1 Me Paul, bɔ Nyameɛ adaworoma nde Kristo Yesu somafoɛ, mene yɛliema Timoteo,

2 yɛfa krataa he yɛkɔma akrongronfoɛ ne aliemaa mɔ bɔ bɛdi nahorɛ wɔ Kristo nu wɔ Kolose ne:

Adom ne asomdwie bɔ ofi yɛ Baba Nyameɛ berɛ ha ɛmɔ.

3 Mmerɛ biala bɔ yɛkɔbɔ mbaeɛ yɛkɔma ɛmɔne, yɛda Nyameɛ, y’Awurade Yesu Kristo Baba ne ase, 4 ofikyɛ yate gyidie bɔ ɛmɔle ye wɔ Kristo Yesu nu, ɔne kyɛbɔ ɛmɔdɔ akrongronfoɛ nanwo dwirɛ, 5 anidasoɛ bɔ ɔla berɛ ma ɛmɔ wɔ anwuro nati yeɛ ɛmɔyɛ sɔ ne. Ɛmɔtele anidasoɛ he anwo dwirɛ, mmerɛ bɔ bɛfale nahorɛ bɔ ɔfa nzɛmba nanwo ne 6 bɛbrɛle ɛmɔ ne. Na kyɛbɔ nzɛmba ne nyi na osu mmaa wɔ wiase mukoraati ne, sɔ ala yeɛ ofi kyẽa bɔ ɛmɔ tele na ɛmɔ nwuni bɔ Nyameɛ adom ne kyire deinn ne, ɔyɛ wɔ ɛmɔ nu ɔ. 7 Ɛhe yeɛ ɛmɔsua bɛfili Epafra bɔ ɔte yɛ mmango akoaa bɔ yɛdɔ ye ne berɛ ne. Ɔte Kristo somvoɛ bɔ odi nahorɛ, bɔ ósi yɛ gya nu yɛ adwuma ɔ. 8 Na ye yeɛ ɔhane ɔdɔ bɔ honhom ne amaa ɛmɔ anya ye nanwo dwirɛ hyirele yɛ ne.

9 Ɛhe ati, ofi kyẽa bɔ yɛtele ye nwo dwirɛ ne, daa biala yɛbɔ mbaeɛ yɛma ɛmɔ, na yɛsrɛ kyɛ ɔma* ɛmɔnya ye apɛdeɛ nwo nimdeɛ bɔ odi mu, na ɛmɔnya nyanza ne honhom nu ndeaseɛ mukoraati bie, 10 kyɛbɔ ɔkɔyɛ a, ɛmɔ kɔnate atee pa so wɔ Awurade nyunu, na ɛmɔ asɔ ye nye wɔ nikye biala nu, mmerɛ bɔ ɛmɔsu mmaa wɔ adwuma pa biala nu, na ɛmɔnya Nyameɛ nwo nahorɛ nimdeɛ pee ne. 11 Yesa yɛsrɛ kyɛ, kyɛbɔ ye anuonyam tumi ne te ne, ɔma ɛmɔ anwoserɛ pee, ná wamaa ɛmɔ ahora bagyina nu baadwu awieɛ wɔ aboterɛ ne anigye nu, 12 mmerɛ bɔ ɛmɔda Baba ne ase kyɛ wamaa ɛmɔ afata, kyɛ ɛmɔ konya agyapadeɛ bɔ ɔwɔ berɛ ma akrongronfoɛ bɔ bɛwɔ kanea nu nanu kyɛfa ne. 13 Walɛ yɛ wafi awosii tumi bo, na wafa yɛ wawa Ɔwa bɔ ɔdɔ ye né ahennie nu, 14 ɔnate ye so yeɛ balɛ́ yɛ, kyire kyɛ, bafa yɛ bɔne bahyɛ yɛ.

15 Ye yeɛ ɔte Nyameɛ bɔ anyeɛ nnwu ye ne sɛso,* abɔdeɛ mukoraati nu piesie, 16 ofikyɛ bɛnate ye so yeɛ bɛbɔle nningyein bɔ ɔwɔ anwuro ne aseɛ so; bɔ anyeɛ nwu ye, ɔne bɔ anyeɛ nnwu ye, ahennie, atumvoɛ,* awaen, ne tumidie. Bɛnate ye so yeɛ bɛbɔle nningyein bɔ waha namukoraati, na bɛbɔ bɛmane ye. 17 Afei koso, né ɔwɔ berɛ kora yeɛ nningyein bɔ waha namukoraati ba ɔ, na bɛnate ye so yeɛ bɛyɛle nningyein bɔ waha namukoraati ɔ. 18 Ye yeɛ ɔte nipadua ne ti, kyire kyɛ asafo ne ti ɔ. Ye yeɛ ole ahyɛaseɛ ne, na ye yeɛ bɛli moa bɛtingyele ye bɛfili ewue nu, kyɛbɔ ɔkɔyɛ a, okoli moa wɔ nikye biala nu. 19 Ofikyɛ né ɔsɔ Nyameɛ nye kyɛ ɔkɔmaa Ɔwa ne koli mu koraa, 20 na ɔnate ye so aha nningyein mukoraati abɔnu bieku, kyire kyɛ, ɔnate ye mogya bɔ ohwie guale wɔ asɛnnua naso ne aha nningyein bɔ ɔwɔ aseɛ he aso ne bɔ ɔwɔ anwuro namukoraati abɔnu bieku, na wamaa asomdwie awa Nyameɛ ne bɛ afia.

21 Mmerɛ bie bɔ wapɛ nu ne, né ɛmɔ ahwe ɛmɔ nwo koraa bafi Nyameɛ nwo, né ɛmɔte ye atamfo, ofikyɛ bɔne ngome yeɛ ne ɛmɔ adwene wɔ so ɔ, 22 nakoso kesaalae de, ɔnate Kristo bɔ owuli ne nipadua naso aha ɛmɔ ne ye abɔnu, kyɛbɔ ɔkɔyɛ a, ɔkɔfa ɛmɔ kɔma Nyameɛ kyɛ mmenia krongron bɔ dɛm ne edwirɛ biala nne bɛ nwo. 23 Nakoso, sana ɛmɔkɔ so bɛtena gyidie nanu, na ɛmɔgyina pindinn wɔ fapem naso, bɔ ɛmɔngɔma nikye fee ngɔhwe ɛmɔ ngɔfi anidasoɛ bɔ ɛmɔ nate nzɛmba naso anya ye nanwo, sɔ nzɛmba ne yeɛ baha ye nwo dwirɛ bahyire abɔdeɛ bɔ ɔwɔ anwuro bo namukoraati ne, na ɛhe yeɛ me Paul, maayɛ ye nwo somvoɛ ne.

24 Kesaalae ɛmɔ ti, ɔwɔ nu kyɛ menwu amaneɛ, nakoso medi ahurusi, na menwu ye kyɛ, ɔnate kyɛ mmoka Kristo nipadua naso, kyire kyɛ asafo naso nati, amaneɛ bɔ odikyɛ menwu ye ne, waha kaa. 25 Nyameɛ afa awura me sa kyɛ nzo asafo he, na ɛmɔ ti, bafa bawura me sa kyɛ nga Nyameɛ dwirɛ ne ma ebiala te, 26 edwirɛ krongron bɔ ɔfa feale tete wiase ne, ɔne aworɛ ndoɔtoasoɛ bɔ wapɛ nu ne. Nakoso, kesaalae de, wala ye ali wahyire akrongronfoɛ nemɔ. 27 Akrongronfoɛ ne de, Nyameɛ nye gye ye nwo kyɛ ɔkɔmaa bɛkonwu edwirɛ krongron bɔ wafea né anuonyam bɔ olle ye noa, bɔ wala ye ali wahyire maen-maen ne. Ye yeɛ ole Kristo bɔ ɛmɔ ne ye ayɛ kõ ne, na ɛmɔle anidasoɛ kyɛ, bɛkɔhyɛ ɛmɔ ne ye mukoraati anuonyam ne. 28 Ye yeɛ yɛbɔ ye nwo dawure, yɛtu ebiala fo, na yɛfa nyanza bɔ ɔkɔ siɛ yɛkyirekyire ebiala, kyɛbɔ ɔkɔyɛ a, yɛkɔfa ebiala bɔ ɔne Kristo ayɛ kõ ne yɛkɔwa Nyameɛ nyunu kyɛ ebie bɔ odi mu. 29 Na ɛhe anwo yeɛ meyɛ adwuma serɛ ne, na ɔnate ye tumi bɔ ɔyɛ adwuma wɔ me nu paa nati, me yere me nwo.