18 Nakoso menwu ye kyɛ amaneɛ bɔ yɛnwu ye kesaalae ne, sɛ yɛfa toto anuonyam bɔ bɛkɔfa bɛkɔma yɛ nanwo a, ondwu ye neka-fee. 19 Ná abɔdeɛ né nwondɛ paa kyɛ bɛkɔla Nyameɛ awa ne ali. 20 Ofikyɛ bafa abɔdeɛ ne bawura nikye bɔ mvasoɛ nne so bo, nakoso nná ye pɛ nu yeɛ ɔne ye wura yebo ɔ, mmom bɔ ɔfale ye wurale berɛ ne pɛ nu ɔ, na ɔyɛle sɔ wɔ anidasoɛ nu, 21 kyɛbɔ ɔkɔyɛ a abɔdeɛ ne bɔbɔ konya ahofadie kofi ɛporɔlɛ bɔ wafa ye wayɛ akoaa nanu, na wanya Nyameɛ anuonyam mmaa ahofadie ne bie. 22 Na yɛse kyɛ abɔdeɛ mukoraati pene, na banwu amaneɛ8:22 Anaa "Banwu amaneɛ te kyɛ ebie bɔ aworɛ aha ye." tonn maa waadwu ɛnɛ. 23 Nakoso nná abɔdeɛ ne ngome yeɛ ɔpene ɔ, mmom yɛ bɔ yanya aba bɔ oli moa, bɔ yeɛ ole honhom ne koso, yɛsu yɛgua yɛ nu mmerɛ bɔ yɛnwondɛ paa kyɛ bɛkɔfa yɛ bɛkɔyɛ mmaa, ná ɔnate agyedeɛ naso alɛ́ yɛ afi nipadua he anu ne. 24 Na sɔ anidasoɛ he anu yeɛ bɛlɛle yɛ ngoa ɔ; nakoso anidasoɛ bɔ yɛnwu ye de, ɔtte anidasoɛ, ofikyɛ sɛ sona nwu nikye bie a, ɔkɔyɛ sɛ ne wafa ye nye wato so? 25 Nakoso, sɛ yɛnnwu nikye bɔ yɛ nye la so ne a, yɛnya aboterɛ paa yɛnwondɛ.
26 Na sɔ ala yeɛ honhom ne boka yɛ, mmerɛ bɔ yayɛ mmerɛ ne. Bɔ ɔte yeɛ ole kyɛ, sɛ yɛnnwu nikye bɔ yɛbɔ ye nwo mbaeɛ po a, honhom ne bɔbɔ si yɛ gya nu serɛ ma yɛ mmerɛ bɔ yɛsu yɛgua yɛ nu ne. 27 Na bɔ ɔnea ahone nu ne se bɔ honhom ne pena kyire ɔ, ofikyɛ bɔ Nyameɛ pena ne, ɛhene ala yeɛ honhom ne srɛ ma akrongronfoɛ ne ɔ.