1 Sɔfo panyi biala bɔ bɛye ye bɛfi mmenia nanu ne, bɛye ye kyɛ ogyina mmenia ne gya nu yɛ Nyameɛ adwuma ma bɛ, ná ɔbɔ akyɛdeɛ ne bɔne nwo afɔleɛ. 2 Na ɔnate kyɛ ɔse kyɛ ɔtɔ sii wɔ nningyein pee nu nati, sɛ ebie nze na odi mvomsoɛ a, ɔkora nwu ye anwunvo paa. 3 Ɛhene ati, odikyɛ ɔbɔ afɔleɛ pata ye bɔbɔ ye bɔne, ɔne maen ne bɔne. 4 Ebiala nne berɛ bɔ ɔfa sɔ nidie ne ma ye bɔbɔ ye nwo ɔ; mmom onya sɔ nidie ne, mmerɛ bɔ Nyameɛ afrɛ ye, kyɛbɔ ɔfrɛle Aaron ne.

5 Sɔ ala yeɛ Kristo bɔbɔ anhyɛ ye nwo anuonyam kyɛ ɔbaayɛ sɔfo panyi, mmom bɔ ɔha hyirele ye kyɛ: "Ɛte mma, na ɛnɛ me koso, mayɛ wɔ Baba" ne, ye yeɛ ɔhyɛle ye anuonyam ɔ.

6 Na Nyameɛ sa hane ye wɔ nekaa foforɛ kyɛ:

"Ɛte sɔfo daa

te kyɛ Melkisedek."

7 Mmerɛ bɔ Yesu wɔ aseɛ he aso ne, ɔfale esue ne moen teane nu fale ye mbaeɛ ne ye dwirɛ tole bɔ ɔkɔhora kole ye kofi ewue nu ne nyunu, na ɔnate kyɛ osuro Nyameɛ nati, otiele ye. 8 Ɔwɔ nu kyɛ né ɔte Baa, nakoso osuane sotie fili amaneɛ bɔ onwuni ye nanu. 9 Na bɛmaa ɔyɛle pɛ ne, ɔɔyɛle ebie bɔ bɛ bɔ betie ye namukoraati nate ye so konya ngoa daa, 10 na Nyameɛ amaa waayɛ sɔfo panyi te kyɛ Melkisedek.

11 Yɛle ye nwo dwirɛ pee yɛka, nakoso ɔyɛ se kyɛ yɛkohyirehyire nu, ofikyɛ ɔkyɛ kora ne ɛmɔ ate edwirɛ bo. 12 Ɔbaadwu bekye de, ahaa ɛmɔte akyerɛkyerɛfoɛ, nakoso sana ebie sa hyɛ yebo kyirekyire ɛmɔ Nyameɛ dwirɛ nanu nningyein mmaa-mmaa ne bieku. Yeti, ɛmɔtɛ́ hia nyɔfonesue, nná aleɛ bɔ ɔyɛ se. 13 Ebiala bɔ ɔtɛ́ no nyɔfone ne, ɔte akwalaa, ofikyɛ tenenee nwo nimdeɛ bɔ ole ye ne te kaa. 14 Nakoso bɛ bɔ banyi ne de, aleɛ bɔ ɔyɛ se yeɛ bɛdi ɔ, bɛ de batete b'adwene maa ɔkora nwu nzonzonyɛ bɔ ɔwɔ pa ne tɛɛ nu.