HEBRIFOƐ 6

1 Ɛhene ati, Kristo nwo nningyein bɔ yɛli moa yɛsuane ne, kesaalae de yatra berɛ, yeti ɛmɔma yɛyɛ nningyein bɔ ɔkɔmaa yɛ nwo kɔkokwa. Yeti, nnɛmɔ maa yɛto fapem foforɛ yɛma nningyein bɔ ye nwo nhia nwo adwene-sakra ne Nyameɛ nu gyidie, 2 asubɔ ahoroɛ nwo ngyerɛkyerɛ ne asaa bɔ bɛfa bɛgua mmenia so, awufo bɔ bɛkotingye bɛ ne daa atemmuo. 3 Ɛhe yeɛ sɛ Nyameɛ ma ye nwo atee a, yɛkɔyɛ ɔ.

4 Na bɛ bɔ banwu kanea né le, banya anwuro akyɛdeɛ bɔ bɛfa bɛma mbaen ne bie, banya honhom krongron ne bie, 5 banwu Nyameɛ dwirɛ bɔ ɔte pa ne né tumi bɔ ɔwɔ wiase foforɛ bɔ ɔba nanu, 6 bɔ bahwe bɛ nwo ne, ɔkɔyɛ se kyɛ bɛkosa bɛkɔmaa bɛkɔsakra b’adwene bieku; ofikyɛ basa babɔ Nyameɛ Awa ne asɛnnua nu bama bɛ nwo, na bagua ye nyunu ase wɔ mmenia nu.

7 Ofikyɛ sɛ aseɛ konya nhyira kofi Nyameɛ berɛ a, sana ɔno nzue bɔ ɔtaa tɔ gua so ne, na ofifi mmaa bɔ mvasoɛ wɔ so ma bɛ bɔ bɛluale ne. 8 Nakoso sɛ ofifi mmowie ne ɛfone de a, ye de mvasoɛ biala nne ye so, na ɔngɔhyɛ né badome ye, na ye awieɛ yeɛ ole kyɛ bɛkɔfa see bɛkɔyera ye.

9 Nakoso aliemaa mɔ, sɛ yɛka sɔ po a, ɛmɔ de, yɛle ahotɔsoɛ wɔ ɛmɔ nu kyɛ ɛmɔ kɔyɛ nningyein pa, nningyein bɔ ɔkɔmaa ɛmɔ konya ngoa. 10 Ofikyɛ Nyameɛ de, ɔtte ase asisie kyɛ ye wora kofi ɛmɔ adwuma, ɔne ɔdɔ bɔ ɛmɔda ye ali bɛkyire ye dumaa ne, mmerɛ bɔ ɛmɔsõ akrongronfoɛ, ná ɛmɔtɛ́ so bɛ ne.

11 Nakoso yɛpena kyɛ ɛmɔ nu biala kɔ so bɔ ye nwo mmɔden sɔ ala, kyɛbɔ ɔkɔyɛ a, ɛmɔ kɔfa ahotɔsoɛ bɛkɔnea ɛmɔ anidasoɛ né atee koodwu kyɛ ɔkɔwa nu, 12 ná ɛmɔ anyɛ akwadworɔ, na mmom ɛmɔ asuesua bɛ bɔ bɛnate gyidie ne aboterɛ so nyane bɔhyɛ ne.

13 Mmerɛ bɔ Nyameɛ hyɛle Abraham bɔ ne, ɔnate kyɛ né ebiala nne berɛ bɔ ɔte piri tra ye bɔ ɔkɔta ye ndaen nati, ɔtale ye bɔbɔ ye nwo ndaen 14 kyɛ: "Kyɛbɔ ɔte biala ne, ngohyira wɔ, na kyɛbɔ ɔte biala ne, ngɔmaa wɔ bosofoɛ kɔyɛ pee." 15 Yeti, mmerɛ bɔ Abraham nyane aboterɛ ne, ye sa hane sɔ bɔhyɛ ne. 16 Sɛ sona ta ndaen a, ɔta ebie bɔ ɔte piri tra ye ndaen, na ndaen ne maa nikye biala bo pɛ, ofikyɛ odi edwirɛ nanwo adanzeɛ. 17 Sɔ ala yeɛ Nyameɛ koso, mmerɛ bɔ ɔma bɛ bɔ bekonya bɔhyɛ ne nwu ye kyɛ, ye atirimbɔ ne ngɔsesa lle ne, ɔtale ndaen fa foale so. 18 Yeti ɔnate sɔ nningyein nyɔ bɔ ɔnzesa, bɔ Nyameɛ ngɔhora ngɔpɛ ye nwo anoanu lle nati, yɛ bɔ yanwati yaatoa ye ne, yanya nguraenhyɛ bɔ enu yɛ se, bɔ ɔkɔmaa yɛkɔsɔ y’anidasoɛ nanu yé ɔ. 19 Na anidasoɛ bɔ yɛle ye ne, ɔte kyɛ sɛkyɛ bɔ otira yɛ kra nu, otimu berɛ, na onhinhim. Na sɔ anidasoɛ ne aworo kɛtens nanu ahɔ krongron nu krongron berɛ, 20 nekaa bɔ Yesu ali moa ahɔ berɛ ama yɛ, ná waayɛ sɔfo panyi bɔ ɔwɔ berɛ daa te kyɛ Melkisedek ne.