1 Né mmeraa ne te nningyein pa bɔ ɔkɔwa ne wawoɛ, ná ɔtte nningyein ne deinn. Yeti sɔ afɔleɛ bɔ ne bɛbɔ ye afoɛ-afoɛ ne, ne ɔngɔhora ngɔma bɛ bɔ bɛba Nyameɛ berɛ ne ngoli mu. 2 Sɛ ɔhora yɛle sɔ a, ahaa ye de bɛyakyile afɔleɛ ne bɔlɛ. Ofikyɛ bɛ bɔ bɛsõ Nyameɛ ne, sɛ benya bɛte bɛ nwo a, b'ahonim mmu bɛ fɔ kõ. 3 Mmom, né sɔ afɔleɛ ne maa bɛkaye bɛ bɔne ne afoɛ biala, 4 ofikyɛ nandwie ne mmɔngye mogya ngɔhora ngɔye bɔne ngofi berɛ. 5 Yeti, mmerɛ bɔ Kristo wale wiase ne, ɔhane kyɛ:

"Afɔleɛ ne akyɛdeɛ de, né ɛnguro,

mmom, asiesie nipadua ama me.

6 Ɛyeralɛ afɔleɛ ne bɔne nwo afɔleɛ koso,

né wɔ nye ngye ye nwo.

7 Yeɛ ngane kyɛ, ‘Me ɛhe, bahworɔ me nwo dwirɛ wɔ nwomaa nanu,

O Nyameɛ, mawa kyɛ mebaayɛ bɔ ɛkuro ɔ.’ "

8 Oli moa hane kyɛ: "Né ɛnguro afɔleɛ ne akyɛdeɛ, na ne wɔ ngye ɛyeralɛ afɔleɛ ne bɔne nwo afɔleɛ nwo," ɔmva ye nwo kyɛ mmeraa ne yeɛ ɔhane kyɛ bɛbɔ sɔ afɔleɛ ne. 9 Yeɛ ɔtoale so kyɛ: "Me ɛhe, mawa kyɛ mebaayɛ bɔ ɛkuro ɔ." Yeti, ɔyele bɔ oli moa ne fili berɛ, kyɛbɔ ɔkɔyɛ a, ɔkɔfa bɔ ɔtɔ so nyɔ ne kosie berɛ ɔ. 10 Na ɔnate bɔ okuro he aso afa Yesu Kristo nipadua bɔ ɔfa bɔle afɔleɛ komapɛ naso ate yɛ mukoraati nwo.

11 Daa biala, sɔfo biala gyina ye gya so yɛ y'adwuma, na ɔbɔ afɔleɛ komapɛ nala mmerɛ pee; nakoso sɔ afɔleɛ ne, ɔngora nnye bɔne mvi berɛ koraa. 12 Nakoso Kristo de, ɔbɔle sɔ bɔne nwo afɔleɛ ne pɛenko, na ɔɔtenane Nyameɛ sa famaa so, 13 na kesaalae, ɔnwondɛ kyɛ, bɛkɔfa ye atamfo bɛkogua ye gya bo. 14 Na ɔnate afɔleɛ komapɛ bɔ ɔbɔle naso amaa bɛ bɔ bate bɛ nwo ne ayɛ pɛ koraa. 15 Honhom krongron ne koso di ɛhe anwo adanzeɛ. Bɔ oli moa ne, ɔka kyɛ:

16 " ‘Apam he yeɛ mene bɛ kɔyɛ ye wɔ ngyẽa ne si ɔ,’

Awurade noa dwirɛ ɛne.

Ngɔfa me mmeraa ngowura b'ahone nu,

na mahworɔ magua bɛ ti anu."

17 Yeɛ osa toale so kyɛ:

"Mengɔkaye bɛ bɔne ne bɛ amumuyɛɛ né kõ."

18 Na sɛ bɛfa ɛhemɔ bɛkyɛ a, ye nwo nhia kyɛ bɛbɔ bɔne nwo afɔleɛ kõ.

19 Yeti aliemaa mɔ, Yesu mogya ne amaa yanya ahotɔsoɛ kyɛ yɛkɔhɔ krongron nu krongron berɛ; 20 ofikyɛ wabukye ngoa atee foforɛ wato kɛtens nanu wama yɛ, kɛtens ne yeɛ ole ye nipadua ne. 21 Na ɔnate kyɛ yɛle sɔfo panyi bɔ ɔnea Nyameɛ awuro so nati, 22 ɛmɔma yɛfa ahone bɔ enu te, ɔne gyidie bɔ odi mu yɛbra, ofikyɛ bate y'ahone nwo bafi ahonim* tɛɛ biala nwo, na bafa nzue gyengɔɔ banwunzi yɛ nipadua nwo. 23 Ɛmɔma yɛsɔ anidasoɛ bɔ yɛka ye nwo dwirɛ nanu pindinn, ofikyɛ bɔ wahyɛ yɛ bɔ ne, ɔte ebie bɔ odi nahorɛ. 24 Na ɛmɔma yɛ nu biala dwene ye mmango nwo, kyɛbɔ ɔkɔyɛ a, yekonwu atee bɔ yɛkɔfa so yɛkɔhyɛ ebiala nguraen maa ɔkɔla ɔdɔ ali na wayɛ nyumaa pa; 25 nnɛmɔ maa yɛyakyi kyɛ yɛne yɛ nwo koyia nu, kyɛbɔ ebiemɔ ayakyi ne, mmom ɛmɔma yɛhyehyɛ yɛ nwo nguraen, ɛnga-nga kesaalae bɔ yanwu ye kyɛ ngyẽa né pingye ne.

26 Sɛ yɛnya nahorɛ nanwo nimdeɛ yɛ yie, na yɛhyɛda yɛtena bɔne nu a, ye de bɔne nwo afɔleɛ biala nne berɛ kõ, 27 mmom bɔ odikyɛ yɛnea ye atee ala yeɛ ole atemmuo bɔ ɔyɛ suro, ɔne ɛyaa bɔ yenoa yɛ se bɔ ɔbaafa sɛkye ye atamfo ne. 28 Sɛ ebie bu Mose mmeraa ne animtia a, begyina mmenia nyɔ anaa nza adanzeɛ so beku ye bɔ bɛnnwu ye anwunvo ɔ. 29 Ye de, sɛ ebie tietia Nyameɛ Awa ne nyunu, ogua apam mogya bɔ bɛfa bɛtele ye nwo nanwo fiɛ, na ɔpepɛ adom honhom ne nzoaa a, asotwe beni yeɛ ɛnea ɔfata sɔ sona ne ɔ? 30 Bɔ ɔhane kyɛ: "Me yeɛ metua bɔne so kerɛ; ngotua so kerɛ," na osa hane kyɛ: "Awurade kobu ye maen atɛn ne," yɛse ye. 31 Na ɔyɛ suro paa kyɛ, ɛkɔtɔ Nyameɛ teasefoɛ ne ngaen nu ɔ.

32 Ɛmɔkaye mmerɛ bɔ ɛmɔli moa bɛnwuni kanea ne; sɔ mmerɛ ne, ɛmɔ miane ɛmɔ nye bɛfale ɔhaw pee nu. 33 Ɔtɔ mmerɛ bie a, né bɛgua ɛmɔ nyunu ase, na ne bɛteetee ɛmɔ wɔ badwanu; ɔtɔ mmerɛ bie koso a, né ɛmɔ bata bɛ bɔ bɛyɛ bɛ sɔ nanwo. 34 Ɛmɔnwuni bɛ bɔ bɛla prizin ne anwunvo, na sɛ bɛfẽ ɛmɔ nwo nningyein po a, né ɛmɔfa anigye bɛpene so, ofikyɛ né ɛmɔse kyɛ ɛmɔle agyapadeɛ pa bie bɔ ɔwɔ berɛ daa. 35 Yeti, ahotɔsoɛ bɔ ne ɛmɔle ye ne, nnɛmɔ yakyi nu, ofikyɛ ɛmɔ konya ye nwo akatua paa. 36 Odikyɛ ɛmɔmia ɛmɔ nye begyina nu, na sɛ ɛmɔyɛ bɔ Nyameɛ kuro ne beyie a, ɛmɔ konya bɔ ɔfa hyɛle ɛmɔ bɔ ne. 37 Ofikyɛ,

"Waha kaa bie,

né bɔ ɔba ne adwu, na ɔngɔhyɛ.

38 Na me teneneeniɛ de, gyidie yeɛ ɔkɔmaa okonya ngoa ɔ;

sɛ osa yesi a,

me nye ngɔgye ye nwo kõ."

39 Nakoso yɛ de, yɛtte mmenia bɔ besa bɛ si maa bɛsɛkye bɛ; mmom yɛte mmenia bɔ yɛle gyidie bɔ odɛ́ yɛ* ngoa.