1 Apam bɔ oli moa ne, né ole ɔsom nwo mmeraa, na ne ole nekaa krongron wɔ aseɛ he aso. 2 Na bɛsili tɛnt, ye sua bɔ oli moa ne, ɛberɛ yeɛ né kanea bakaa, tɛbulu, ne paanoo bɔ bɛfa bɛba Nyameɛ nyunu ne wɔ ɔ. Na ne bɛfrɛ ɛberɛ Nekaa Krongron. 3 Né sua foforɛ wɔ kɛtens bɔ ɔtɔ so nyɔ ne si, na ne bɛfrɛ ɛberɛ Krongron Nu Krongron. 4 Ɛberɛ yeɛ ne sikaa kɔkorɛ afɔleɛ bokyea bɔ bɛyera insɛns wɔ so, ɔne apam alaka bɔ bafa sikaa kɔkorɛ bafa ye nwo mukoraati ne gyi ɔ. Na ne sikaa kɔkorɛ kwangoa bɔ mana wɔ nu, Aaron pɔmaa bɔ ofifili, ɔne apam nanwo nyɔboɛ nyɔ ne gua apam alaka nanu. 5 Né kerubim bɔ bɛle anuonyam ne butu-butu mbata tire bɔ ɔkata alaka naso ne aso; nakoso nná kesaalae yeɛ yɛbaaha sɔ nningyein hemɔ nwo dwirɛ yɛkɔ siɛ ɔ.

6 Mmerɛ bɔ bɛyɛle nikye biala kama sɔ ne, ne asɔfo nemɔ kɔ tɛnt né sua bɔ oli moa nanu daa bɛkɔyɛ b'adwuma krongron ne. 7 Nakoso sua bɔ ɔtɔ so nyɔ ne de, sɔfo panyi ne ngome yeɛ ne ɔkɔ berɛ ɔ, na afoɛ biala, né ɔkɔ berɛ komapɛ. Ɔkɔ biala a, ne odikyɛ ɔfa mogya bɔ ɔkɔfa kɔbɔ ye bɔbɔ ye bɔne nwo afɔleɛ, ɔne bɔne bɔ mmenia ne ayɛ bɔ bɛnze nanwo afɔleɛ. 8 Honhom krongron ne maa yɛnwu ye pefee kyɛ, mmerɛ bɔ tɛnt bɔ oli moa ne tɛ́ wɔ berɛ ne, atee bɔ ɔkɔ Krongron Nu Krongron berɛ ne, bamma yannwu ye. 9 Sɔ tɛnt ne maa yɛnwu bɔ ne ɔkɔhɔ so ɛnɛ ɔ, ofikyɛ akyɛdeɛ ne afɔleɛ bɔ bɛbɔle ne, wangora wamma bɔ ɔsõ Nyameɛ ne ahonim anni mu. 10 Bɔ ne ɔfa ye nwo ala yeɛ ole aleɛ, anonneɛ, ne asubɔ ahoroɛ; né ɛhemɔ te anwoɔnaen nu nziesie bɔ ne odikyɛ bɛyɛ alaa kodwu kyɛ mmerɛ bɔ bahyɛ kyɛ bɛkɔ toto nningyein yé ne koso ɔ.

11 Nakoso, mmerɛ bɔ Kristo wale kyɛ nningyein pa bɔ wawa nanwo sɔfo panyi ne, owurale tɛnt bɔ ɔte piri, na odi mu tra daa deɛ nanu. Sɔ tɛnt ne, nná sona yeɛ osili ɔ, na ɔbokka sɔ abɔdeɛ he aso. 12 Ɔhɔle krongron nu krongron berɛ komapɛ, nakoso nná mmɔngye ne nandwie mogya yeɛ ɔfa hɔle ɔ, mmom, ɔfale ye bɔbɔ ye mogya, yeti wanya ngoa bɔ ɔwɔ berɛ daa wama yɛ. 13 Na sɛ né bɛfa mmɔngye ne nandwie nyii mogya, ne nandwie bereɛ nzoen bɛpete bɛ bɔ bɛ nwo agua fiɛ nanwo maa bɛ nwo te, na ɔmaa bɛ nipadua nanwo te a, 14 ye de Kristo bɔ ɔnate honhom bɔ ɔwɔ berɛ daa naso fale ye nwo mane Nyameɛ kyɛ afɔleɛ bɔ ɛfiɛ biala nne ye nwo ne, nzuati yeɛ ye mogya ne ngɔhora ngɔte yɛ ahonim nwo ngofi nneyɛɛ basa-basa nwo, kyɛbɔ ɔkɔyɛ a, yɛkɔsõ Nyameɛ teasefoɛ ne ɔ?

15 Yeti, Kristo yeɛ apam foforɛ ne gyi ye so, kyɛbɔ ɔkɔyɛ a, bɛ bɔ bafrɛ bɛ ne konya agyapadeɛ bɔ ɔwɔ berɛ daa nanwo bɔhyɛ ne. Bɔ wamaa ɛhe ayɛ yé yeɛ ole kyɛ, wawu wafa wale bɛ wafi bɔne bɔ bɛyɛle ye wɔ apam bɔ oli moa ne bo nanu.

16 Sɛ ebie yɛ will* a, odikyɛ sona bɔ ɔyɛle will ne wu, 17 ofikyɛ sɛ sona ne wulli a, ye will* ne nnyɛ adwuma, sana wawu kora. 18 Yeti, apam bɔ oli moa ne, sɛ mogya amma nu a, ahaa wanyɛ adwuma. 19 Ofikyɛ mmerɛ bɔ Mose kengale mmera nanu dwirɛ mukoraati yiele ne, ɔfale nandwie ne mmɔngye né mogya, afei ɔfale nzue, koogyan, ne sommɛ, ná ɔfa petene nwomaa ne né mmenia nemɔ so 20 hane kyɛ: "Apam bɔ Nyameɛ ahyɛ kyɛ ɛmɔli so ne, ye nwo mogya ɛhe." 21 Sɔ ala yeɛ ɔfale mogya petene tɛnt ne, ɔne nningyein bɔ bɛfa bɛyɛ adwuma krongron namukoraati so. 22 Kyɛbɔ mmeraa ne kyire ne, odikyɛ bɛfa mogya bɛte nikye biala nwo, na sɛ mogya angua a, bɔne-fakyɛ nne berɛ.

23 Yeti, nningyein bɔ osoma nningyein bɔ ɔwɔ anwuro ne, né odikyɛ bɛfa sɔ atee nala so bɛte ye nwo; nakoso anwuro deɛ nemɔ de, afɔleɛ bɔ odi mu tra so yeɛ bɛfa bɛte bɛ nwo ɔ. 24 Nná nekaa krongron bɔ sona ayɛ, bɔ wayɛ kyɛ anwuro deɛ nanu yeɛ Kristo hɔle ɔ, mmom ɔhɔle anwuro deinn, na kesaalae wafa ye nwo waahyire Nyameɛ wama yɛ. 25 Wangɔ kyɛ ɔkwaafa ye nwo bɔ afɔleɛ daa, kyɛbɔ ne sɔfo panyi ne fa ebie mogya kɔ krongron nu krongron berɛ afoɛ biala ne. 26 Ye sɔ de a, ahaa odikyɛ Kristo kɔ so ala nwu amaneɛ fi mmerɛ bɔ bɛbɔle wiase ne. Mmom kesaalae, waye ye nwo ali komapɛ wɔ wiase né awieɛ, kyɛbɔ ɔkɔyɛ a, ɔnate ye nwo bɔ ɔfa bɔle afɔleɛ naso kɔye bɔne kofi berɛ ɔ.

27 Kyɛbɔ odikyɛ sona wu komapɛ, ná ewue ne si ne, atemmuo yeɛ ɔwɔ berɛ ne, 28 sɔ ala yeɛ bɛfale Kristo bɛbɔle afɔleɛ komapɛ maa ɔsoale mmeni pee bɔne; na okosa kɔwa bieku, sɔ mmerɛ ne de, nná bɔne yeɛ ɔbaasoa ɔ, mmom, ɔbaale bɛ bɔ bɛyere bɛ nwo bɛnwondɛ ye ne ngoa.