1 Vang'olotsangu, chila cho ntsin'gana ndalahela mu numbula yangu na suka yangu kwa Mulungu siku tseka, vang'olotsangu Vaisilaheli vakuluswe. 2 Ntsinguvalonjela kuta, vanu iwo vangikangatsa ndalahela kumusaka Mulungu, lechelelo kumusaka kwawo van'dita bila ntselo tsa kweli. 3 Ihyo sivatselaga hila Mulungu fyo avaditaga vanu ili vidichilwe na mwene, nawo vakajelaje kwantsisa ng'asi yawo vene, na ihyo vayilemile ng'asi iyo ya Mulungu ya kuvadita ili vidichilwe na mwene. 4 Chilisito ho avaga kutsa, malajitso ga Musa gakavaje siyo gakihuvila hala munu hoan'gana kidichilwa na Mulungu, ila vanu vidichilwe na Mulungu kwa kumutumba Chilisito.

5 Musa andiche hino kwa ndongwa tsa wuwuya wo afuluche awupate munu kwa kugafwata malajitso, "Munu yoyuve yo angikala na kugahulikitsa malajitso, munu uyo an'ganika ikale kwa kugafwata malajitso igo." 6 Lechelelo yandikwe hino, hila munu fyo afuluche idichilwe na Mulungu kwa kitumba, "Walahogola ulonje mu numbula yako kuta, Nani yo akukwina kubita kilanga kwa Mulungu? Kwa kulonga ihyo unkuva ungumwisa hanyi Chilisito." 7 Awu uleche kulonga kuta, "Munu vachi yo afuluche kubita kwa vanu wo vafweye? Kwa kulonga ihyo unkuva ungumuleta Chilisito kuhuma ku inyi ya vanu wo vafweye." 8 Lechelelo mandiko ganlonga ndawuli? "Wujumbe wa Mulungu wuli habehi na heve, wuli mu mulomo gwako na mu numbula yako." Uwo wo wujumbe wa ndongwa tsa litumbilo tso tungutsivikula. 9 Ihyo manyi umudichile Chilisito kwa kulonga kwa mulomo gwako lwa kuta mwene yo Mutwa, na kitumbila mu numbula yako lwa kuta Mulungu amutsilipwe, ukukuluswa. 10 Kwakuva munu manyi atumbe kwa numbula yake akidichilwa na Mulungu, na manyi ihale kwa mulomo gwake akupata wukuluso. 11 Kota mandiko ga Mulungu fyo ganlonga, "Chila munu yo angumutumba siafuluche ahonje nyoni." 12 Kuduhu wubagulo kwa Muyawudi awu munu yosi Muyawudi, mwene yula yo Mutwa va veka, munya wugano ndalahela kwa vala veka wo vangumusuka. 13 Mandiko ga Mulungu ganlonga, "Chila munu yo akumuchema Mutwa kwa kugana kutangwa, uyo akukuluswa."

14 Mbe, vafuluche vamusuche ndawuli mwene yosinambe vamutumbe? Kaha vakumutumba chinyandawuli mwene yosi vamuhuliche ndongwa tsake? Kaha vakumuhulika chinyandawuli bila munu kuvavikulila ndongwa tsake? 15 Kaha vakuvikula ndawuli manyi sivasindikwe? Kota fyo yandikwe, "Vanofu kota chichi vanu vala wo vanvikula Ndongwa Nofu!" 16 Lechelelo siyo vanu veka wo vanuche tsila Ndongwa Nofu. Nambe Isaya muloli va Mulungu alontsile, "Mutwa, nani yo atsitumbye ndongwa tsila tso tutumilwe?" 17 Duve, litumbilo litsaga kwa kuhulika wujumbe, na wujumbe wuhumaga mu Ndongwa Nofu tsa Chilisito.

18 Leche ntsivaputse, mbe vene sivakahuliche wujumbe uwo? Nachene! Vahuliche, kota mandiko ga Mulungu fyo ganlonga,

"Vanu vavikwe wujumbe wa Mulungu chila hono, na vanu vahuliche wujumbe wa Mulungu mbaka ku wudugo wa inyi."

19 Kaha mbwile kuvaputsa, mbe, Vasilaheli sivakatselye? Musa mwene alongwe kulonga kuta,

"Nguvadita muvawonele wifu

vanu wosi vanu va inyi yangu.

Nguvadita muvawonele lilakali

vanu va inyi ya vanu vapuva."

20 Hambele kaha Isaya alontsile bila muloto goguve kuta,

"Ngawonekaje kwa vanu wosi vasakaga heni,

ngilajilaje kwa vanu vala wo sinambe vawutsanitse ndongwa tsangu."

21 Lechelelo kwa vanu Vaisilaheli Isaya anlonga, "Kwa luvala lweka ntsavagongoletsaga vanu vangu kwa kuvachema ili vamituchile heni, lechelelo vene valemile kunyulikitsa."