Annabi Yeremi 20

Annabi Yeremi xa tɔɔrɛ

1 Sɛrɛxɛdubɛ Pasura, Imeri xa di, naxan findixi hɔrɔmɔbanxi yarerati ra, a to Annabi Yeremi xa kawandi mɛ, 2 a naxa a suxu, a a bɔnbɔ, a a sa kutunyi ra hɔrɔmɔbanxi sɛɛti ma Bunyamin sode dɛ ra. 3 Kuye to iba, Pasura naxa a ramini, kɔnɔ Annabi Yeremi naxa a yaabi, «Alatala bara i xili masara. A mu falama sɔnɔn Pasura, a falama nɛ fa ‹Magori Misabiba,› ‹Ɲaxankatɛ yire.› 4 Alatala naxa a masen, ‹N gaaxui luma nɛ i tan nun i booree bɔɲɛ ma. I yaxuie i booree faxama nɛ santidɛgɛma ra i ya xɔri. N Yudaya bɔxi fan sama nɛ Babilɔn mangɛ bɛlɛxɛ, a e bɔnbɔ santidɛgɛma ra, a fa e xanin Babilɔn. 5 Harige nun naafuli naxan birin na yi taa kui, a nun naxan na Yudaya mangɛe yi ra, n na birin soma nɛ wo yaxuie yi ra yi gere kui, e xa a xanin Babilɔn. 6 I tan Pasura, nun i xa mixie, wo fan sigama nɛ konyiya kui Babilɔn bɔxi ma. I faxama mɛnni nɛ, i ragata naa, i tan nun i booree i naxee kawandixi wule ra.›»

Annabi Yeremi xa masenyi

7 «Alatala, i bara n natantan,

n fan bara n yɛtɛ lu na tantanyi kui.

I bara n suxu, i bara nɔ n na.

Lɔxɔɛ yo lɔxɔɛ e n maberema, e birin yoma n ma.

8 N ma masenyi birin findima ɲaxankatɛ nun gbaloe nan na.

N na Alatala xa masenyi ti, ɲama birin yo n ma.

9 Xa n na a fala,

‹N mu a xa fe kawandima sɔnɔn,

n mu wɔyɛnma a xili ra sɔnɔn,›

Alatala xa masenyi luma nɛ alɔ tɛ n bɔɲɛ kui.

N mu nɔma na tɛ raxubende,

fo n xa Alatala xa masenyi ti.

10 N bara tɔɔɲɛgɛ gbegbe mɛ.

Xa n a fala, ‹Gbaloe na fafe,›

mixi ndee a fala, ‹Won xa a masen mangasanyi bɛ.›

N booree birin na n matofe,

alako e xa n suxu tantanyi kui.

E a falama, ‹Tɛmunde won nɔma nɛ a suxude gantanyi ra,

won xa nɔ a ra, won xa won gbeɲɔxɔ a ma.›

11 Kɔnɔ Alatala Sɛnbɛma na n sɛɛti ma.

N yaxuie fama nɛ birade, e mu nɔma n na.

Na findima nɛ yaagi ra e bɛ, e xaxili ifu.

12 Mangɛ Alatala tinxintɔɛe kolon,

a e bɔɲɛ nun e sondonyi matoma.

N a kolon Alatala fama nɛ n gbeɲɔxɔde e ma,

n xaxili tixi a tan nan na.

13 Wo Alatala matɔxɔ, wo bɛɛti ba a bɛ,

barima a setaree rakisima nɛ e yaxuie bɛlɛxɛ.

14 N bari lɔxɔɛ dankaxi.

N nga n barixi lɔxɔɛ naxɛ, lɔxɔɛ fanyi mu a ra.

15 Xɛɛra naxan n bari fe fala n baba bɛ,

mixi dankaxi nan nu a ra.

N baba nu bara sɛɛwa na xibaaru ra,

16 kɔnɔ na xɛɛra xa lu alɔ yi taae,

Alatala naxee halakixi kinikinitareɲa kui.

A xa e gbelegbele xui mɛ gɛɛsɛgɛ nun yanyi ra.

17 A nu lan nɛ a xa n faxa n nga tɛɛgɛ,

n xa ragata mɛnni abadan.

18 Munfe ra n fa minixi duniɲa ma,

n xa yi tɔɔrɛ nun yi fe xɔnɛ sɔtɔ,

n ma duniɲɛigiri xa findi yaagi ra n bɛ?»