1 Yeti bɛ bɔ bɛwɔ Kristo Yesu nu ne, benni fɔ kõ. 2 Ofikyɛ honhom né mmeraa bɔ ɔma yɛ ngoa wɔ Kristo Yesu nu ne, wamaa ɛmɔ alɛ́ ɛmɔ nwo koraa bafi bɔne ne ewue mmeraa nanwo. 3 Ɔnate kyɛ yɛ nwonaen ne maa mmeraa ne yɛle mmerɛ nati, bɔ mmeraa ne angora ye yɛ ne, Nyameɛ ayɛ. Atee bɔ ɔfale so yɛle yeɛ ole kyɛ, ɔsomane Ɔwa ne maa ɔwale, na ɔfale sona nipadua wale te kyɛ mmenia bɔ bɔne wɔ yɛ nwo nala, na obuli bɔne fɔ wɔ anwoɔnaen nu, 4 kyɛbɔ ɔkɔyɛ a tenenee bɔ mmeraa ne pena ne kɔwa nu wɔ yɛ bɔ yɛnate honhom nu ná yɛnnate anwoɔnaen nu naso. 5 Ofikyɛ bɛ bɔ bɛnate anwoɔnaen nu ne, bɛfa b’adwene besie anwoɔnaen nu nningyein so, nakoso bɛ bɔ bɛnate honhom nu ne fa b’adwene sie honhom nu nningyein so. 6 Adwene bɔ ogyi anwoɔnaen nu nningyein so ne, ewue yeɛ ɔfa ba ɔ, nakoso adwene bɔ ogyi honhom nu nningyein so ne fa ngoa ne asomdwie ba. 7 Ɛhe ati, sɛ ebie fa y’adwene sie anwoɔnaen nu nningyein so a, okyire kyɛ ɔte Nyameɛ tamfo, ofikyɛ ondie Nyameɛ mmeraa, na ɔngora nyɛ sɔ po. 8 Yeti bɛ bɔ bɛmaa anwoɔnaen kyire bɛ bɔ bɛyɛ ne, bɛngora bɛnyɛ bɔ ɔsɔ Nyameɛ nye.
9 Nakoso ɛmɔ de, sɛ ɔte amba kyɛ Nyameɛ honhom te ɛmɔ nu a, ye de honhom ne yeɛ okyire ɛmɔ bɔ ɛmɔyɛ ɔ, na ɔtte anwoɔnaen ne. Ebiala bɔ olle Kristo honhom ne, ɔtte Kristo deɛ. 10 Nakoso sɛ Kristo wɔ ɛmɔ nu a, bɔne ti ɛmɔ nipadua ne awu, nakoso tenenee ti ɛmɔ honhom ne te ase. 11 Na sɛ bɔ otingyele Yesu fili ewue nu né honhom te ɛmɔ nu a, ye de bɔ otingyele Kristo Yesu fili ewue nu ne, ɔnate ye honhom bɔ ɔte ɛmɔ nu naso kɔmaa ɛmɔ nipadua bɔ owu ne koso konya ngoa.