1 Krataa he fi Paul, bɔ Nyameɛ adaworoma wafrɛ me kyɛ mmanyɛ Kristo Yesu somafoɛ, ɔne yɛliema Sostene berɛ;

2 Yɛfa yɛkɔma Nyameɛ asafo bɔ ɔwɔ Korinto ne. Metworɔ mebrɛ ɛmɔ bɔ bate ɛmɔ nwo wɔ Kristo Yesu nu, na bafrɛ ɛmɔ kyɛ ɛmɔɔyɛ akrongronfoɛ, ɔne bɛ bɔ bɛbɔ y’Awurade Yesu Kristo dumaa wɔ nekaa biala ne; ɔte yɛ ne bɛ mukoraati Awurade:

3 Adom ne asomdwie bɔ ofi yɛ Baba Nyameɛ ne y’Awurade Yesu Kristo berɛ ha ɛmɔ.

4 Nyameɛ adom bɔ wafa wama ɛmɔ wɔ Kristo Yesu nu nati, daa meda Nyameɛ ase mema ɛmɔ, 5 na ye ti, ɛmɔ anya nikye biala maa waboso, dwudwolɛ ne nimdeɛ mukoraati, 6 na sɔ ala yeɛ Kristo nwo adanzeɛ ne atira ndii wɔ ɛmɔ nu ɔ. 7 Yeti, ɛmɔle akyɛdeɛ namukoraati bie, na ɛmɔ nwondɛ paa kyɛ y’Awurade Yesu Kristo kɔla ye nwo ali. 8 Na ɔkɔmaa ɛmɔ bo kotimu koodwu awieɛ, kyɛbɔ ɔkɔyɛ a y’Awurade Yesu Kristo kyẽa ne, edwirɛ biala ngɔwa ɛmɔ nwo ɔ. 9 Nyameɛ bɔ wafrɛ ɛmɔ kyɛ ɛmɔ ne Ɔwa bɔ yeɛ ole y’Awurade Yesu Kristo fa adamvoa ne, ɔte ebie bɔ odi nahorɛ.

10 Aliemaa mɔ, mefa y’Awurade Yesu Kristo dumaa mesrɛ ɛmɔ kyɛ, ɛmɔ mukoraati, ɛmɔnya adwene kõ, ná mbakye-mbakye-muɛ biala amma ɛmɔ nu. Ná wamaa ɛmɔ mukoraati ɛmɔ ayɛ kõ wɔ adwene kõ, ne nzusuyɛɛ kõ nu. 11 Nniema mɔ, Kloe awurofoɛ nemɔ bie abɔ me amaneɛ kyɛ, ɛmɔ afia ndwo koraa. 12 Bɔ mekyire yeɛ ole kyɛ, edwirɛ bɔ ɛmɔ nu biala ka yeɛ ole kyɛ: "Nde Paul deɛ," "Me de, nde Apolo deɛ," ebiemɔ koso nwa "Nde Kefa deɛ," yeɛ "Nde Kristo deɛ." 13 Ma mmisa ɛmɔ, Kristo nu akyekyɛ hɔ? Ná Paul yeɛ bɛbɔle ye asɛnnua nu bɛmane ɛmɔ hɔ? Anaa bɛbɔle ɛmɔ asu wɔ Paul dumaa nu? 14 Meda Nyameɛ ase paa kyɛ mammɔ ɛmɔ nu biala asu, sana Krispo ne Gaius, 15 ná wamma ɛmɔ nu biala anga kyɛ me dumaa nu yeɛ ɔbɔle asu ɔ. 16 Ɔwɔ nu, nza mmɔle Stefana awurofoɛ asu, nakoso ɛhene si ne, mengaye kyɛ mmɔle ebiala asu. 17 Ofikyɛ Kristo anzoma me kyɛ mma mmɔ asu, mmom mmanga nzɛmba ne, na nná sona nyanza yeɛ ɔfa somane me ɔ, ná Kristo asɛnnua né anyɛ mbaen.

18 Na bɛ bɔ bamini* ne de, asɛnnua nanwo dwirɛ ne te ngwaseasɛm ma bɛ, nakoso, yɛ bɔ bedɛ yɛ ngoa ne de, ɔte Nyameɛ tumi. 19 Na wahworɔ kyɛ:

"Ngɔmaa anyansafoɛ nyanza kɔsɛkye,

na mamaa animdefoɛ nimdeɛ ayɛ mbaen."

20 Nyanzaniɛ wɔ nisua? Na Ɔtwerɛfoɛ* wɔ ni? Na bɔ osu aporowaa wɔ wiase nanu ne wɔ ni? Aso Nyameɛ mmane wiase nyanza yɛle ngwaseasɛm? 21 Ná Nyameɛ nyanza ti, wiase ne angora amva bɛ nyanza so annwu Ye, ná edwirɛ bɔ yɛka, bɔ wiase ne bu ye kyɛ ɔte ngwaseasɛm ne, ɛhene yeɛ Nyameɛ nye gye ye nwo kyɛ ɔkɔfa so kole bɛ bɔ bedɛ bɛdi ne ngoa ɔ. 22 Yudafoɛ pena nzɛngyerɛneɛ, na Greekfoɛ pena nyanza, 23 nakoso yɛ de, yɛka Kristo bɔ bɛbɔle ye asɛnnua nu nanwo dwirɛ. Sɔ dwirɛ ne, ɔto Yudafoɛ sintidua, na ɔte ngwaseasɛm ma maen-maen ne. 24 Nakoso bɛ bɔ bafrɛ bɛ ne de, Yudafoɛ oo, Greekfoɛ oo, Kristo te Nyameɛ tumi ne Nyameɛ nyanza ma bɛ. 25 Ofikyɛ Nyameɛ nikye bɔ bɛbu ye kyɛ ɔte ngwaseasɛm ne, ɔse nworɛ tra sona, na bɔ bɛnwu ye kyɛ ɔyɛ mmerɛ ne, ye nwo yɛ se tra sona.

26 Afei aliemaa mɔ, sɛ ɛmɔnea ɛfrɛlɛ bɔ ɔfrɛle ɛmɔ ne a, sona nye so de ɛmɔ nu pee nze nworɛ, pee nala lle tumi, ná pee nala tte nnehyeɛ. 27 Nakoso bɔ ewiase ne bu ye kyɛ ɔte ngwaseasɛm ne, ɛhene yeɛ Nyameɛ afa kyɛ ɔfa gua bɛ bɔ bɛse nworɛ ne nyunu ase; na bɔ bɛbu ye kyɛ ɔyɛ mmerɛ ne, wafa kyɛ ɔfa gua bɛ bɔ bɛ nwo yɛ se ne nyunu ase. 28 Na nningyein bɔ ewiase ne nwu ye kyɛ mvasoɛ nne so, bɛbu yɛ animtia, na bɛnwu ye kyɛ ɔtte hwee ne, ɛhene yeɛ Nyameɛ afa kyɛ ɔfa sɛkye nningyein bɔ ewiase ne nwu ye kyɛ ye nwo hia ne, 29 kyɛbɔ ɔkɔyɛ a, ebiala ngɔhoɔhoa ye nwo wɔ ye nyunu ɔ. 30 Na Nyameɛ yeɛ wamaa ɛmɔ ne Kristo Yesu ayɛ kõ ne, Kristo bɔ wamaa yanwu Nyameɛ nyanza ne ye tenenee, ye yeɛ wate yɛ nwo, na ɔnate agyedeɛ naso alɛ́ yɛ, 31 kyɛbɔ ɔkɔyɛ a bɔ bahworɔ ne kɔwa nu kyɛ: "Bɔ ɔhoɔhoa ye nwo ne, ma ɔhoɔhoa ye nwo wɔ Awurade nu."