1 Yeti, ɔnate kyɛ yɛle adanzefoɛ munungum pee bɔ bapɛ yɛ nwo bayia nati, ɛmɔma yɛgyi adesoa biala ne bɔne bɔ ɔngyɛ ne wakyekye yɛ ne yɛgua, na yɛfa animia yɛtu mirika bɔ ɔla yɛ nyunu ne, 2 mmerɛ bɔ yɛnea Yesu bɔ ɔte yɛ gyidie farebae, na ɔmaa yɛ gyidie si pi ne. Anigye bɔ ne ɔla ye nyunu nati, onwuni amaneɛ wɔ asɛnnua so, na obuli ye nye guale animguaseɛ so, ná waatena Nyameɛ bia* ne famaa so. 3 Yeti, ye bɔ omiane ye nye gyinane nzoaa nwora bɔ abɔnefoɛ pepɛle ye ne noa ne, ɛmɔto ɛmɔ bo ase bɛsusu ye nwo, ɛhene kɔmaa ɛmɔ abanu ngobu, ná ɛmɔ wora ngɔbɔ. 4 Na ngondii bɔ ɛmɔ ne bɔne kõ ne, ɛmɔdwulli nekaa bɔ mogya kogua ɛmɔ ɔ. 5 Afei, afutuo bɔ bɛfa bɛmane ɛmɔ kyɛ mmaa ne, ɛmɔ wora afi hɔ? Ɔhane kyɛ:

"Mma, sɛ Awurade twe wɔ so a, nnɛbu ye kyɛ ɔte angorɛ bie,

na sɛ otwi wɔ nyunu a, nnɛmaa w'abanu bu.

6 Ofikyɛ bɔ Awurade dɔ ye ne, yeɛ ɔtwe ye so ɔ,

bɔ ɔte yeɛ ole kyɛ, ebiala bɔ wafa ye wayɛ ɔwa ne, ogwa ye."

7 Bɔ ɛmɔfa nu ne, ɛmɔmia ɛmɔ nye begyina nu, na ɛmɔnwu ye kyɛ ɔboka ndeɛsoɛ naso. Nyameɛ twe ɛmɔ so kyɛ ye mmaa mɔ. Na baa beni yeɛ ye baba ndwe ye so ɔ? 8 Sɛ ɛmɔ annya sɔ ndeɛsoɛ he bie a, ye de, nná ye mma yeɛ ole ɛmɔ, né ɛmɔte adwaman mmaa. 9 Afei koso, né yɛ baba mɔ bɔ bɛte mmenia ne twe yɛ so, na yɛfa obuo yɛma bɛ. Ye sɔ de a, aso onhia kyɛ yɛbrɛ yɛ nwo ase koraa yɛma yɛ honhom nu Baba ne, kyɛbɔ ɔkɔyɛ a yekonya ngoa ɔ? 10 Bɛ de, bɛteane yɛ mmerɛ kaa bie, kyɛbɔ bɛnwu ye kyɛ ɔte paa ma bɛ ne, na ye de, yɛ pa nu ti yeɛ ɔyɛ sɔ ne, kyɛbɔ ɔkɔyɛ a, yekonya ye krongron ne bie. 11 Nahorɛ dwirɛ yeɛ ole, kesaalae de, asotwe biala nne berɛ bɔ ɔyɛ fɛ ɔ, mmom ɔyɛ yea; nakoso yesi ne, bɛ bɔ bɛmaa ɔtete bɛ ne, osu asomdwie mmaa bɔ yeɛ ole tenenee ne.

12 Yeti ɛmɔmia ɛmɔ sa bɔ enu ago, ɔne ɛmɔ nangoroma bɔ wayɛ mmerɛ nanu, 13 na ɛmɔfa atee bɔ ɔtengyɛ so, kyɛbɔ ɔkɔyɛ a agyire bɔ ɔttemaye ne ngɔtto ngɔfa ye nwo, mmom okonya ayaresa.

14 Ɛmɔma asomdwie tena ɛmɔ ne ebiala afia, na ɛmɔbɔ abrabɔ krongron, ofikyɛ sɛ ebie bra anyɛ krongron a, ongonwu Awurade. 15 Ɛmɔnea yé na sona biala andwe ye nwo amvi Nyameɛ adom nanwo, ná ndii bɔ ɔte pɔizen biala amvifi anha adwene, ná wangua mmeni pee nwo fiɛ; 16 ɛmɔnea yé na ebiala anyɛ adwamammɔniɛ, anaa ebie bɔ olle obuo biala mma nningyein krongron kyɛbɔ Esau yɛle ne. Ye yeɛ aleɛ kõ ti, ɔtɔnene ye nwo atee bɔ ole ye kyɛ baa panyi ne. 17 Na ɛmɔse kyɛ yesi ne, né ɔpena nhyira, nakoso bɛpole ye; ɔwɔ nu, ɔtele mmoen, na ɔyɛle bɔ ɔkɔhora biala kyɛ ɔkɔmaa ye baba kɔsesa ye adwene, nakoso wanzi aga.

18 Na ɛmɔ de, bokaa bɔ bɛkora bɛfa bɛ sa bɛka ye, bɔ see la nu, ná nwosina kumɔɔn ne awosii kabii wɔ so, bɔ mvrama kandinga tu fa ye nwo ne, ɛmɔ amma ye nwo; 19 na ɛmɔ amma awɛen* né dede ne, ɔne konviɛ bɔ enu dwirɛ ne maa bɛ bɔ né betie ne srɛle kyɛ nnɛmaa bɛka edwirɛ biala bɛkyire bɛ kõ nanwo. 20 Ofikyɛ edwirɛ bɔ bɛhane ne, né yenoa yɛ se ma bɛ, yeɛ ole kyɛ: "Sɛ kaka po nwo ka bokaa ne a, bɛsi ye nyɔboɛ." 21 Bɔ ne ɔkɔ so ne, né ɔyɛ suro alaa maa Mose po hane kyɛ: "Mesuro, yeti me nwo popo."

22 Mmom, ɛmɔ awa Zion Bokaa nanwo ne Nyameɛ teasefoɛ ne kuro, Yerusalem bɔ ɔwɔ anwuro ne, ɔne abɔfo buburu-gyaa 23 bɔ bayia nu ne nyunu, ɔne mmaa mbanyi bɔ bahworɔ bɛ dumaa wɔ anwuro né asafo nanu, ɔne Nyameɛ bɔ okobu ebiala atɛn ne nyunu, yeɛ teneneefoɛ bɔ bɛfa honhom ne bɛbɔ bɛ bra, bɔ bayɛ pɛ, 24 ɔne Yesu bɔ apam foforɛ ne gyi ye so nanwo, ɔne mogya bɔ bɛpete bɔ odwudwo yé tra Habel Mogya ne.

25 Yeti, ɛmɔnea yé na ɛmɔ annyɛ ɛmɔ adwene kyɛ ɛmɔngotie bɔ odwudwo ne, ofikyɛ bɛbɔ bandie bɔ ɔfale Ɛdangama ne kɔkɔbɔ ne mane bɛ wɔ aseɛ he aso ne, bamva bɛ nwo banni. Na sɛ bamva bɛ nwo banni a, ye de, sɛ yɛkakyi yɛsi yɛkyire bɔ odwudwo fi anwuro ne a, yɛkɔyɛ sɛɛ ne yafa yɛ nwo yali? 26 Sɔ mmerɛ ne, ye konvi maa aseɛ ne wosole, na kesaalae wahyɛ bɔ kyɛ: "Ngosa ngɔyɛ bieku, nakoso nná aseɛ ngome yeɛ ngɔwoso ye ɔ, ngɔwoso anwuro koso." 27 Mmerɛ bɔ ɔhane kyɛ "ngosa ngɔyɛ bieku" ne, okyire kyɛ ɔkɔye nningyein bɔ ɔwosole ne kofi berɛ, kyire kyɛ nningyein bɔ wabɔ ne, kyɛbɔ ɔkɔyɛ a, nningyein bɔ wanwoso ne kɔha berɛ.

28 Ɔnate kyɛ yɛ sa kɔha ahennie bɔ ɔnwoso nati, ɛmɔma yɛfa anisɔ yɛle yɛto nu, na yɛfa esuronyi ne ahopopo yɛsõ Nyameɛ wɔ atee bɔ okuro so, 29 "ofikyɛ yɛ Nyameɛ te see bɔ ɔsɛkye nikye."