1 Ɔnate kyɛ Kristo nwuni amaneɛ anwoɔnaen nu nati, ɛmɔ koso, ɛmɔnya sɔ adwene nala bie na ɛmɔmia ɛmɔ nye, ofikyɛ ebiala bɔ wanwu amaneɛ anwoɔnaen nu ne, wahwe ye nwo wafi bɔne nwo, 2 kyɛbɔ ɔkɔyɛ a ye ngyẽa bɔ waha wɔ anwoɔnaen nu ne, ɔngɔtena ase ngɔma sona akɔnnɔ kõ, mmom ɔkɔyɛ bɔ Nyameɛ kuro ɔ. 3 Na mmerɛ bɔ ɛmɔfa bɛyɛle nningyein bɔ maen-maen ne kuro ne, ɛhene te pa. Sɔ mmerɛ ne, ɛmɔ fale ɛmɔ nwo bɛwurale ahohwibra, akɔnnɔ bɔne, nzãa bolɛ, paati bɔ yebo gye-gyee-gye, akɔwenzafoɛ fekue, ɔne abosonsom bɔ ɔyɛ tɛ nu. 4 Ɔnate kyɛ, afei de ɛmɔmva ɛmɔ nwo benwura sɔ bra-bɔne nanu kõ nati, ɔyɛ bɛ nwanwa, na bɛkeka ɛmɔ nwo dwirɛ tɛɛ. 5 Nakoso sɔ mmenia hemɔ kobu ngondaa kohyire bɔ okobu ateasefoɛ ne awufo mukoraati atɛn ne. 6 Na ɛhe ati yeɛ bɛhane nzɛmba ne bɛhyirele awufo po ne, na sɛ bɛbu bɛ atɛn anwoɔnaen nu wɔ sona nye so a, Nyameɛ nye so de, honhom ne kohyire b’abrabɔ atee.

7 Nakoso, nningyein mukoraati awieɛ apingye; yeti ɛmɔma ɛmɔ nye la berɛ, na ɛmɔyɛ krado kyɛ ɛmɔ kɔbɔ mbaeɛ daa biala. 8 Bɔ ɔtra so ne, ɛmɔdodɔ ɛmɔ nwo paa, ofikyɛ ɔdɔ kata bɔne pee so. 9 Ɛmɔte ɛmɔ nyunu bɛsõ ɛmɔ nwo wɔfoɛ. 10 Na akyɛdeɛ bɔ ɛmɔ nu biala anya ye ne, ɛmɔfa bɛsõ ɛmɔ nwo, kyɛ ebie bɔ bafa Nyameɛ adom akyɛdeɛ bɔ ɔyɛ adwuma wɔ atee pee so ne bawura ye sa. 11 Sɛ ebie dwudwo a, ma ɔha ye kyɛ Nyameɛ dwirɛ; sɛ ebie sõ a, ma ɔfa ye nwo to anwoserɛ bɔ ofi Nyameɛ berɛ naso, kyɛbɔ ɔkɔyɛ a, nikye biala nu ne, bɛkɔfa Yesu Kristo so bɛkɔhyɛ Nyameɛ anuonyam. Ye yeɛ anuonyam ne anwoserɛ te ye deɛ daa, daa. Amen.

12 Adɔfo, nzɔhwɛ bɔ wato ɛmɔ, bɔ wamaa ɛmɔ nwo yerɛ-yera ɛmɔ ne, nnɛmɔ maa ɔyɛ ɛmɔ nwanwa kyɛ ɛnwa nikye foforɛ bie yeɛ wato ɛmɔ ne. 13 Mmom, ɛmɔma ɛmɔ nye gye kyɛ ɛmɔ anwu Kristo amaneɛ ne bie, na sɛ bɛda ye anuonyam ne ali a, ɛmɔ nye agye abo so. 14 Sɛ Kristo dumaa nati, bɛpepɛ ɛmɔ nzoaa a, ɛmɔma ɛmɔ nye gye, ofikyɛ Nyameɛ honhom bɔ ɔte anuonyam honhom ne wɔ ɛmɔ so. 15 Nakoso, nnɛmaa ɛmɔ nu biala nwu amaneɛ kyɛ wudiniɛ, awieniɛ, nnipa-bɔneniɛ, anaa ebie bɔ ɔfa ye nwo wuro-wura amanvoɛ dwirɛ nu. 16 Na Kristoniɛ bɔ ɛte nati, sɛ ɛmɔnwu amaneɛ a, ɔnyɛ nyã,* mmom ɔhyɛ Nyameɛ anuonyam kyɛ sɔ dumaa ne la ɛmɔ so ɔ. 17 Mmerɛ aso kyɛ atemmuo hyɛ yebo fi Nyameɛ awuro. Na sɛ bɛfa yɛ bɛhyɛ yebo a, nzaade bɛ bɔ bɛndie Nyameɛ nzɛmba ne, okoyie bɛ sɛ? 18 Na sɛ,

"Ɔkɔyɛ se kyɛ bekole teneneeniɛ ngoa a,

ye de, bɔ onzuro Nyameɛ ne, ɔne ɔbɔnefoɛ kogyina nisua?"

19 Ye de, bɛ bɔ Nyameɛ apɛdeɛ ti bɛnwu amaneɛ ne, ma bɛhɔ so bɛyɛ pa, na bɛfa bɛ nwo bɛwura Ɔbɔadeɛ bɔ odi nahorɛ ne sa.