1 Ɛmɔma sona biala brɛ ye nwo ase wura atumvoɛ bɔ bɛwɔ berɛ nabo, ofikyɛ tumi biala nne berɛ, sana bɔ ofi Nyameɛ berɛ ne. Na atumvoɛ bɔ bɛwɔ berɛ ne, Nyameɛ yeɛ wama bɛ atee kyɛ bɛli tumi ɔ. 2 Yeti, ebiala bɔ ɔkɔdwɔso kotia atumvoɛ bɔ bɛwɔ berɛ ne, né odwɔso tia Nyameɛ nhyehyɛɛ, na bɛ bɔ bɛyɛ sɔ ne, bɛkɔfa atemmuo bɛkɔwa bɛ nwo so. 3 Sɛ ebie yɛ nikye pa a onzuro bɛ bɔ bɛdi tumi ne, bɔ ɔyɛ bɔne ne mmom yeɛ ɔsuro bɛ ɔ. Ɛnkuro kyɛ esuro atumvoɛ nemɔ anaa? Ye de yɛ nikye pa, na bɛkɔ kamvo wɔ. 4 Ofikyɛ bɛte Nyameɛ asomvoɛ, na wɔ pa nu ti yeɛ bɛwɔ berɛ ɔ. Nakoso sɛ ɛyɛ bɔne de a, suro, ofikyɛ ottira dadeɛ ne mbaen. Ɔte Nyameɛ somvoɛ bɔ ɔtwe bɛ bɔ bɛyɛ bɔne ne so. 5 Ɛhe ati yeɛ odikyɛ ebu atumvoɛ nemɔ ne, nná asotwe bɔ ɛkɔkwati ne ngome ti ɔ, mmom w’ahonim* koso ti. 6 Ɛhene koso ati yeɛ odikyɛ etua toɔ ne, ofikyɛ atumvoɛ nemɔ te Nyameɛ asomvoɛ bɔ bɛsõ maen ne, na bɛyɛ b’adwuma daa. 7 Ɛmɔtua ebiala deɛ bɛma ye: bɔ odɛ́ toɔ ne, ɛmɔtua toɔ bɛma ye, bɔ odɛ́ alambo ne, ɛmɔfa alambo bɛma ye; bɔ odikyɛ ɛmɔsuro ye ne, ɛmɔfa esuronyi bɔ ɔte sɔ bɛma ye; na bɔ ɔfata nidie ne, ɛmɔfa nidie bɛma ye.

8 Nnɛmɔma ebiala kerɛ, sana ɔdɔ bɔ ɛmɔ kɔdodɔ ɛmɔ nwo ne ngome; ofikyɛ ebiala bɔ ɔdɔ ye mmango ne, wali mmeraa naso wayie. 9 Ofikyɛ mmeraa ne ka kyɛ: "Nnɛsɛkye agyaa, nnɛdi awue, nnɛwia, nnɛmaa wɔ nye boro wɔ mmango nikye," ɔne mmeraa foforɛ biala bɔ ɔwɔ berɛ ne, ye mukoraati bɔnu komapɛ kyɛ: "Dɔ wɔ mmango kyɛ wɔ nwo." 10 Sɛ ɛdɔ ebie a, ɛngɔyɛ ye bɔne, yeti sɛ ɛle ɔdɔ a, ali mmeraa naso.

11 Ɛmɔyɛ ɛhe koso, ofikyɛ ɛmɔse mmerɛ ne. Ɛmɔse kyɛ, mmerɛ aso kyɛ ɛmɔ dwɔso bɛfi nnaa nu, ofikyɛ mmerɛ bɔ bɛkɔfa bɛkole yɛ ngoa ne, wapingye watra mmerɛ bɔ yɛɛyɔle gyidifoɛ ne. 12 Waha kaa maa kɔngɔen pɛ nu; na aleɛ ahe ayie. Yeti ɛmɔma yɛgyi awosii nu nningyein namukoraati yɛgua, na yɛfa kanea nu akodeɛ ne yɛwura. 13 Ɛmɔma yɛbɔ bra pa, te kyɛ bɔ yɛnate eyia ne; ɔnzɛ kyɛ ɔkɔyɛ paati bɔ yebo gye-gyee-gye ne nzãa bolɛ, adwamammɔ ne ahohwibra, anaa manzoin ne ahoɔyaa. 14 Mmom ɛmɔfa Awurade Yesu Kristo bɛwura, na nnɛmɔyɛ nhyehyɛɛ biala bɛto berɛ bɛma anwoɔnaen akɔnnɔ, kyɛ ɛmɔ kɔyɛ bɔ okuro ɔ.