1 Chila munu an'ganika avahulikitse filongotsi va Silikali, kwasawuli filongotsi veka vahumaga kwa Mulungu, nawo filongotsi vavisilwe na Mulungu. 2 Ihyo munu yo ankuva tebe na filongotsi va Silikali ankuva tebe na lilajitso lya Mulungu, nawo wo van'dita ihyo vakuhigwa. 3 Filongotsi sivavaditaga vanu vawuya vawone muloto, ila vavaditaga vanu vabi vawone muloto. Mbe, un'gana uleche kuwogopa vanya mamulaka? Ihyo un'ganika uditaje finofu, nawo vakukutsumila. 4 Kwakuva filongotsi iwo wo vatantsi va Mulungu wo van'kola katsi kwa fwayida yako. Lechelelo manyi udite fibi un'ganika uwogope, kwasawuli vafuluche vakupele atsabu. Vene wo vatantsi va Mulungu, vavisilwe ili kuvatova vala wo van'dita fibi. 5 Ihyo yin'ganika uvahulikitse filongotsi va Silikali, siyo kwasawuli ya muloto gwa kutowa na Mulungu, ila kwasawuli un'tsela kuta ulo lo lulongwa lo un'ganika kuludita.

6 Kwasawuli yiyo henye munhomba kodi, kwakuva filongotsi iwo vangumutumichila Mulungu kwa katsi iyo, hala ho van'dita kota hila fyo yin'ganika kudita. 7 Muvapelaje chila munu chila cho an'ganika kupelwa, munu mudaya kodi mumuhombaje kodi, munu va kudaya wusulu mumuhombaje wusulu, yo an'ganika kuhesimilwa, mumuhesimilaje.

8 Mulekaje kuva na lulongwa lubi na munu yoyuve, ila mun'ganika kwigana. Kwasawuli munu yo angumugana muyage akuva akwitsitse malajitso ga Mulungu go amupelye Musa. 9 Malajitso igo iga, "Walahogola kudita waafu, walahogola kukopola, walahogola kuhitsa, na kaha walahogola kiwiniwa chinu cha munu yunji." Malajitso gano na gala geka gali mulilajitso ili limwe. "Umuganaje muyago kota fyo ungigana heve mwene." 10 Munu yo angumugana muyage siafuluche amuditile fibi. Duve wugano wo wukwitso wa malajitso ga Musa.

11 Kulutila fyeka, henye mun'tsela kuta tuli luvala lwachi! Uluno lo luvala lwa kulamuka mu tulo, kwasawuli wukuluso wetu wuli habehi ndalahela kulutila hala ho twantsaga kutumbila. 12 Chilo chilutye*, kuli habehi na kwela. Ihyo tuvikaje kutali ndongwa tseka tsa jitsa na tufwale fifwimilo fya ku mwangatsa. 13 Tun'ganika kikala kwa hesima kota hila vanu fyo vaganikaga kikala luvala lwa hamunyi, siyo kwa wuhatufu na wugatsi, na siyo kwa mbwiniwo tsa luswa na waafu, siyo kwa wupungani na wifu. 14 Lechelelo muhotsaje na kudita kota Mutwa venyu Yesu Chilisito, mulekaje kutsidichila mbwiniwo tsa mivili jenyu.