Levítico 18

6 <<Awa matengo i’a 'o otu malomu tai ioro re nongoḏu ma we-were’a. Sababu Ngoi nena-ne Ma JOU. 7 Awa ni sipula’a mara’a taninga ḇaḇa sababu otu malomu tai were’a. Munanga gena-ge ninga ngina, awa ngini otu malomu. 8 Awa ni sipula’a mara’a taninga ḇaḇa 'ai we-were’a ma lelegu sababu nimi otu malomu. We-were’a ma lelegu gena-ge ninga ḇaḇa 'ai hak. 9 Awa ni otu ma lomu taninga biḏanga madutu, bolo taninga biḏanga ḇaḇa moi matai ngina ga’a siḏe-ḏegoro i’a tani ḇaḇa ma wala bolo wala lelegu. 10 Awa otu ma lomu taninga danongo we-were’a. Duhu so’o gena-ge 'i sipula’a mara’a taninga ngitu re ngale. 11 Awa ni otu ma lomu taninga biḏanga ngini ḇaḇa moi mada’a matai ngina ga’a ramasa mamete’e ra ngini ninga ḇaḇa 'ai wala, sababu munanga ḏi’i ninga biḏanga. 12 Awa ni otu ma lomu taninga ḇaḇa 'ai biḏanga sababu munanga ḇaḇa 'ai ioro re nongoḏu. 13 Awa otu ma lomu taninga ngina mi nongoḏu sababu munanga ngina 'ami nongoḏu. 14 Awa ni sipula’a mara’a taninga ḇaḇa 'ai ioro bolo nongoḏu ma were’a sababu nimi dongotu. Munanga ninga tante madutu ḏi’i. 15 Awa ni otu malomu taninga dunungu, munanga ninga ngowa’a nau’u ma were’a, awa nimi otu malomu. 16 Awa ni otu malomu taninga iḏanga 'ai were’a. sababu gena-ge ni sipula’a mara’a taninga iḏanga. 17 Na’o ngini ni otu ma lomu toma we-were’a matengo, awa ni otu malomu ḏi’i tami ngowa’a were’a, bolo tami ngowa’a nau’u 'ai danongo ma were’a bolo tami ngowa’a were’a 'ami danongo ma were’a. Ananga gena-ge ioro re nongoḏu sabi moi re ga’a ma tero gena-ge emo-emono madutu ra Ngoi 'ari momina. 18 Awa ni molo’ara ḏi’i ninga were’a 'ami biḏanga na’o ninga were’a masiretene mo 'ahu-'ahu moju, sababu ananga ngamu ḏiḏi 'aḏi ma’u lawana taunu.

19 Awa ni otu malomu toma we-were’a ga’a 'ami 'orasa mo maoḏi’i, sababu munanga 'orasa gena-ge mo najis ra Ma JOU 'ai momina. 20 Awa ni otu malomu reo ngowa’a lelegu manga were’a. Duhu so’o gena-ge si’a’a ngini ni dadi najis. 21 Awa ni sidoa’a ninga ngowa’a matengo i’a sa’olo ninga jou-jou toma jou’ongu ma somoara ga’a si’aro’o Molokh. Sababu ninga ga’a gena-ge 'i sipa-pake ua Ma Jou’ongu Madutu ga’a ngini ni silamo’o re siḏubuso: Sababu Ngoi nena-ne Ma JOU. 22 Awa ni otu malomu rema na-nau’u ma tero sa’olo rema we-were’a sababu ga’a gena-ge ma emo-emono ra Ngoi 'ari momina. 23 Re awa ni be-bere haiwani 'oru ḇato sababu ninga ga’a gena-ge 'i si’a’a ngini ni dadi najis. So’o gena-ge ḏi’i, awa we-were’a haiwani mi be-bere; ga’a gena-ge ma emo-emono madutu ra Ngoi 'ari momina.