1 Aba larihin Hesusu híchaahan rísitiña seinsu tidoun burí gafu to lagei seinsu ténpulurugu; 2 ariha lumuti giñe tíchugun aban würi gudemetu to hilaali túmari, bián gáwanaü tidoun gafu. 3 Aba lariñagun Hesusu:

—Ninarün hau luagu gíbetima lan tíchugun fugiabu würi to sügǘ hau súngubei; ladüga sun hagía, lídangiñe le ígiragubei hama híchiga; 4 anhoun tuguya, lau tugudemegun tíchigei sun le túmabei lun yebe tawinwandun.

5 Hadimurehaña fiu gürigia tuagu ténpulu, luagu tubuidunmeraü lau lubuidun burí tidübüri luma burí katei le híchugubei gürigia lun tawendedun. Ábati lariñagun Hesusu:

6 —Lachülürüba weyu lun lagünrinchawagun sun le harihubei guentó; meredebei ni aban dübü ligibuagu dübü.

7 Ábati hálügüdüni, hariñaga lun:

—Máisturu, ídaame san lasusereda burí katei le? Kaba san seini wariha luagu lúnhali lan lasuseredun?

8 Aba lariñagun Hesusu: «Góunigi humá, meyeedúa humá. Ladüga hayabinba saragu ariñageina lidan niri: "Au Krístubei"; "Anihán dan ligía". Gama lumoun mafalara humaña. 9 Danme le haganbun ladimurehoun luagu awuribuhani luma hawagu gürigia agarabaagua luagun harúeite, manufudedagua humá; lasusereduba le furumiñe, gama lumoun mámagilime lagumuchun ubóu lira».

10 Aba lasigirun ariñaga houn: Lageindaguba aban fulasu luma aban, awuribuha ligíame aban ageiraü luma amu. 11 Ñeinbei óunwenbu burí hárabaganali, ilamaü, sandi, lidan ámuñegueinarügü fulasu; larihúba burí katei hanufunati sielu luma óunwenbu burí seini.

12 Lubaragiñe lasuseredun sun le, hárühouba, éibaahoua huguyame. Hanügǘba agusera tidan haligilisin huríu, hádarawaguba furisunrugun, barüwa huguyame hagibugiñoun urúeigu hama gumadimatiña, nuéigiñe, 13 ligíameti hidaani lun hadimurehan luagu nufulesein. 14 Gama lumoun subudiñu huméi mama lan mosu haranseruni kaba lan hariñaga huéigiñegua; 15 níchuguba dimurei luma lichú aau hun le lásiñarun ni aban hádangiñe háganiñu asigenera ni óunaba. 16 Halugurubadün hagübürigu guánarügü, híbugañanu, hamulenu, hiduheñu hama humadagu. Ñéinbaña hídangiñe afarútiña, 17 hiyereegudúba houn sun gürigia, nuéigiñe. 18 Gama lumoun meferidirunbei ni aban lugule ídiburi hábulugugiñe. 19 Anhaün deregüdagumeme, hibihubei ibagari magumuchaditi.

20 Danme harihin geyegua hamá lan súdaragu uburugu Herusalén, subudi huméi luagu yarafaali lan lagünrinchawagun uburugu ligía. 21 Hámeti gürigia ha Hudeabaña, lunti hanurahan luagun burí wübü; ha uburugubaña Herusalén, lunti háfuridun ñéingiñe; ha áraabubaña, magiribuda hamá uburugun. 22 Luéyuri buribei hafayeirun gürigia luagu wuribati le hadügübei, lun lagunfulirun sun le bürüwañubei tidan Lererun Bungiu. 23 Fugiabugume würiña ha dageinatiña lidan dan ligía, o ha lan garahüñütiña ha guragiña! Ladüga ñeinbei saragu igarigu ubouagu; larufudubei Bungiu lueirin ligañi luagu hafigoun gürigia ha. 24 Ñéinbaña óunwegutiña wuriburugu, híbiri hanaawaguba adaürawagúa lidoun amu ageiraü; ábame hagünrinchaguni ha mámabaña huríu uburugu Herusalén darime lagumuchun dan le ichugúbei houn lun hadügüni.

25 «Lasaliragubati burí seini luagu weyu, luagu hati luma hawagu waruguma; hadiheriduba néchanigu ubouagu, ábame hanufudedagun luagu lanarime lahuuhan luma labounhan lugudi barana. 26 Ladagaruba falalaü hawagu gürigia luma anufudei, lau hasaminarun luagu katei le lunbei lasuseredun, ladüga hánhingichuaba sun waruguma ha siélubaña. 27 Ábameti larihín niabin, au le Wügüri Garaüwarügüti, lidan dúeri lau sun nubafu luma óunwenbu nuéirigun. 28 Danme le lagumeserun burí katei le asusereda, derebuguñu humá lidan hafiñen, iñuragua humeime hichügü, ladüga madiseelime luéyuri hasalbarun».

29 Ru lumuti giñe hénpulu le houn:

—Ariha humóun tídibu igu, o furumiñeguarügü tídibu wewe. 30 Dan le harihin labouchun tubana, subudi humuti luagu yarafaali lan lidaani lubachouga. 31 Danme giñe le harihini lasuseredun burí katei le, subudi huméi luagu madiseeli lan lidaani Bungiu lun larúeihan.

32 Ninarün hau luagu lagünrinchawaguba lan sun uburugu le Herusalén lubaragiñe hóunwegun gürigia ha lánina dan le. 33 Lagumuchaguba sielu luma ubóu; anhein nererun, laduraruba lun sun dan.

34 «Góunigi humá, mígira humá lun tabuinchun hanigi lau katei málati kei saragu fedu, bacharuaü, luma burí idiheri luagu burí katei lánina ibagari le, márügüdün láamugaün weyu le nagiribudagüle ubouagun lidan magaradahan humá, 35 kei aban sádara. Ladüga ítara luba liabin weyu ligía hawagun sun ha aganóubaña lidan sun fulasu ya ubouagu. 36 Aranseñu humá lubeiti, afurieida huguyame lun Bungiu sun dan, gayara láamuga hibihin ubafu lun hawanduni sun burí katei le lunbei lasuseredun, lun giñe gayaraabei lan harufudagun hungua nigibugiñe».

37 Ábaha larufudahan Hesusu ténpulurugu wéyuagu; áriebutiha aba lidin eredera luagu wübü le Oliwu. 38 Ábaha chülügiñe hamá gürigia ténpulurugun sagü binaafin lun haganbuni.