1 Luagu aban weyu le emeraaguagülei, aba lidin Hesusu eiga lúbiñe aban fariséu wéiriguti; ani sun ha ñéinbaña, aba haríaguni Hesusu. 2 Ñeinñein giñe aban wügüri sándiñein lau ginenei; 3 ábati lálügüdüniña Hesusu arufudahatiña lilurudun Moisesi hama fariséugu, lariñaga houn:

—Gayaraati lareidawaguágüdün aban wügüri lidan luéyuri emeraaguni odi siñati?

4 Aba herederun maniñu. Ábati lanügüni Hesusu sánditi ligía, aba lareidaguagüdüni, aba lariñagun lun lun lidin. 5 Aba lariñagun houn fariséugu:

—Furumiñeguarügü hídangiñe, anhein éiguada lilügün bágasu o lilügün lan burigü lidoun aban fusu lidan luéyuri emeraaguni, lasagarubei ñéingiñe furese.

6 Aba hásiñaragun houngua lun hóunabuni.

7 Dan le larihinbei Hesusu hanúadahani amisurahóutiña ubaraü burí le habara ha wéirigubaña, aba lariñagun houn:

8 —Danme le bamisurahóun lidoun aban fedu lánina maríei, máluahabei lubuidun-agei ubaraü, ñübuin liñein ábanya amisurahóuti wéirigutimati buéi; 9 ábame liabin le amisurahabalün, lariñagame bun: "Rubei bubara lun wügüri le". Ábameti bidin lau busiganu añuura lidan lǘnabun-agei ubaraü. 10 Danme le bamisurahóun lidoun aban fedu, ñuruba lidan lǘnabun-agei ubaraü, lun danme lan le liabin le amisurahabalibu, lariñagame bun: "Numada, sügüba lidoun aban ubaraü wéirigutimati". Ítara luba beresibirun inebesei hagibugiñe sun ha ñúnbaña luagu dábula. 11 Le íñubei lanaagun lungua, lǘnabudagüdüwaba; le ǘnabuti lanaagun lungua, wéiribei lanügǘn.

12 Ariñagati giñe lun wügüri le amisurahabalin:

—Danme le bíchugun aban adineruni o fedu, mamisuraha baña bumadagu, ni bamulenu, ni bíbugañanu, ni híbiri biduheñu, ni bubesinanigu ha rísitiña, ladüga hamisurahabadibu giñe, bibihubati bafayeiruaha. 13 Danme le badügün fedu, amisuraha baña ha gudemebaña, ha siñaguabaña ungua, ha danimabaña, hama ha marihinbaña. 14 Ábame gunda ban, ladüga siñati hafayeirunibu; bibihubeiti bafayeiruaha danme le hásaarun ha richaguabaña lídangiñe óunweni.

15 Dan le laganbunbalin aban hádangiñe ha ñúnbaña luagu dábula katei le, aba lariñagun lun Hesusu:

—Fuleseiwabaña gürigia ha éigibaña lidan larúeihan Bungiu.

16 Ábati lariñagun Hesusu lun:

—Ñeinñein aban wügüri, íchuguti aban óunwenbu adineruni, aba lóunahan amisuraha saragu gürigia. 17 Dan le chülühali oura lun adineruni, aba lóunahani lumusun ariñaga houn amisurahóutiña: "Keimoun, aranseli sun katei". 18 Sun hagía, aba hariñagun luagu siñá lan houdin. Lariñaga furumiñeti: "Sun liña nagañeihan aban fulasu, mosu nidin arihei; feruduna bana, siñati nidin". 19 Lariñaga aban: "Agañeihaadina seingü feru bágasu lánina wadagimanu, néibuga óuchaña; adügabá fulesei nun, feruduna bana, siñati nidin". 20 Lariñagaya aban: "Sun liña namarieidun, ligía siñá lubéi nidin". 21 Dan le lagiribudunbei musu, aba labahüdaguni sun katei le lun liyubudiri. Ábati lagañidun liyubudiri, aba lariñagun lun musu: "Beiba lidan sun üma le uburugubei, banügañame ha gudemebaña, ha siñaguabaña ungua, ha danimabaña, hama ha marihinbaña". 22 Lárigiñe ladügüni, aba lariñagun musu lun liyubudiri: "Nabureme, adüga naali le bubeibei nun ani anihamémegua ubaraü". 23 Ábati lariñagun iyubudiri lun musu ligía: "Beiba lidan sun üma bóugudin luéi uburugu, luma sun fulasu geyegua lau, ábame bafosuruniña sun ha badarirun lun hayabin lidoun nufedun, buin táamuga nuban. 24 Ladüga nariñahare hun luagu úabei lan ni aban hádangiñe ha namisurahabaña éigiti lidan nadineragüdün".

25 Saragu haña gürigia afalaruti Hesusu, aba lagararaagun, aba lariñagun houn:

26 —Siñati nánigubei lan le hínsiñehabutimati lun lúguchi, o lúguchu, o lúmari, o lisaanigu, o líbugañanu hama lamulenu, o lítunu, o libagari guánarügü, sügǘ nau. 27 Le giñe manügünti luguruan ani aba lafalarunina, siñati nani lan disipulu. 28 Anhein aritagua aban hídangiñe ladügün aban wáyelesi, mañuurunbei funagia furumiñe asaminara átiribei lan lagastarun lun larihini anhein gabafubei lubéi lun lagumuchuni? 29 Ladüga anhein líchiga ebu, lárigiñeme lásiñarei wadagimanu agumucha, héherahaba ha arihubalin lau; 30 hariñagame: "Gumeseti wügüri le aban wadagimanu, siñá lumuti agumucha". 31 Anhein lawuribuha lubéi aban urúei luma amu urúei, ma funagia ñuruti furumiñe lun lasaminarun anhein gayaraabei lubéi lageindagun hau diisi-milu súdaragu luma le haubei wein-milu? 32 Ánheinti aritagua luagu siñabei lan, danme le dísegili le aban urúei, ábame lóunahan ariñaga lun lun mawuribuhan hamá, lun hebelurun lidoun darangilaü. 33 Ítara liña lubeiti, furumiñeguarügü hídangiñe le mígirunti sun le lúmabei lun lafalarunina, siñati nánibei lan disipulu.

34 «Buiti salu; gama lumoun anhein leferidira lubasuan, kábagia un hu lan? 35 Mabuidunhalime ni lun lábunawagun nadü lidan, ni lun labuiduragüdüni múa lun bunaguaü; fuíwarügaalime. Ha garigeirugubaña lun haganbun aganba hamá».