Efésios 5

22 Mmrasua,*5:22 Anaa "Yeɛmɔ." ɛmɔbrɛ ɛmɔ nwo ase bɛma bɛ humɔ, te kyɛ bɔ ɛmɔyɛ bɛma Awurade ne, 23 ofikyɛ brienzua yeɛ ɔte ɔye ti, kyɛbɔ Kristo te asafo ne ti, ná ɔte nipadua ne agyenkwa ne. 24 Na kyɛbɔ asafo ne brɛ ye nwo ase ma Kristo ne, sɔ ala yeɛ odikyɛ brasua koso brɛ ye nwo ase ma ohu wɔ nikye biala nu ɔ. 25 Mmrienzua, ɛmɔhɔ so benya ɔdɔ bɛma bɛ yemɔ, kyɛbɔ né Kristo koso dɔ asafo ne, na ɔfale ye ngoa tole berɛ mane ye ne, 26 na wamaa wafa edwirɛ ne wayɛ nzue wanwunzi asafo nanwo, na wate ye nwo, 27 kyɛbɔ ɔkɔyɛ a, asafo ne nwo kɔwa anuonyam kɔma ye, na wayɛ krongron bɔ ɔpombole, na efiɛ, anaa ngekayɛɛ biala nne ye nwo ɔ. 28 Sɔ ala koso yeɛ odikyɛ mmrienzua dɔ bɛ yemɔ kyɛ bɛ bɔbɔ bɛ nwonaen. Ebiala bɔ ɔdɔ ɔye ne, ɔdɔ ye nwo. 29 Ná ebiala nne berɛ bɔ ɔtane ye bɔbɔ ye nwonaen ɔ, mmom ɔnea so ye,*5:29 Anaa "Ɔma ye aleɛ." na ɔmaa ye nye kɔ ye nwo, kyɛbɔ Kristo yɛ asafo ne, 30 ofikyɛ yɛboka ye nipadua naso. 31 "Ɛhe ati yeɛ brienzua kɔyakyi ye baba ne ye maame berɛ, na ɔne ɔye aha abɔnu, maa bɛ munyɔ ne ayɛ anwoɔnaen kõ." 32 Sɔ dwirɛ krongron bɔ wafea he te piri, ɛhe de, Kristo ne asafo nanwo dwirɛ yeɛ meka ne. 33 Nakoso, odikyɛ ɛmɔ nu biala dɔ ɔye kyɛ ye bɔbɔ ye nwo, ná brasua ne de, óbu ohu paa.