Annabi Yeremi 12

Ala xa natɛe mixi ɲaaxie xa fe ra

Annabi Yeremi xa masenyi Alatala bɛ

1 «Alatala, i tinxin,

kɔnɔ n wama i maxɔrinfe i xa natɛ nde xa fe ra.

Munfe ra mixi ɲaaxie xa fe luma sɔɔnɛya ra?

Munfe ra bɔɲɛsa na yanfantee bɛ?

2 I tan nan e daaxi, i tan nan e baloxi.

E sigama yare, e fe rabama e xa duniɲɛigiri kui.

E i xili falama e dɛ ra,

kɔnɔ i xa fe mu na e bɔɲɛ kui.

3 Alatala, i n sondonyi ma fe kolon.

I xa natɛ tongo mixi ɲaaxie faxafe ra,

alɔ yɛxɛɛ naxee xaninma e kɔn naxaba yire.

4 Bɔxi luma sunnunyi kui han mun lɔxɔɛ?

Tunɛ tondima fade han mun tɛmui?

Subee nun xɔnie na faxafe mixi xa ɲaaxuɲa saabui ra,

barima e naxɛ, ‹Ala mu muxu toma.›»

Alatala xa masenyi Annabi Yeremi bɛ

5 «Xa i tagan i gide adamadie ya ma,

i fa i gima di soe ya ma?

Xa i bira taa kui, i ɲɛrɛma Yurudɛn wula kui di?

6 I ngaxakerenyi naxee kelixi i baba xɔnyi,

e fama nɛ i yanfade, e sɔnxɔɛ rate i ma.

I naxa la e xa wɔyɛn ɲɔxunmɛ ra.

7 N nan n ma banxi bɛɲinma nɛ,

n nan n ma ɲama raboloma nɛ,

n xanuntenyie fi e yaxuie ma.

8 N na rabama nɛ barima n ma ɲama bara lu

alɔ yɛtɛ xaaɲɛ wulai.

N bara e xɔn.

9 N ma ɲama bara lu

alɔ xɔni maxɔnɔxi sɛgɛe birama naxan fɔxɔ ra.

‹Wulai subee, wo xa fa n ma ɲama sɔntɔde.›

10 Xuruse dɛmadonyie bara n ma laakɔɛ kana,

e n ma xɛ fanyi maboron, a findi yire xaraxi ra.

11 N ma bɔxi bara findi gbaloe yire ra.

A na sunnunyi kui n ya xɔri,

sese mu fanma mɛnni, mixi yo mu kinikinima a ma.

12 Sɔɔri ɲaaxie na fafe kelife gbengberen yire,

barima Alatala bara a ragiri santidɛgɛma xa bɔxi birin li,

mixi yo naxa lu bɔɲɛsa kui.

13 E bara sansi xɔri si,

kɔnɔ e tunbe gbansan nan sɔtɔma.

E e yɛtɛ rataganma nɛ fufafu.

Alatala bara xɔnɔ wo ma,

na birin xa findi yaagi ra wo bɛ.»

Alatala xa masenyi Isirayila yaxuie bɛ

14 Alatala bara a masen,

«Si naxee sabatixi Isirayila rabilinyi,

si naxee n ma Isirayila ɲama xa bɔxi xun nakanama,

n naxan fixi e ma,

wo xa a kolon n fama nɛ wo fan keride wo xɔnyi,

n fa n ma ɲama ba wo yi ra.

15 N na gɛ e bade wo yi ra,

n man kinikinima nɛ e ma,

n fa e ragbilen e xa bɔxi ma naxan findixi e kɛ ra.

16 Xa na sie n ma ɲama xa sɛriyɛ matinkan,

e fa e rakali n xili ra, ‹Alatala ɲiɲɛ,›

n e rasoma nɛ n ma ɲama ya ma.

E nu bara n ma ɲama matinkan e kalide Bali xili ra,

n ma ɲama fan nɔma nɛ e matinkande kali ra n xili ra.

17 Kɔnɔ xa a sa li na sie mu e tuli mati n ma masenyi ra,

n e xun nakanama nɛ, n fa e sɔntɔ.»

Alatala xa masenyi nan na ki.