1 Aliemaa mɔ, mene ɛmɔ angora andwudwo kyɛ mmenia bɔ honhom kyire bɛ atee, mmom kyɛ mmenia bɔ bɛli b’akɔnnɔ si, te kyɛ Kristo nu ngwalaa. 2 Mmane ɛmɔ nyɔfonesue, mamma ɛmɔ aleɛ bɔ ɔyɛ se, ofikyɛ né ɛmɔ ngɔhora aleɛ bɔ ɔyɛ se di, na kesaalae po, ɛmɔ ngɔhora ye di, 3 ofikyɛ ɛmɔtɛ́ li ɛmɔ akɔnnɔ si. Na sɛ ahoɔyaa wɔ ɛmɔ nu, ná ɛmɔ afia ndwo a, ye de, nnaa ɛmɔ akɔnnɔ si yeɛ ɛmɔli ɔ? Na nná bɔ wiase ne yɛ ne bie yeɛ ɛmɔyɛ ne? 4 Na sɛ ɛmɔ nu bie ka kyɛ "Nde Paul deɛ," na foforɛ koso ka kyɛ "Nde Apolo deɛ" a, nná bɔ wiase ne yɛ ne biala yeɛ ɛmɔyɛ ne?

5 Apolo yeɛ ole nwa? Na Paul koso yeɛ ole nwa? Yɛte asomvoɛ bɔ Awurade afa adwuma awura yɛ sa, bɔ ɛmɔ nate yɛ so bɛɛyɛle gyidifoɛ ɔ. 6 Me de, nnuale, Apolo koso guale so nzue, nakoso Nyameɛ yeɛ ɔmaa onyini ɔ. 7 Yeti bɔ oluale ne, ɔne bɔ oguale so nzue ne de, bɛtte hwee, Nyameɛ mmom yeɛ ɔyɛ nikye bie ɔ, ye yeɛ ɔmaa onyi ɔ. 8 Na bɔ oluale ne, ɔne bɔ oguale so nzue ne te kõ, na ebiala konya ye akatua kyɛbɔ ye adwuma te ɔ. 9 Ofikyɛ yɛne Nyameɛ yeɛ yɛyɛ adwuma ɔ, ɛmɔte Nyameɛ boo, Nyameɛ sua.

10 Ɔnate adom bɔ Nyameɛ afa ama me nati, ndole fapem ne kyɛ berekyaniɛ bɔ ɔse adwuma paa, na sona foforɛ koso to ye deɛ sie so. Nakoso, odikyɛ ebiala nea bɔ ɔfa toa so ne yé. 11 Na Yesu Kristo yeɛ ole fapem bɔ bato ne, ye si ne, ebiala ngɔhora nngɔto fapem biala kõ. 12 Na sɛ ebie fa sikaa kɔkorɛ, dwetɛ, nyɔboɛ pa, bakaa, ɛserɛ, anaa ɛmo nwura toa fapem naso a, 13 ebiala adwuma kɔye ye nwo ali, ofikyɛ kyẽa ne kɔmaa ɔkɔla ali. Na see yeɛ ɔkɔmaa ɔkɔla ali ɔ, see ne yeɛ ɔkɔmaa yekonwu adwuma bɔ ebiala ayɛ ɔ. 14 Sɛ ebie adwuma bɔ wafa watoa fapem naso ne kora gyina see ne noa a, okonya ye nwo akatua, 15 na sɛ ɔyera a, ɔkɔhwere nikye, na ye bɔbɔ de, bɛkole ye ngoa. Nakoso ɔkɔyɛ kyɛ balɛ́ ye bafi see nu ne.

16 Aso, ɛmɔnze kyɛ ɛmɔte Nyameɛ asɔre Awuro, ma yeti Nyameɛ honhom te ɛmɔ nu? 17 Na sɛ ebie sɛkye Nyameɛ asɔre awuro ne a, Nyameɛ kɔsɛkye ye; ofikyɛ Nyameɛ asɔre awuro ne te krongron, na ɛmɔ yeɛ ɛmɔte asɔre awuro ne.

18 Nnɛmaa ebiala laka-laka ye nwo, sɛ ɛmɔ nu bie adwene yɛ ye kyɛ ɔse nworɛ wɔ wiase he anu a, ma ɔyɛ kwasea, na wamaa wanwu nworɛ. 19 Ofikyɛ ewiase he anu nyanza te ngwaseasɛm wɔ Nyameɛ nye so, na kyɛbɔ bahworɔ ne: "Ngaen bɔ anyanzafoɛ afa bɛ anyeteɛ aswa ne, ɔmaa ɔkye bɛ bɔbɔ." 20 Na osa ka ye bieku kyɛ: "Awurade se kyɛ anyanzafoɛ nzusuyɛɛ te mbaen." 21 Yeti, nnɛmɔfa bɔ sona ayɛ bɛhoɔhoa ɛmɔ nwo, ofikyɛ nikye biala te ɛmɔ deɛ. 22 Yeti, Paul oo, Apolo oo, Kefa oo, ewiase oo, ngoa oo, ewue oo, bɔ ɔwɔ berɛ ɛnɛ oo, bɔ ɔkɔwa kyẽabie oo, ye mukoraati te ɛmɔ deɛ, 23 na ɛmɔte Kristo deɛ, yeɛ Kristo koso te Nyameɛ deɛ.