1 Luagu aban weyu, ñeinñein Hesusu laru lagunu le gíribei Henesarétü; ábati hayabingua saragu gürigia darí lun hámurudaguni, ladüga busén hamá haganbuni lererun Bungiu. 2 Aba larihin Hesusu bián ugunei málatu béyabu, rariguaaña esenihatiña tídangiñe, hachibuñounti hasenin. 3 Ábati ládinun Hesusu tidoun aban tídangiñe ugunei tuguya to luguneboun Simón, aba lariñagun lun lun ladisedun murusun luéi laru beya. Ábati lañuurun Hesusu tidan ugunei, aba lagumeserun arufudaha houn gürigia ñéingiñe. 4 Dan le lásurunbei ladimurehan, aba lariñagun lun Simón:

—Héibameme anagün, ábame hágurunu hisenin ñein.

5 Lariñaga Simón lun:

—Máisturu, nadagimeinhaadiwa sun áriebu, ani mañuguntiwa ni kata; gama lumoun kei buguya lubéi ariñagubalin, wágura.

6 Aba hágurun; dan le hiñuragunbarun seni, ñéinñanu saragu úduraü tidan darí yebe lun taheiridagun. 7 Ábati hadügün seini houn híbirigu ha tídanbaña to aban ugunei lun hayabin íderaguaña. Aba hayabin, aba habuinchagüdünu biángubei ugunei darí yebe lun tadibiragun. 8 Dan le larihinbalin Simón Féduru katei le, aba láhuduragun ligibugiñe Hesusu, aba lariñagun lun:

—Disebá nuéi, Nabureme, ladüga aban wügüri gafigounti au!

9 Lariñagubálin Simón lira ladüga taweiridun lanigi, hau sun ha úarabaña luma, luagu añuguni le hadügübei. 10 Wéiritu giñe lanigi Santiagu luma Huan, ha lirahüñü Sebedéu, ha lúmabaña Simón. Aba lariñagun Hesusu lun Simón:

—Manufudedabá; lúmagiñe guentó gürigiahañame badíaha.

11 Lárigiñeti hátürün, aba hígiruni sun katei, aba houdin luma Hesusu.

12 Luagu aban weyu, lídanñein aban fulasu Hesusu, le ñein lubéi aban wügüri gawaguti lépüra. Dan le larihinbalin wügüri ligía Hesusu, aba láhuduragun darí ladagarun lerebe múarugu, aba layumuragun lun ítara:

—Nabureme, gayaraati bareidaguágüdünina ánhabu busén.

13 Ábati laguuruni Hesusu lau lúhabu, aba lariñagun:

—Busentina, areidaguabá.

Kei lariñagun ítara, aba lagidarun lépüra luéi wügüri ligia; 14 ábati lariñagun Hesusu lun lun mabahüdagun lani katei le ni ka un. Lariñaga lun:

—Ñǘdünrügüba, arufudagua bungua lun fádiri, rubeime idewesei le uágubei lariñaga lilurudun Moisesi luagu barumadun, ariha hamaamugei gürigia luagu areidaguaadibu lan.

15 Eibu dan, eibu laburuchaguntima luagu Hesusu; saragu hañatiha gürigia óundaragutiña lun haganbuni luma lun lareidaguagüdüni hasandi. 16 Ábaha lidin Hesusu le ñeinhin lumuti úa hamá gürigia lun lafurieidún lun Bungiu.

17 Luagu aban weyu, ñeinñein Hesusu arufudaha; ñéinñanuti fariséugu hama arufudahatiña lilurudun Moisesi, ñǘbuintiña lídangiñe lirahüñü burí fulasu le lani Galiléa, Hudéa luma Herusalén. Anihati lubafu Bungiu arihúa luagu Hesusu lau lareidaguagüdüniña sánditiña. 18 Ábati hayabin fiu wügüriña barüina aban wügüri deregüdaali tidan aban ubarari; hálugati hebelaagüdüni le ñeinhin lubéi Hesusu lun larihini. 19 Gama lumoun madaritiña halíagiñeba lan hebelura ladüga hiibe gürigia; ábati hawarirun tábulugun muna, aba hagidarun murusun luéigiñe tábulugu muna lóugiñe le ñein lubéi Hesusu, aba harariragüdüni sánditi tidan lubarari ligibugiñoun. 20 Dan le larihinbalin Hesusu afiñeni le hawagubei, aba lariñagun lun sánditi ligía:

—Niráü, ferudunawaali bifigoun.

21 Ábati hariñagun arufudahatiña lilurudun Moisesi hama fariséugu hóunguarügü:

«Katei san gürigia le, le minebenehabubei lun Bungiu lau ligaburi ladimurehan? Úati amu gayaraati feruduna lan figóu luéidigia Bungiu».

22 Subudi lumutiti Hesusu ka lan hasaminanbei, aba lariñagun houn:

—Ka san uagu hasaminara ítara? 23 Kátima ménrengubei lariñawagún: "Ferudunawaali bifigoun? Odi saraba, béibuga?" 24 Narufudaaliti hun luagu gayara lan feruduna nan figóu, au le Wügüri Garaüwarügüti.

Ábati lariñagun lun le sándibei:

—Saraba, barüboun bubarari, beiba búbiñoun.

25 Lidan oura ligía, aba lásaarun sánditi ligía hagibugiñe, aba labudunu lubarari to buga ídanboun larounra, aba lidin lúbiñoun adimureheina luagu luéirigun Bungiu. 26 Aba taweiridun hanigi súngubei, aba hadimurehan luagu luéirigun Bungiu, aba hariñagun lau tueirin anigi:

—Arihaadiwa katei wéiriguti uguñe.

27 Lárigiñe katei le, aba láfuridun Hesusu lídangiñe fulasu ligía, aba larihin aban aguburahati liseinsuna gumadi, gíriti Lewí, ñun liña lidan lubara le ñein lubéi laguburaha; aba lariñagun Hesusu lun:

—Falabana; keimoun numa keisi nani disipulu.

28 Ábati lásaarun Lewí, aba lígiruni sun katei lánina binadu libagari, aba lidin luma Hesusu keisi lani disipulu lúmagiñe oura ligía.

29 Lárigiñe, aba ladügün Lewí aban óunwenbu fedu lun Hesusu, lúbiñe; ñéinñanuti saragu aguburahatiña liseinsuna gumadi hámaya amu gürigia ñun luagu dábula hama. 30 Aba hagumeserun fariséugu hama arufudahatiña lilurudun Moisesi adimureha luagu Hesusu hama lani disipulugu; aba hariñagun houn:

—Ka san uagu héiginbei hama aguburahatiña liseinsuna gumadi luma hama amu gafigountiña?

31 Lariñaga Hesusu houn:

—Ha magadiñebaña, memegeiruntiña surusia; ha sándibaña hagía mégeibaña surusia. 32 Mama lubeiti niábiña áluaha gürigia richaguatiña, niábiña áluahaña ha gafigounbaña lun hasakürihaba lan.

33 Ábati hariñagun lun Hesusu:

—Ka san uagu hayunara lánigu Huan hama fariséugu, afurieida hagía saragu lun Bungiu, ánhaña bani disipulugu, hóutiña, gurá hagía súnwandan?

34 Aba lariñagun Hesusu houn:

—Gayaraati funagia hayunaragüdüniña gürigia ha hamisurahan lidoun aban maríei sun anihán lan adari hama ñein? 35 Lachülürüba dan lun lidin adari; ábameti hayunarun.

36 Ruti giñe Hesusu aban hénpulu houn, lariñaga:

—Úati íbuguti murusun gamisa tuéigiñe aban dúnigu iserigiru lun láfadarun aban dúnigu ñuluharu tau; anhein ladüga ítara, tagadeiruboun to iserigiruboun, ani meredeboun giñe murusun gamisa iseri tuguya buidu tuagu daüguaü ñuluharu tuguya. 37 Michugúntu giñe diwéin iseri lidoun gueru binaduhali; anhein adügǘwa ítara, taheiridagubei diwéin iseri gueru binaduhali; féridimeti diwéin, féridi gueru. 38 Ligía lunti lubéi tichugún diwéin iseri lidoun gueru iseri; ítara luba leseriwidun gueru, seriwime diwéin. 39 Úati giñe átuti diwéin to binadu lun labusenruba lan to iseri lárigiñe; lariñaguba: «Buítimatu to binadu».