1 Sɔ ala yeɛ odikyɛ mmrasua bɔ bagya ne brɛ bɛ nwo ase ma bɛ humɔ, na sɛ bandie edwirɛ ne a, ɛmɔ suban pa nati, ɛmɔ konya bɛ, bɔ ɛmɔ ngodwudwo ɔ. 2 Ofikyɛ bɛkɔfa bɛ nye bekonwu ɛmɔ suban pa ne obuo bɔ ɔkɔ siɛ ne. 3 Nnɛmɔ maa ɛmɔ anwoyemene* gyina nningyein bɔ anyeɛ nwu ye ne ngome so, te kyɛ tiri bɔ ɛkɔbɔ, agudeɛ bɔ ɛkɛfa kosiesie wɔ nwo, anaa ndadeɛ pa bɔ ekowura. 4 Mmom, ɛmɔma ogyina nningyein bɔ ɔnzɛkye so, ɛhene yeɛ ole kyɛbɔ sona ne te deinn wɔ ye ahone nu, honhom bɔ odwo na ɔbrɛ ye nwo ase, ɛhene yeɛ ɔsom bo ma Nyameɛ ɔ. 5 Ofikyɛ sɔ ala yeɛ tete ne, mmrasua bɔ bɛte krongron ne siesiele bɛ nwo ɔ. Bɛfale bɛ nwo bɛtole Nyameɛ so, na bɛbrɛle bɛ nwo ase bɛmane bɛ humɔ, 6 kyɛbɔ Sara tiele Abraham na ɔfrɛle ye me wura ne. Ɛmɔ koso, sɛ ɛmɔkɔ so bɛyɛ nikye pa, na ɛmɔ amma esuronyi anga ɛmɔ a, né ɛmɔte ye mmaa mɔ.

7 Huɛ mɔ, ɛmɔ koso, ɛmɔte mmrasua nemɔ bo,* ɛmɔfa nidie bɛma bɛ, na ɛmɔkaye kyɛ bɛyɛ mmerɛ bɛtra ɛmɔ. Ná ɛmɔ mbaeɛ nwo atee anzi, ofikyɛ ngoa bɔ bafa balo ɛmɔ ne,* bɛ koso bɛboka so.

8 Afei, ɛmɔ mukoraati, ɛmɔnya adwene kõ, ɛmɔnwu ɛmɔ nwo anwunvo, na ɛmɔnya onuadɔ, ahunu-ndetelɛ, ne anwobraseɛ. 9 Nnɛmɔfa bɔne betua bɔne so, sɛ ebie pɛ ɛmɔ nzoaa, nnɛmɔpɛ ye bie. Mmom ɛmɔhyira mmenia, ná ɛmɔ koso ɛmɔ anya nhyira, ofikyɛ sɔ asetena he ati yeɛ bɛfrɛle ɛmɔ ɔ. 10 Ná,

"Ebiala bɔ okuro ngoa,

na ɔpena kyɛ ye nye gye ne,

ɔnea yé na wamva ye temverema wanga mmusue dwirɛ,

ɔnea yé na wanlaka-laka mmenia;

11 ɔhwe ye nwo fi bɔne ye nwo, na ɔyɛ pa,

ɔpena asomdwie na oli ye si.

12 Ofikyɛ Awurade nye wɔ ateneneefoɛ so,

na watɛ ye so bɔ otie bɛ mbaeɛ.

Nakoso, bɛ bɔ bɛyɛ bɔne ne de,

Awurade nye kyi bɛ."

13 Sɛ ɛmɔfa besie ɛmɔ nye so kyɛ ɛmɔ kɔyɛ nikye pa a, nwa yeɛ ɔkɔha ɛmɔ ɔ? 14 Na sɛ tenenee ti ɛmɔnwu amaneɛ a, ɛmɔ nye kɔgye. "Nnɛmɔ maa bɛ nwo suronyi tɔ ɛmɔ so, na nnɛmaa ɛmɔ kunu tete ɛmɔ." 15 Mmom, ɛmɔ ahone nu de, ɛmɔnwu ye kyɛ Kristo te krongron, na ɔte Awurade. Ɛmɔ boɔboa ɛmɔ nwo besie kyɛ ebiala bɔ okobisa anidasoɛ bɔ ɛmɔle ye nanwo dwirɛ ne, ɛmɔ kɔye ye noa. Nakoso ɛmɔyɛ ye wɔ anwobraseɛ* ne nidie nu.

16 Ɛmɔnya ahonim pa, kyɛbɔ ɔkɔyɛ a, bɛ bɔ bɛkeka ɛmɔ nwo dwirɛ tɛɛ ne nyunu kogua ase, ɔnate bra pa bɔ Kristo ti, ɛmɔbɔ ne. 17 Na sɛ Nyameɛ ma atee ma ɛmɔnwu amaneɛ, mmerɛ bɔ ɛmɔyɛ nikye pa a, ɔte pa tra kyɛ ɛmɔkonwu amaneɛ wɔ bɔne nu ɔ. 18 Bɔne ti, Kristo wuli pɛenko, teneneeniɛ wu mane abɔnefoɛ, kyɛbɔ ɔkɔyɛ a, okoli ɛmɔ nyunu kɔhɔ Nyameɛ berɛ. Bɛhuni ye wɔ anwoɔnaen nu, nakoso bɛtingyele ye* honhom nu. 19 Na sɔ tebea nanu yeɛ ɔɔhane edwirɛ hyirele ahonhom bɔ bɛla prizin ne, 20 bɛ yeɛ bɛyɛle asoserɛ wɔ Nowa berɛ so ne. Sɔ mmerɛ ne, Nyameɛ nyane aboterɛ nwondɛle maa Nowa yɛle alaka ne. Na mmenia kaa bie, akra mmɔtwɛ yeɛ benyane ngoa wɔ nzue nanu ɔ.

21 Ná ye sɛso bɔ ɛnɛ odɛ́ ɛmɔ ngoa yeɛ ole asubɔ—ɔtte anwoɔnaen nu fiɛ bie yeɛ yɛnwunzi ɔ, mmom yɛsrɛ Nyameɛ kyɛ ɔma yɛ tiboa pa—bɔ ɔnate Yesu Kristo bɔ bɛtingyele ye naso ne. 22 Ɔhɔle anwuro ne, ɔɔtenane Nyameɛ sa famaa so; na bafa abɔfo, atumvoɛ, ne bɛ bɔ bɛle anwoserɛ mukoraati bawura yebo.