i ga'a ni siwola i'a di'a silamo'o re siḏubuso Ngoi. Sababu Ngoi nena-ne Ma JOU.

31 Awa ni tagi toma tukanga sarati bolo tukanga mamaisi di'a golo'o ajele ma ngale. Na'o ni si'a'a so'o gena-ge ni dadi najis: Sababu Ngoi nena-ne Ma JOU, Ma Jou'ongu Madutu ga'a ni silamo'o re siḏubuso. 32 Ngini balasu ni silamo'o ngowa'a ga'a raḏi piri'i. Ngini balasu ni silamo'o re mojongo Ma Jou'ongu Madutu ga'a ni silamo'o re siḏubuso: Sababu Ngoi nena-ne Ma JOU. 33 Awa ni sito-to'u ngowa'a tagi-tagi ino, ga'a tegoro ra ngini ninga nagara. 34 Si'a'a ngowa-ngowa'a tagi-tagi ino ma tero sa'olo ananga ngowa'a Israel madutu. Ngini balasu ni dadalara ananga ma tero sa'olo ni dadalara ninga diri masiretene. Sababu, ngini ḏi'i ni 'ahu ma tero sa'olo ngowa'a tagi-tagi ino toma Mesir: Sababu Ngoi nena-ne Ma JOU, Ma Jou'ongu Madutu ga'a ni silamo'o re siḏubuso.

35 Awa ni sijuruhakimi reo 'adili ua ngowa'a, re awa ni pake du-duga ma banari ua di'a ni situga, bae ma ḏubuso, bae ma kiḏanga, bolo ma litere. 36 Ngini balasu ni pake kilo ma banari re ḏi'i du-duga ma banari, bae ma ḏubuso, bae ma kilo, bolo ma litere. Sababu Ngoi nena-ne Ma JOU, Ma Jou'ongu Madutu ga'a ni silamo'o re siḏubuso, Ngoi to gasa ngini sisupu toma Mesir. 37 Re ngini balasu ni mete'e mode-mode'e 'Ari hukumu re 'Ari 'atoranga mo-moini. Sababu Ngoi nena-ne Ma JOU.>>