1 Ntsinlonga wukweli ng'ani kwakuva ntsili mugati mwa Chilisito, nayo Muhe va Mulungu yo an'ndongotsa mu numbula yangu an'ndajila kuta sintsinlonga wudesi, 2 ntsin'gana kulonga kuta ntsina ng'ung'uto ngomi mu numbula yangu na wusungu ndalahela. 3 Yika kuva chiba heni ng'otolwe na mbikwe kutali na Chilisito, kwasawuli ya vang'olotsangu Vayawudi wo vanu va inyi yangu, 4 iwo wo Vaisilaheli, wo avahagwe vave vanage. Mulungu akavahantsaje mu wuvina wake na kuvika nawo gala malagano, akavapelaje malajitso gake, litumbilo lya wukweli na kuvatumbitsa cho alontsile. 5 Iwo Vaisilaheli tso ntsukulu tsa vakuku vetu, nayo Chilisito kwa wunu wake ahumye mu lukolo lwawo. Mulungu yo antavala finu fyeka atsumitswe siku tseka bila wudugo. Eena!

6 Sintsinlonga kuta chila cho avatumbitse Mulungu chananjiche, kwasawuli siyo Vaisilaheli veka wo vahagulwa na Mulungu. 7 Siyo lulelo lweka lwa Ibulahimu kuta wo vana vake nachene, ila kota fyo galajilaga mandiko ga Mulungu, "Lulelo lwake lukuhumila kwa Isaka." 8 Tufuluche tulonje kuta, siyo vana veka wo valeliche kota vanu vanji fyo valelekaga kuta wo vana va Mulungu, ila vala wo valeliche kota fyo alontsile Mulungu iwo wo vakuvalilwa kuta vana va Ibulahimu. 9 Kwasawuli chila cho avatumbitse Mulungu cho ichino, "Nguwuya kaha kwa luvala kota luno kumwaka, nayo Sala akulela mwana mukwamitsi."

10 Kaha si ihyo ng'ani, ila Lebeka nayo apasile wubofu wa vana vanya mbili kwa Isaka mulume vake, yo dada vetu. 11 Lechelelo ili Mulungu awoneche kuta yo munya wuvetso wa kuhagula, nambe vala vana hovavaga vang'ali kuleleka na vang'acha kwantsa kudita lulongwa loluve lunofu au lubi, 12 Lebeka yuvawo akalonjelwaje na Mulungu, "Mwana mulongola kuleleka akuva mupogotsi va mwana yula yo akuleleka mumbele." Ihyo wuhagutsi wa Mulungu wusilaga kota fyo an'gana mwene, na siyo kwa kulava ng'olwa tsa munu. 13 Kota fyo yandikwe mu mandiko ga Mulungu,

"Ntsimuganile Yakobo, lechelelo Esawu ntsimuvipye."

14 Lelo tulonje chichi? Kuta mbe, Mulungu alihela wuwuya? Ndaya! 15 Kwakuva avaga amulonje Musa, "Ngumuwonela lusungu munu yoyuve yo ngugana ngumuwonela lusungu, na kaha ngumuhulumila munu yoyuve yo ngugana kumuhulumila." 16 Hoihyo ndongwa tseka tsihuvilaga lusungu lwa Mulungu na siyo kota hila fyo an'gana munu. 17 Ihyo Mandiko ga Mulungu ganlonga ndongwa tsa Fwalawo kuta, "Ntsakuvisile uve muntsajila, ili kukolela kwa heve ndajile wuvetso wangu na litawa lyangu livikulwe ku inyi tseka." 18 Ino lelo yitselanikaje kuta Mulungu amuhulumilaga munu yoyuve yo akugana kumuhulumila, na manyi agane kumudita munu ave na numbula ng'angafu akumudita ave na numbula ng'angafu.

19 Duve ufuluche umbutse heni kuta, "Manyi ndongwa tsili ihyo, mbona Mulungu angutukalalila kuta tunkosela? Nani yo afuluche asumwane na chila cho an'gana mwene?" 20 Lechelelo bee munu, heve uli nani yo ufuluche ulongane na Mulungu? Mbe, chiya chifuluche chimulonjele muwufi kuta, "Kwasawuli yachi umbufile hino?" 21 Mbe, muwufi si afuluche ave na wuvetso wa kuwumba chiya chimwe chive cha kuhesimilwa na chinji chive sicha kuhesimilwa, kuhuma mu liwulungwa limwe?

22 Hihyo fyoluli kwa Mulungu, aganaga kulajila mbipo yake na wuvetso wake. Duve Mulungu atsindilaga kwa wukangatso wukomi ndalahela na kuvafumilila vala wo vaganikaga kupata mbipo yake, wo vawo wo vaganikaga vakopolwe. 23 Kaha Mulungu aganaga awulajile wukomi wa wuvina wake kwa vanu wo avawonelye lusungu ili vanuchile fifunje fyake, vala wo avadisile vapate wuvina uwo. 24 Ihyo hetwe wo vala wo atuchemile, si kuhuma kwa Vayawudi ng'ani, ila na kuhuma kwa vanu wosi Vayawudi. 25 Kota hila fyo alontsile mu chitabu cha Hoseya,

"Nguvachema, Vanu vangu,

vala wosi vavaga vanu vangu,

kaha ngumuchema, Mwendi vangu,

mwene yosi avaga mwendi vangu,

26 Kaha yikuva hono hala hovalontsilwe kuta, henye si muli vanu vangu.

Ihyo vakuchemwa, Vana va Mulungu yo mumi."

27 Nayo Isaya muloli va Mulungu akavalonjelaje fikami vanu Vaisilaheli, "Nayivaje Vaisilaheli wolofu kota luhanga lwa mubahali, wo vakukuluswa vakuva vanu vadodo hela, 28 kwasawuli Mutwa siakuhava kuvahiga vanu va inyi tseka." 29 Kaha kota Isaya fyo alongwe kulonga, "Manyi Mutwa Mulungu munya wuvetso weka akaave si atulechelye lulelo vana vatunga Vaisilaheli, tukakuva kota muji gwa Sodoma na tuka kuhwanitswa na muji gwa Gomola."

30 Lelo tulonje chinu chachi? Kuta vanu wosi Vayawudi wosi vakasasile vadichilwe na Mulungu, iwo wo Mulungu avagavye vapate kudichilwa kwa kumutumba, 31 ila vanu Vaisilaheli kwa kufwata malajitso ga Musa ga kuvadita vadichilwe na Mulungu, vakalemwaje kudichilwa kwa malajitso igo. 32 Kwasawuli yachi? Vakalemile kitumba, lechelelo vakafwataje ng'olwa tsawo. Vakikuvalaje mu liganga likomi lya kukuvatsa. 33 Kota fyo yandikwe mu Mandiko,

"Lave! Ntsin'vika ku muji gwa Sayuni liganga lya kikuvala,

na litalawe litelefu lya kugwisa, lechelelo kwa yula yo akumutumba Mulungu si akuhonjelwa nyoni nachene."