1 Bɔ oli moa koraa ne, mesrɛ ɛmɔ kyɛ ɛmɔfa ngotosrɛ, mbaebɔ, ɛsrɛlɛ bɔ bɛsrɛ bɛma afoforɛ, ɔne asennaa so bɛsrɛ bɛma ebiala, 2 ahemvo ne bɛ bɔ bɛle tumi mukoraati, kyɛbɔ ɔkɔyɛ a yɛkɔtena ase konn na yɛ so anu adwo yɛ, mmerɛ bɔ yɛbɔ yɛ bra wɔ nyamesom pa ne nidie nu ne. 3 Ɛhe yeɛ ɔsɔ Nyameɛ, y’Agyenkwa ne nye ɔ, 4 ye yeɛ ɔpena kyɛ odɛ́ mmenia ahoroɛ mukoraati, maa bɛbanya nahorɛ nanwo nimdeɛ bɔ odi mu ne. 5 Ofikyɛ Nyameɛ komapɛ twen yeɛ ɔwɔ berɛ ɔ, na bɔ ogyi Nyameɛ ne mmenia afia ne koso te komapɛ, yeɛ ole Yesu Kristo. 6 Ye yeɛ ɔfale ye nwo yɛle agyedeɛ mane mmenia mukoraati, na bɛkoli ɛhe nwo adanzeɛ wɔ ye bɔbɔ ye mmerɛ nu. 7 Sɔ adanzeɛ he ati yeɛ baye me kyɛ ebie bɔ ɔka nzɛmba ne somafoɛ bama maen-maen ne, kyɛ ngyirekyire bɛ gyidie ne nahorɛ ne. Edwirɛ bɔ meka ne te nahorɛ, memmbɛ anoanu.

8 Yeti, daa mepena kyɛ mmrienzua yeɛ bɛbɔ mbaeɛ wɔ nekaa biala ɔ, bɛma asaa bɔ ye nwo te so, bɔ ɛyaa ne aporowaa biala nne nu ɔ. 9 Sɔ ala yeɛ odikyɛ mmrasua fa anwobraseɛ ne adwene bɔ enu la berɛ wura ndadeɛ bɔ ɔfata. Nná bɔ ɛhe kyire yeɛ ole kyɛ bɛkɔbɔ bɛ ti kundaen, bɛkɔfa sikaa kɔkorɛ, agudeɛ pa, anaa ndadeɛ bɔ ye nyɔboɛ yɛ se bɛkosiesie bɛ nwo, 10 mmom bɔ ohia yeɛ ole kyɛ bɛkɔyɛ nningyein pa bɔ ɔfata mmrasua bɔ bɛsõ Nyameɛ ɔ. 11 Odikyɛ brasua yɛ konn, na ofi anwobraseɛ mukoraati nu sua nikye. 12 Brasua de, memma ye atee kyɛ ohyirehyire, anaa oli brienzua so, mmom odikyɛ ɔyɛ konn. 13 Ofikyɛ bɛbɔle Adam kora yeɛ bɛbɔ Hawa ɔ. 14 Afei koso, nná Adam yeɛ bɛlaka-lakale ye ɔ, mmom brasua ne yeɛ bɛlaka-lakale ye maa ɔtole mmeraa ɔ. 15 Nakoso, sɛ ɔkɔ so tena gyidie ne ɔdɔ nu, ɔyɛ krongron na ɔmaa ye adwene nu da berɛ a, ɔnate aworɛ so konya ahobammɔ.