1 Afei Yesu ha hyirele bɛ kyɛ: "Nahorɛ, meka mekyire ɛmɔ kyɛ, bɛ bɔ bɛgyigyi wa nanu bie wɔ berɛ a, bɛngonwu sana banwu kyɛ Nyameɛ Ahennie ne di tumi kora."

2 Ɛlɛsia si ne, Yesu fale Petro, Yakobo, ne Yohane, na ɔfale bɛ hɔle bokaa tendee bie so. Bɛ ngome yeɛ ne bɛwɔ berɛ ɔ, na ɔsakrale ye nwo wɔ bɛ nyunu. 3 Ye atadeɛ ne yɛle fufue hyɛnn, kyɛbɔ ne wayɛ hyɛnn ne, ebiala nne berɛ, bɔ ɔkɔhora kɔpo maa ɔkɔyɛ hyɛnn sɔ ɔ. 4 Na Elia ne Mose wale Yesu nwo berɛ, na né bɛne ye bɔ ngɔmmɔ. 5 Yeɛ Petro ha hyirele Yesu kyɛ: "Rabi, ɔte pa kyɛ yɛwɔ wa ɔ. Ma yesi tɛnt nza wɔ wa; wɔ deɛ kõ, Mose deɛ kõ, yeɛ Elia deɛ kõ." 6 Nahorɛ nu, né Petro nnwu bɔ ɔha ɔ, ofikyɛ né esuronyi aha bɛ paa. 7 Afei, munungum bie katale bɛ so, na konviɛ bie fili munungum nanu wale kyɛ: "Ɛhe yeɛ ole mma bɔ medɔ ye ne. Ɛmɔtie ye." 8 Na ɛberɛ nala, bɛtole bɛ nye ne, bannwu ebiala, Yesu ngome yeɛ ne ogyi berɛ ɔ.

9 Na bɛtoro bokaa ne bɛba ne, Yesu hyɛle bɛ kitii kyɛ, nnɛmaa bɛka ye nwo dwirɛ bɛkyire ebiala, kodwu kyɛ Sona Awa ne kotingye kofi ewue nu ɔ. 10 Yeti, bammɔ so bangyire ebiala, nakoso ne bɛdwene tingyelɛ bɔ okotingye kofi ewue nu nanwo. 11 Na bɛbisale ye kyɛ: "Nzuati yeɛ atwerɛfoɛ nemɔ ka kyɛ, odikyɛ Elia di moa ba ne?" 12 Ɔha hyirele bɛ kyɛ: "Ɔte amba, Elia koli moa kɔwa kɔɔtoto nningyein mukoraati; nakoso nzuati yeɛ bahworɔ bafa Sona Awa nanwo kyɛ, odikyɛ onwu amaneɛ pee, na bɛbu ye animtia ne? 13 Nahorɛ dwirɛ yeɛ ole kyɛ, Elia awa dada, na bɔ bɛkuro biala, bɛfa bɛyɛle ye, kyɛbɔ né bahworɔ bafa ye nwo nala."

14 Mmerɛ bɔ bɛwale asuafoɛ bɔ baha nanwo berɛ ne, né mmeni pee apɛ bɛ nwo ayia, na né bɛne atwerɛfoɛ ne su aporowaa paa. 15 Nakoso, mmenia ne nwuni Yesu ne, bɛ kunu tele bɛ, na bɛtuli mirika bɛɛhyeale ye. 16 Yeɛ obisale bɛ kyɛ: "Nzu yeɛ ɛmɔsu ye nwo aporowaa ne?" 17 Na bɛ bɔ bɛwɔ berɛ nanu kõ hane kyɛ: "Kyerɛkyerɛniɛ, ɛmumu sunzum wɔ mma brienzua naso, yeti mvale ye mmerɛle wɔ; 18 nekaa biala bɔ ɔkɔha ye ne, ɔpɛ fi, yenoa pu ahure, ɔkwa ye gye, na ɔsenze. Nzrɛle wɔ asuafoɛ nemɔ kyɛ bɛtu bɛfi ye nu, nakoso bangora." 19 Yeɛ ɔha hyirele bɛ kyɛ: "O, ɛnɛ mmerɛ mmenia* bɔ ɛmɔlle gyidie, mene ɛmɔ tena maa odwu kyẽa beni? Nnya ɛmɔ nwo aboterɛ maa oodwu kyẽa beni? Fa ye berɛ me." 20 Yeti, bɛfale akwalaa ne bɛwale, na mmerɛ bɔ sunzum ne nwuni Yesu ne, ɔmaa ɔsenzene, ɔpɛ fini, omunu-mununi ye nwo, na ye noa puli ahure. 21 Yesu bisale ye baba ne kyɛ: "Mmerɛ beni yeɛ ɔhyɛle yebo yɛle yɛ ɔ?" Ɔhane kyɛ: "Ofi ye ngwalaa nu. 22 Na ɔtaa maa ɔpɛ fi see ne nzue nu, kyɛbɔ okohu ye ɔ. Sɛ ɛkɔhora kɔyɛ nikye bie kɔfa ye nwo a, nwu ye anwunvo, na boka yɛ." 23 Yesu ha hyirele ye kyɛ: "Ɛnwa, ‘sɛ ɛkɔhora’ a, ebiala bɔ ole gyidie ne, nikye biala kɔyɛ yé kɔma ye." 24 Ɛberɛ ala, akwalaa ne baba teane nu kyɛ: "Nne gyidie! Nekaa bɔ mehia gyidie ne, boka me!" 25 Na Yesu nwuni kyɛ mmeni pee ba berɛ, yeti ɔteane sunzummɔne ne kyɛ: "Ɛmumu ne asotiniwaa sunzum, meka mekyire wɔ kyɛ, ‘Fi ye nu fite, na nnɛbawura ye nu kõ.’ " 26 Na sunzum ne teane nu, na ɔmaa akwalaa ne senzene kyeinn, yeɛ ofili ye nu fitele ɔ. Ná akwalaa ne yɛle kyɛ ebie bɔ wawu ne, na mmenia ne hane kyɛ: "Wawu!" 27 Nakoso Yesu sɔle ye sa nu mane ye so, na odwɔsole. 28 Yesu hɔle awuro bie nu ne, ye asuafoɛ nemɔ bisale ye kokoanu kyɛ: "Nzuati yeɛ yangora sɔ sunzum ne tu ne?" 29 Ɔha hyirele bɛ kyɛ: "Ɛhe de, nikye fee ngora ye tu, sana mbaeɛ."

30 Na bɛfili berɛ ne, bɛɛfale Galilea, nakoso, né onguro kyɛ ebiala te ye nwo dwirɛ. 31 Ofikyɛ ne okyirekyire ye asuafoɛ ne kyɛ: "Bɛkɔfa Sona Awa ne bɛkowura mmenia sa maa bɛkɔhu ye. Nakoso beku ye beyie a, ɛlɛsa si ne, ɔkɔdwɔso." 32 Bande sɔ dwirɛ nabo, nakoso né bɛsuro kyɛ bɛkobisa ye.

33 Bɛdwuli Kapernaum. Na mmerɛ bɔ ɔwɔ awuro berɛ ne, Yesu bisale bɛ kyɛ: "Nzu yeɛ ne ɛmɔsu ye nwo aporowaa wɔ atee naso ne?" 34 Nakoso bɛyɛle dinn, ofikyɛ bɛnate atee naso ne, né bɛsu bɔ ɔte piri wɔ bɛ nu nanwo aporowaa. 35 Yeti ɔtenane ase, na ɔfrɛle buru-ne-nyɔ ne wale ye nwo berɛ, yeɛ ɔha hyirele bɛ kyɛ: "Sɛ ebie pena kyɛ odi anyunu a, odikyɛ ɔpɛ yebo koraa, na ɔsõ ɛmɔ mu." 36 Na ɔfale akwalaa kamba bie gyinane bɛ afia, yeɛ ɔfale ye sa tole ye kɔme anu ha hyirele bɛ kyɛ: 37 "Ebiala bɔ odɛ́ ngwalaa mmaa-mmaa he anu kõ me dumaa nu ne, wale me koso; na ebiala bɔ okole me ne, nná me ngome yeɛ wale me ɔ, mmom wale bɔ ɔsomane me ne."

38 Yohane ha hyirele ye kyɛ: "Kyerɛkyerɛniɛ, yɛnwuni kyɛ ebie fa wɔ dumaa tu sunzummɔne, na né yɛpena kyɛ yesi ye atee, ofikyɛ olli yɛ si."* 39 Nakoso, Yesu ha hyirele ye kyɛ: "Nnɛmɔsi ye atee, ofikyɛ ebiala nne berɛ bɔ ɔkɔfa me dumaa kɔyɛ anwanwadeɛ, na ɛberɛ ala ɔkɔpɛ ye nwo kɔha edwirɛ tɛɛ kɔfa me nwo ɔ. 40 Na ebiala bɔ ɔndwɔso ndia yɛ ne, ɔboka yɛ so. 41 Kristo dumaa bɔ ɔla ɛmɔ so nati, sɛ ebie ma ɛmɔ nzue kwangoa kõ ma ɛmɔ no a, meka mekyire ɛmɔ kyɛ, ye akatua nngɔbɔ ye. 42 Nakoso, ebiala bɔ ɔkɔto mmaa-mmaa he anu kõ sintidua ne, sɛ bɛfale nyɔboɛ kandinga bɔ bɛfa bɛtĩ hwiit bɛtole ye kɔme bɛgyili ye bɛtole ɛpo nu po a, ahaa ɔte pa."

43 "Sɛ wɔ sa kõ to wɔ sintidua a, pɛ na gyi to. Ofikyɛ ɔte pa kyɛ ɛkɔfa asaa kõ kɔhɔ ngoa nu, tra kyɛ ɛkɔfa wɔ nipadua namukoraati kɔhɔ Gehenna see bɔ onnua nanu ɔ. 44 *— 45 Na sɛ wɔ gya kõ to wɔ sintidua a, pɛ na gyi to. Ofikyɛ, ɔte pa kyɛ ɛkɔyɛ apakye kɔhɔ ngoa nu, tra kyɛ ɛkɔfa wɔ gya nyɔ namukoraati kɔhɔ Gehenna. 46 — 47 Na sɛ wɔ nye kõ to wɔ sintidua a, tu na gyi to. Ɔte pa kyɛ ɛkɔfa anyeɛ komapɛ kɔhɔ Nyameɛ Ahennie nu, tra kyɛ ɛkɔfa wɔ nye nyɔ namukoraati kɔhɔ Gehenna. 48 Ɛberɛ yeɛ nnɔboakoma* nwu, na see nnua ne. 49 Odikyɛ bɛfa see bɛwura ebiala ngyee. 50 Ngyee te pa, nakoso sɛ ye fɛɛ ne fi nu a, nzu yeɛ ɛmɔkɔfa bɛkowura ye ngyee bieku ɔ? Ɛmɔnya ngyee wɔ ɛmɔ nu, na ɛmɔ ne ebiala tena asomdwie nu."