1 Lelo kuduhu kuhigwa chifo kwa vanu vala wo vamutumbye Chilisto Yesu. 2 Kwasawuli seliya ya Muhe va Mulungu yo yingutupela wumi kwa kihantsa na Chilisito Yesu, tsing'ulwise na seliya ya ndongwa ntsibi na chifo. 3 Mulungu aludisile lulogwa lula lo lwasumikaga kukoleka kwa malajitso ga Musa kwasawuli ya wutenyanjifu wa wunu wetu. Ihyo Mulungu amutumile Mwanage munya muvili kota hetwe fyotuli ili atsisume ndongwa ntsibi, na kwa muvili ugo akatsanangaje itso ndongwa ntsibi, 4 Mulungu adisile ihyo ili tudite ndongwa tsila tsotsilajitswe na malajitso ga Musa, ili hetwe wosinambe twikale kwa kutsifwata mbwiniwo tsa muvili, tulongotswe na Muhe va Mulungu. 5 Kwakuva vanu vala wo vangikala kwa kufwata mbwiniwo tsa muvili vahotsaga ndongwa tsa muvili, ila vala wo vanlongotswa na Muhe va Mulungu vahotsaga ndongwa tso an'gana Muhe va Mulungu. 6 Kwakuva mahotso goganlongotswa na muvili galetaga chifo ng'ani, lechelelo mahotso goganlongotswa na Muhe va Mulungu galetaga wumi wa siku tseka na wusichimafu. 7 Siku tseka mahotso ga munu gatelanaga na Mulungu, kwasawuli munu yo anlongotswa na muvili si ahulikitsaga malajitso ga Mulungu, na kaha si akuvetsa kugahulikitsa. 8 Vanu wo vangikala kwa kulongotswa na mbwiniwo tsa muvili sivafuluche vadite kota fyo an'gana Mulungu.

9 Lechelelo manyi Muhe va Mulungu ave mugati mwenyu henye nambe munlongotswa na muvili, ila mukuva munlongotswa na Muhe va Mulungu. Ihyo munu yoyuve manyi ave alihela Muhe va Chilisito, uyo siyo munu va Chilisito. 10 Manyi Chilisito ave ali mugati mwenyu, mivili jenyu jikuva kota jifweye kwa ndongwa ntsibi, ila numbula tsenyu tsinkuva na wumi kwasawuli tsin'dita kota hila fyoan'gana Mulungu. 11 Lechelelo manyi Muhe va Mulungu yo amutsilipwe Yesu angikala mugati mwenyu, akujidita mivili jenyu jo jinya hali ya kufwa jive myumi, akudita ihyo kwa kukolela kwa Muhe vake yo angikala mugati mwenyu.

12 Ihyo lelo vang'olotsangu tutselaje kuta tun'dayilwa lulongwa, situn'ganika kikala kwa kulongotswa mbwiniwo tsa muvili. 13 Kwasawuli manyi mwikale kwa kufwata ndongwa tsa muvili, mukuva mun'gana kufwa. Lechelelo manyi mukopole ng'olwa tsa mivili kwa Muhe va Mulungu, mukikala. 14 Ihyo vanu vala wo vanlongotswa na Muhe va Mulungu, iwo wo vana va Mulungu. 15 Kwakuva simwanuchilye Muhe va wupogotsi yo anguvaletela muhwehwe, ila mwanuchilye Muhe va kuvadita muve vana va Mulungu na kwa yuyo Muhe hetwe tungumuchema Mulungu, "Haba," chinya kulonga, "Dada." * 16 Muhe va Mulungu mwene alongaga mu numbula tsetu, kuta kweli hetwe tuli vana va Mulungu. 17 Duve lelo, manyi tuli vana va Mulungu, tukwanuchila fifunje fyo alontsile Mulungu kuta akuvapela vanu vake, kaha tukupata fifunje ifyo hamwe na Chilisito. Eena, manyi twihantse na mwene mu ng'odeko tsake, kaha tukuva hamwe nayo mu wumelemo wake.

18 Ng'odeko tsa luvala luno lwa sambi ntsingutsiwona kota si chinu ndaya, manyi nywanitse na wuvina wula wa Mulungu wo akutupela uko kulutalo. 19 Kwakuva fiwumbe fyeka fin'tsinda kwa hamu ngomi, hala Mulungu ho akugubula kuva vanage wo vanani. 20 Ihyo finu fyeka fyavisilwe mu wutenyanjifu, siyo kwa kugana fyene, ila kwasawuli yake mwene Mulungu. Nambe ihyo kung'acha kuna lihuvi. 21 Nafyo fiwumbe fyene nafyo fikukuluswa mu wupogotsi na wutenyanjifu, hala hofikwinjila mu wuvina wa vana va Mulungu. 22 Tun'tsela kuta fiwumbe fyeka fintamika hohamwe, nafyo fina wusungu wukomi kota wula wa mudala kulela mwana. 23 Kaha siyo fiwumbe ifyo ng'ani, lechelelo na hetwe yo tuna Muhe va Mulungu yo chifunje chilongola cha Mulungu, kaha na hetwe tung'ung'uta mu numbula tsetu kwa kuntsinda kuditwa kuva vana Mulungu na mivili jetu jigombolwe. 24 Kwasawuli kwa lihuvilo ilyo hetwe twakuluswe, lechelelo lihuvilo likuva na katsi yachi manyi tunguchiwona chila cho tuchihuvilije. Mbe, munu vachi yo atsindilaga chinu cho mwanga achiwene? 25 Lechelelo manyi tunguchihuvila chinu cho tulihela, ihyo tuchitsindaga kwa kikangatsa.

26 Hetwe tulivatenyanjifu, ila Muhe va Mulungu atutangaga, kwasawuli tulemwaga kusuka hila fyo yin'ganika, lechelelo Muhe mwene atusuchilaga kwa Mulungu kwa kuguta ko sikufuluche kulonjeche. 27 Mwene Mulungu yo alolaga mbaka mugati mu numbula tsa vanu na an'tsela chila cho anhotsa Muhe, kwasawuli uyo Muhe va Mulungu avasuchilaga vanu kota fyo an'gana Mulungu.

28 Hetwe tun'tsela kuta mu ndongwa tseka Mulungu akolaga katsi hamwe na vala veka wo vangumugana na avapelaga ndongwa nofu, wo vala wo vachemilwe kota hila fyo an'gana mwene. 29 Vanu vala wo avahagwe luhuma katali, wo avabagwe ili vihwane na Mwanage, ili uyo Mwanage ave mulelwa mulongola hagati ha vang'olotse wolofu. 30 Nawo vala yo alongwe kuvahagula luhuma katali, iwo wo akavachemaje, nawo wo avachemile, wo iwo wo avadisile vave vawuya, na vala wo avadisile vave vawuya, wo iwo akavavikaje mu wumelemo wake.

31 Lelo tulonje chichi kwa ndongwa itso? Manyi Mulungu ave lubali lwetu, nani yo afuluche asumane na hetwe? 32 Mulungu alesile kumutanila Mwana vake va wiyeka, ila amutawe kwasawuli yetu hetwe tweka. Manyi adisile ihyo akulemwa kutupela chinu chinji chochive cho tun'gana? 33 Nani yo akuvalonjeletsa vahagulwa va Mulungu? Kwasawuli Mulungu mwene mwanga avadichye vave vanu vake. 34 Lelo nani yo afuluche avahije kuta mukosise? Kwasawuli Chilisito Yesu yo afweye, kulutila ifyo fyeka akatsilipukaje, ichite lubali lwa wutavala wsa Mulungu. Nayo yo angutusuchila hetwe. 35 Nani yo afuluche kutulekanitsa na wugano wa Chilisito? Mbe, ntsala awu ng'odeko awu wusawufu, awu ng'oko awu chifo, awu wugayu? 36 Kota fyo yandikwe mu Mandiko ga Mulungu kuta,

"Kwasawuli ya heve tumfwimwa hamunyi na hachilo,

tunkuva kota ng'olo tsa kusintswa."

37 Lechelelo kwa ndongwa itso tseka hetwe tuli vasumi nachene, kwasawuli tuntangwa na Chilisito yo atuganile 38 Kwasawuli mwanga ntseliwe nachene kuta, kuduhuli chinu cho chive cho chifuluche chitubagule na wugano wa Mulungu, siyo chifo awu wumi, vave vatantsi va kilanga va Mulungu awu vanya mamulaka, awu fyo finhumila sambi awu fyo fikuhumila hambele awu vanya wuvetso, 39 awu inyi ya kilanga awu inyi ya hasi ndalahela. Kuduhuli chinu chochive cho chifuluche chitulekanitse na wugano wa Mulungu wowuli kwa Chilisito Yesu Mutwa vetu.