1 Aba labahüdagun Hesusu aban hénpulu houn, lun larufudahan houn luagu lunti lan hafurieidun lun Bungiu súnwandan, meferidirunga haméi haguraasun. 2 Lariñaga houn: «Ñeinñein meha aban aguseragüdüti lidan aban fulasu, mineben liña Bungiu lun, meberesen ligía lau ni aban gürigia. 3 Ñeinñoun giñe aban würi lidan fulasu ligía, hilá meha túmari; sagü weyu tidin lumoun aguseragüdüti le lun líchuguni tiricha tun luagu aban tuwuribun luma tágani. 4 Luagu saragu dan, máhati yebe letenirun tun; lárigiñe, aba lariñagun lúnguarügü: "Lau sun mineben lan Bungiu nun, mineben hagía gürigia nun, 5 kei anuhaméme lan würi to ásüdagüdei nichügü, níchigaali tiricha tun, hebé láamuga tiabin, gumú liñein nuguraasun" ».

6 Aba lariñagun Hesusu: «Anihán lariñagubei aguseragüdüti le wuribabei, 7 gúbumeti líchigei Bungiu haricha lánigu houn, ha ayumuragutiña lun áriebu, wéyuagu. Lálüdüba funagia lubá lóunabuniña? 8 Nariñahare hun, luagu líchugubei lan haricha houn ani madarasahanbei. Gama lumoun, danme le nagiribudun, au le Wügüri Garaüwarügüti, ubouagun, nadariruba funa san afiñeni hadan gürigia ha ubouagubaña?»

9 Rúyati Hesusu aban hénpulu houn ha haritaguabaña luagu richagua hamá ligibugiñe Bungiu, hanügaña amu gürigia kei ni kata. Lariñaga:

10 «Aba houdin bián wügüriña ténpulurugu afurieida lun Bungiu; aban fariséu, luma aban aguburahati liseinsuna gumadi. 11 Le fariséu, rara liña lafurieidún, lariñaga: "Bungiu, seremei numutibu luagu mítaran nan kei híbiri gürigia—híwerutiña, salufuritiña, gagabarahatiña; ni kei aguburahati liseinsuna gumadi le. 12 Ayunaratina bián wéiyaasu lidan dimaasu lun nagunfulirun buma, ru numuti giñe diisi lídangiñe kada san le ebelurubei nun, bun". 13 Ánheinti aguburahati liseinsuna gumadi, aba lerederun dise; mabusenrunti ni lun liñuruni larihin sielun, le lueirin lǘnabun lanaagun lungua. Abouharügüléi laniguagu lau igarigu, lariñaga: "Bungiu, gudemená bun, au le gafigounti!" 14 Nariñahare hun luagu giribu lan aguburahati ligía lúbiñoun, resibiñuléi Bungiu; mama fariséu ligía. Ladüga le anaaguti lungua weiri, ǘnabubei lanügǘn; anhein le ǘnabubei lanaagun lungua, wéiribei lanügǘn».

15 Anaahóuatiña giñe irahüñü lun Hesusu lun laguurun hawagu; dan le harihinbalin disipulugu katei le, aba hadeinhan houn ha anaahabaliña irahüñü. 16 Aba lariñagun Hesusu houn lun hasigirun anaahaña harahüñü lun, aba lariñagun houn lánigu:

—Ígira humá lun hayabin irahüñü numoun, mamahara humá, ladüga ha ítarabaña kei irahüñü, hagía lílanabaña larúeihan Bungiu. 17 Ninarün hau luagu le lan meresibirun lumuti larúeihan Bungiu kei aban irahü, mebelubei lidoun.

18 Aba lálügüdüni aban hádangiñe ábutigu Hesusu, lariñaga lun:

—Máisturu buiti, ka lunbei nadügüni lun gayara lan nibihini ibagari magumuchaditi?

19 Lariñaga Hesusu lun:

—Ka uagu bariñaga nun buiti? Ábanrügüñein buiti, Bungiu. 20 Subudi bumuti gumadi: "Magabarahabóun búmari, máfarahaba, míweruhaba, meyeehabá luagu ni aban, inebe hamá bagübürigu bun".

21 Lariñaga wügüri ligía lun:

—Gúnfulitina lau sun le lúmagiñe ñǘraügidina.

22 Dan laganbunbalin Hesusu katei le, aba lariñagun lun:

—Mégeigili aban katei lun badügüni: Alugurabéi sun le búmabei, ábame bíchuguni lebegi houn gudemetiña, ábame garisin ban sielu. Ábame bagiribudun, ábame bafalarunina.

23 Dan le laganbunbalin wügüri ligía katei le, aba lírudagun, ladüga gíbeti lirisin. 24 Dan le larihinbalin Hesusu lírudagun, aba lariñagun:

—Hénrenguti lun hebelurun rísitiña lidoun larúeihan Bungiu! 25 Ménrenguntimati lun lásügürün aban kameyu lídangiñe luhuyun aban agusa sügǘ lau lebelurun aban rísiti lidoun larúeihan Bungiu.

26 Aba hariñagun ha aganbubalin:

—Káteiti gayaraabei lasalbarun?

27 Lariñaga Hesusu houn:

—Le hásiñarubei gürigia adüga, gayara lumuti Bungiu.

28 Lariñaga Féduru lun:

—Wabureme, ígira wamaali sun le wámati lun wafalarunibu.

29 Aba lariñagun Hesusu houn:

—Ninarün hau luagu furumiñeguarügü lan le ígiruti luban, o lagübürigu, o líbugañanu, o lamulenu, o lúmari, o lirahüñü luagu larúeihan Bungiu, 30 libihubatíma saragu wéiyaasu lóugiñe lidan ubóu le, ibihaléime ibagari magumuchaditi yágüta sielu.

31 Aba lagúarun Hesusu houn lani duusu disipulugu hábugua, aba lariñagun houn: «Wéibuga Herusaléun guentó, le ñeinba lubéi lagunfulira sun le habürühabei profetagu nuagu, au le Wügüri Garaüwarügüti. 32 Hederegerubadina houn ha mámabaña huríu, héherahaba nau, anaba hamaname, suegua. 33 Habeichubadina, lárigiñeme, ábame háfarunina hilagubei; gama lumoun násaaruba lídangiñe óunweni luagu lǘrüwan weyu lunya nabagaridun».

34 Úati gunfuranda hamá ni kata lídangiñe katei le, ibidiñegubéiti houn ka lan uagu ladimureha houn; daruguati lanichigu katei le lariñagubei, houn.

35 Dan le achülüreinaali Hesusu uburugun Herikó, ñeinñein aban marihinti ñun laru üma amuriaha. 36 Dan le laganbunbei marihinti ligía hásühan saragu gürigia, aba lálügüdahan ka lan suserebei. 37 Aba hariñagun lun luagu anihán lan Hesusu le Nasarétüna ásügüra ñéingiñe. 38 Ábati lagúaragun, lariñaga:

—Hesusu, ladügawagun Dawidi, gudemená bun!

39 Ha lubá lubaabaña, aba hadeinhan lun lun lámanichun; ligíatima lagúaragun:

—Ladügawagun Dawidi, gudemená bun!

40 Ábati lararamagun Hesusu, aba lóunahan anügei. Dan le yarafaali lun, aba lariñagun lun:

41 —Ka babusenrubei nadügün bun?

Aba lariñagun lun:

—Nabureme, busentina narihin.

42 Lariñaga Hesusu lun:

—Ibihabéi barihin! Areidaguaadibu ladüga bafiñen.

43 Lídanmeme oura ligía, aba larihin marihinti ligía, aba lafalaruni Hesusu íchigeina uéiriguni lun Bungiu. Sun gürigia ha arihubalin katei le, aba giñe híchugun uéiriguni lun Bungiu.