Annabi Yeremi 21

Darisalamu xa gbaloe masenyi

1 Alatala naxa yi masenyi ti Annabi Yeremi bɛ, mangɛ Sedekiya to Malakiya xa di Pasura nun Maaseya xa di Sefaniya sɛrɛxɛdubɛ xɛɛ a yire. E naxa a fala a bɛ, 2 «I xa Alatala maxandi muxu bɛ barima Babilɔn mangɛ Nebukadansari na won gerefe. Tɛmunde Alatala nɔma kaabanako nde rabade won bɛ alako Nebukadansari xa makuya won na.»

3 Annabi Yeremi naxa e yaabi, «Wo xa a fala Sedekiya bɛ, 4 Isirayila Marigi Alatala bara a masen, ‹Wo Babilɔn mangɛ nun a xa sɔɔrie gere geresose naxan na, n a niyama nɛ e xa findi wo xun nakanama ra. Naxee na wo gerefe taa fari ma, e fama nɛ sode taa kui. 5 N tan yati gere tima nɛ wo bɛ sɛnbɛ ra, barima n xɔnɔxi wo ma a ɲaaxi ra. N bɔɲɛ bara te. 6 N fama nɛ yi taakae bɔnbɔde, xɛmɛe nun xurusee, alako e xa faxa fure ɲaaxi ma. 7 Na dangi xanbi, Yudaya mangɛ Sedekiya, a xa mixie, nun ɲama naxan mu fama faxade fure, santidɛgɛma, nun kaamɛ ra yi taa kui, n fama nɛ e sode e yaxui Babilɔn mangɛ Nebukadansari yi ra, naxan wama e nii bafe. A fama nɛ e bɔnbɔde santidɛgɛma ra, a mu kinikinima e ma fefe ma. Alatala xa masenyi nan na ki.›»

8 «I xa a fala ɲama bɛ, Alatala bara a masen, ‹N wo tima nɛ kira firin xɔn ma. Keren findi kisi kira ra, boore findi faxɛ kira ra. 9 Naxan luma yi taa kui, a fama nɛ faxade santidɛgɛma, kaamɛ, nun fure ra, kɔnɔ naxan a yɛtɛ fima Babilɔnkae ma naxee bara wo xa taa rabilin, na kanyi kisima nɛ. 10 N bara natɛ tongo n xa fe ɲaaxi raba yi taa ra. N mu hinnɛma a ra. N a soma nɛ Babilɔn mangɛ yi ra, a fa a gan tɛ ra. Alatala xa masenyi nan na ki.›»

11 «I xa a fala Yudaya mangɛ bɔnsɔɛ bɛ,

Wo wo tuli mati Alatala ra.

12 Dawuda bɔnsɔɛ, Alatala bara a masen,

wo xa kiiti tinxinxi sa gɛɛsɛgɛ yo gɛɛsɛgɛ,

wo xa tɔɔrɔmixi ratanga mixi kobi ma,

alako n naxa xɔnɔ wo ma,

a fa lu alɔ tɛ naxan mu xubenma wo xa kobiɲa xa fe ra.

13 N bara xɔnɔ wo ma,

wo tan naxee sabatixi yi gulunba yire,

wo tan naxee luxi alɔ gɛmɛe fiili ma,

wo tan naxee a falama,

‹Nde nɔma won na? Nde nɔma sode won xɔnyi?›»

Alatala xa masenyi nan na ki.

14 «N fama nɛ wo ɲaxankatade wo xa yunubie xa fe ra,

n tɛ so wo xɔnyi ra naxan wo birin ganma.»

Alatala xa masenyi nan na ki.