1 Petro, bɔ nde Yesu Kristo somafoɛ,

metworɔ krataa he mebrɛ ɛmɔ bɔ ɛmɔ abɔ bapete Ponto, Galatia, Kapadokia, Asia, ne Bitinia ne. Ɛmɔ bɔ baye ɛmɔ, 2 kyɛbɔ Nyameɛ bɔle ye ti anu ne. Ɔfale honhom krongron ne tele ɛmɔ nwo, kyɛbɔ ɔkɔyɛ a ɛmɔ kɔyɛ sotie bɛkɔma Yesu Kristo, na wafa ye mogya ne wapete ɛmɔ nwo.

Adom ne asomdwie ha ɛmɔ ma obu so.

3 Ayɛyie ha Nyameɛ, y’Awurade Kristo Yesu Baba ne. Ye anwunvoin ti, otingyele Yesu fili ewue nu, na ɔnate so awo yɛ foforɛ maa yanya anidasoɛ bɔ ngoa wɔ nu, 4 wamaa yanya agyapadeɛ bɔ ɔmborɔ, ɛfiɛ nne ye nwo, na ɔnzɛkye. Wafa sɔ anidasoɛ ne wasie anwuro wama ɛmɔ. 5 Ɛmɔ gyidie ti, Nyameɛ fa ye tumi bɔ ɛmɔ nwo waen, kyɛbɔ ɔkɔyɛ a ɛmɔ konya ngoa bɔ bɛbaala ye ali wɔ awieɛ mmerɛ nanu ne. 6 Ɛhe ati yeɛ ɛmɔdi ahurusi ne, ɔwɔ nu, kesaalae de ɔhaw bɔ ɛmɔyia ne maa ɛmɔ wora bɔ, nakoso sɔ ala yeɛ odikyɛ ɔba ɔ, 7 kyɛbɔ ɔkɔyɛ a kyẽa bɔ Yesu Kristo kɔla ye nwo ali ne, ɛmɔ gyidie bɔ basɔ banea ne kɔfa nidie, anuonyam, ne ayɛyie kɔwa; sɔ gyidie ne sombo tra sikaa kɔkorɛ bɔ bɛ afa bafa see nu po. 8 Ɔwɔ nu, ɛmɔ annwu Ye, nakoso ɛmɔ dɔ Ye, kesaalae ɛmɔnnwu ye, nakoso ɛmɔdɛ́ ye bɛdi. Na ɛmɔ nye agye paa bɔ ɛmɔdi ahurusi, 9 ɛmɔ gyidie ti, ɛmɔ konya ngoa.*

10 Sɔ ngoa ne, adiifoɛ bɔ bɛhyɛle adom bɔ ɛmɔ konya ye nanwo ngɔm ne neɛneane nu yé, na bɛyɛle nhwehwɛmuɛ bɛhɔle siɛ, 11 kyɛbɔ ɔkɔyɛ a, bekonwu bɔ ɔkɔto Kristo ne, ɔne mmerɛ bɔ okosisi ne. Ofikyɛ honhom bɔ ɔwɔ bɛ nu ne ha hyirele bɛ kyɛ, né Kristo konwu amaneɛ, na yesi ne, bɛkɔhyɛ ye anuonyam. 12 Na bɛmaa bɛnwuni* kyɛ, ɔsom adwuma bɔ bɛyɛ ne, bɛnyɛ bɛmma bɛ nwo, mmom bɛyɛ bɛma ɛmɔ bɔ kesaalae bɛka sɔ dwirɛ ne bɛkyire ɛmɔ ne. Na yeɛ ole nzɛmba bɔ honhom krongron fili anwuro hane ebiemɔ maa bɛha bɛhyirele ɛmɔ ne. Sɔ nningyein, né abɔfo po pena kyɛ bɛnwu nu.

13 Yeti ɛmɔsiesie ɛmɔ adwene bɛma adwuma ne, ɛmɔma ɛmɔ nye la berɛ, ɛmɔfa ɛmɔ nye bɛto adom bɔ Yesu Kristo da ye nwo ali a, bɛkɔfa bɛkɔma ɛmɔ naso. 14 Ɛmɔyɛ kyɛ ngwalaa bɔ bɛ so yɛ mmerɛ, na akɔnnɔ bɔ né ɛmɔli ye si mmerɛ bɔ ne ɛmɔnze hwee ne, nnɛmɔ kɔ ye nwo kõ. 15 Mmom ɛmɔyɛ krongron wɔ nikye biala nu, ofikyɛ Bɔ ɔfrɛle ɛmɔ ne te krongron, 16 na bahworɔ kyɛ: "Ɛmɔyɛ Krongron, ofikyɛ nde krongron." 17 Baba bɔ ɛmɔbɔ ye mbaeɛ ne, obu atɛn a ɔnnea sona nyunu, mmom obu ye kyɛbɔ ebiala adwuma te, yeti ɛmɔfa esuronyi bɛbɔ ɛmɔ bra, mmerɛ bɔ ɛmɔ ayɛ ɛwɔfoɛ wɔ wiase ne. 18 Ofikyɛ ɛmɔse kyɛ, abrabɔ tɛɛ bɔ ɛmɔ baba mɔ fa yakyile ɛmɔ ne, nná nningyein bɔ ɔporɔ te kyɛ dwetɛ ne sikaa kɔkorɛ yeɛ ɔfa tɔle ɛmɔ fili nu ɔ, 19 mmom Kristo mogya bɔ ɔsom bo ne, boan ba bɔ dɛm ne ngekayɛɛ biala nne ye nwo né mogya. 20 Bɛyele ye kora yeɛ bɛbaabɔ wiase, nakoso ɛmɔ ti, bɛlale ye ali wɔ awieɛ mmerɛ nanu. 21 Na ɔnate ye so yeɛ ɛmɔdɛ́ Nyameɛ bɛdi ɔ, ofikyɛ Nyameɛ yeɛ otingyele ye fili ewue nu na ɔhyɛle ye anuonyam kyɛbɔ ɔkɔyɛ a, ɛmɔ konya gyidie ne anidasoɛ wɔ Nyameɛ nu.

22 Kesaalae, ɛmɔ ayɛ asoɛ bama nahorɛ ne bafa bate ɛmɔ nwo, na wamaa ɛmɔ anya ɔdɔ bɔ nyaatwom nne nu bama ɛmɔ nwo, yeti ɛmɔfi ɛmɔ ahone nu bɛdodɔ ɛmɔ nwo paa. 23 Ofikyɛ bafa Nyameɛ bɔ ɔte ase daa ne dwirɛ ne bawo ɛmɔ foforɛ, ɛhe de, ɔtte nikye bɔ ɔporɔ ɔ, mmom nikye bɔ ɔmborɔ. 24 Ná,

"Anwoɔnaen* mukoraati te kyɛ ndire,

na b’anuonyam te kyɛ flawa,

Ndire ne kese, ná flawa ne aporo.

25 Nakoso Awurade dwirɛ de, ɔwɔ berɛ daa."

Sɔ dwirɛ he yeɛ ole nzɛmba bɔ bɛha behyirele ɛmɔ ne.