1 Coríntios 5

1 Baabɔ yɛ amaneɛ kyɛ, adwamammɔ kɔ so wɔ ɛmɔ nu, adwamammɔ bɔ ɔngɔ so wɔ maen-maen ne po nu, yeɛ ole kyɛ, ebie alɛ́ ye baba aye. 2 Ná ɛhe yeɛ ɛmɔfa bɛhoɔhoa ɛmɔ nwo ne? Odikyɛ ahaa ɔyɛ ɛmɔ aworabɔ, na ɛmɔye sɔ sona ne bɛfi ɛmɔ nu. 3 Ɔwɔ nu, nne berɛ anwoɔnaen nu, nakoso nwɔ berɛ honhom nu, na mabu sɔ sona ne atɛn dada, te kyɛ ɛnwa nwɔ berɛ nala. 4 Sɛ ɛmɔyia nu wɔ y’Awurade Yesu dumaa nu, na ɛmɔnwu ye kyɛ mene ɛmɔ wɔ berɛ honhom nu, bɔ y’Awurade Yesu tumi boka ɛmɔ so a, 5 ɛmɔye sɔ sona ne bɛwura Satan sa ma ɔsɛkye anwoɔnaen ne, ná Awurade kyẽa ne, balɛ́ ye honhom ne ngoa.

6 Ɛhe bɔ ɛmɔfa bɛhoɔhoa ɛmɔ nwo ne de, ɔttemaye. Ɛmɔnze kyɛ yiste kaa bie yeɛ ɔmaa mɔle namukoraati nu ka*5:6 Anaa "Tu." ɔ? 7 Ɛmɔye yiste daa ne bɛfi ɛmɔ nu, na wamaa ɛmɔ ayɛ mɔle foforɛ bɔ enu nga ɔ. Ofikyɛ bafa Kristo bɔ ɔte yɛ Pɛnu boan ne babɔ afɔleɛ dada. 8 Yeti nnɛmɔ maa yɛfa yiste, anaa bɔne ne amumuyɛɛ yɛdi afahyɛ ne, mmom ɛmɔma yɛfa paanoo bɔ yiste nne nu, bɔ yeɛ ole adwene bɔ enu te, ɔne nahorɛlilɛ yɛli.

9 Krataa bɔ nni moa ndworɔ mmerɛle ɛmɔ nanu ne, nga ngyirele ɛmɔ kyɛ, nnɛmɔfa bɛ bɔ bɛbɔ adwaman ne adamvoa. 10 Nakoso nná wiase nanufoɛ bɔ bɛbɔ adwaman, bɛ nye boro nikye, bɛbɔ apoo, anaa bɛsõ bosoen yeɛ né menwa ɛmɔhwe ɛmɔ nwo bɛfi bɛ nwo hɔ oo. Sɛ sɔ a, ahaa sana ɛmɔfi wiase nanu. 11 Kesaalae de, bɔ metworɔ mebrɛ ɛmɔ yeɛ ole kyɛ, sɛ ebie te aliemaa, ná ɔte adwamammɔfoɛ, ye nye boro nikye,*5:11 Anaa "Ɔte adufum; Okuro adufudeɛ." ɔsõ bosoen, ɔbɔ amanvoɛ alapaa, ɔte kɔwenzaniɛ, anaa ɔbɔ apoo a, ɛmɔne ye pɛ adamvoa nu.*5:11 Anaa "Nnɛmɔfa ye adamvoa." Sɔ sona ne, nnɛmɔ ne ye didi po. 12 Bɛ bɔ benne asafo nanu ne, nzuati yeɛ odikyɛ mebu bɛ atɛn ɔ? Nná bɛ bɔ bɛwɔ nu ne yeɛ odikyɛ mebu bɛ atɛn ɔ, 13 na Nyameɛ koso abu bɛ bɔ benne nu né atɛn? "Ɛmɔye ɔbɔnefoɛ bɛfi ɛmɔ nu."