28 Yɛse kyɛ, nikye biala nu ne, Nyameɛ yɛ nningyein pa ma bɛ bɔ bɛdɔ ye ne, bɛ bɔ ye atirimbɔ ti, wafrɛ bɛ ne. 29 Ofikyɛ bɛ bɔ oli moa lɛle bɛ tole nu ne, ɔha tole berɛ kyɛ bɛkɔyɛ kyɛ ɔwa ne, kyɛbɔ ɔkɔyɛ a ɔwa ne kɔyɛ piesie wɔ aliemaa pee nu. 30 Na bɛ bɔ ɔyele bɛ ne, bɛ ala yeɛ ɔfrɛle bɛ ne, na bɛ bɔ ɔfrɛle bɛ ne, bɛ ala yeɛ obuli bɛ teneneefoɛ ne. Na bɛ bɔ obuli bɛ teneneefoɛ ne, bɛ ala yeɛ ɔhyɛle bɛ anuonyam ne.
31 Ye de, nzu bieku yeɛ yɛka yɛfa ɛhemɔ nwo ɔ? Sɛ Nyameɛ ta yɛsi a, nwa yeɛ ɔkɔhora kɔhõ kotia yɛ ɔ? 32 Ye bɔ ɔwa po, wamva ye wammɔ yɛ atianu serɛ, na yɛ ti, ɔfale ye mane ne, aso ɔngɔlo yɛ ngɔfa nikye biala ngɔboka ɔwa naso ngɔma yɛ anaa? 33 Bɛ bɔ Nyameɛ aye bɛ ne, nwa yeɛ ɔkɔhora kɔbɔ bɛ kwaadu ɔ? Nyameɛ bɔbɔ yeɛ obu bɛ teneneefoɛ ɔ. 34 Nwa yeɛ ɔkɔhora kobu bɛ fɔ ɔ? Kristo Yesu bɔ owuli, na bɛtingyele ye ne, ɔwɔ Nyameɛ sa famaa so, na ye yeɛ ɔsrɛ ma yɛ ɔ. 35 Nzu yeɛ ɔkɔhora kɔte yɛ kofi Kristo dɔ nwo ɔ? Aso amanehunu, ahokyere, ɔtaeɛ, ɛhɔen, adagya, asane, anaa dadeɛ kɔhora kɔte yɛ kofi ye nwo hɔ? 36 Na kyɛbɔ bahworɔ ne:
"Wɔ ti, bɛku yɛ daa biala;
na bɛbu yɛ kyɛ mmoan bɔ bɛkwaapɛ yɛ ti ne."
37 Nakoso, sɔ nningyein hemɔ mukoraati nu ne, yɛnate bɔ ɔdɔ yɛ naso ali ngunim koraa. 38 Na nne gyidie paa kyɛ, ewue anaa ngoa, abɔfo anaa awaen, nningyein bɔ ɔwɔ berɛ kesaalae anaa bɔ ɔkɔwa kyẽabie, tumi, 39 nningyein bɔ ɔwɔ anwuro anaa nningyein bɔ ɔwɔ ase biala nne berɛ bɔ ɔkɔhora kɔte yɛ kofi Nyameɛ dɔ bɔ ɔwɔ y’Awurade Kristo Yesu nu nanwo ɔ.