1 ತಾರಾ ದೊಕ್ಡಾ ಭಾರ್ಲ್ಯಾ ದೆಶನಾ ಉಪ್ಪರ ವ್ಯಾಪಾರನೆ ಘಾಲ ಘನ್ನಾ ದಿನ್ನ ಥಯಲ್ಪರ ತೆ ತುನೆ ಬಡ್ಡಿನಾ ಕ್ಹಾತೆ ತುನೆ ಮಳಸ. 2 ತಾರಾ ದೊಕ್ಡಾ ಕ್ಹಾತ ನೈತೊ ಆಟ ಜ಼ಗಾವೊಮಾ ಘಾಲ. ಕಾಕದ್ಯಾಮ ಕೆಳಾಮಾ ಕಿಮ್ಮ ಕೆಟ್ಟ ಟೈಮ ಆವಸ ಕವಾನು ತುನೆ ಗ್ವತ್ತ ಥಾತು ನೈ. 3 ಪಾನಿ ಭರಲ ಮ್ಹಾಡ ತಿನಾಕ್ಹು ತೆಜ಼ ಜಿಮಿನ್ಪರ ಪಡಸ,ಝಾಡ ಉತ್ತರ ದಿಕ್ಕೆ ರ‍್ಹವಾದೆ, ದಕ್ಷಿಣ ದಿಕ್ಕೆ ರ‍್ಹವಾದೆ ಪಡ್ಯಾಮ ಪಡಲ ಜ಼ಗಾಜ಼ ರ‍್ಹವಸ. 4 ವಾರಾನೆಜ಼ ದೆಕ್ತೊ ರ‍್ಹವಾಲೊ ಬಿಯಾ ಬಿತ್ತತೊ ನೈ, ಮ್ಹಾಡನೆ ದೆಕ್ತೊ ರ‍್ಹವಾಲೊ ಪೈನೆ ಕಾಟ್ತೊ ನೈ. 5 ಉಸುಲನಿ ವಾಟನೆ ಪೆಟೆ ರ‍್ಹಯಲ ಬಾಕ್ಡಿನಾ ಪೆಟಮಾ ಹಡ್ಕಾ ಬೆಳ್ದಾನಾ ತರಿಕಾನೆ, ತು ಕಿಮ್ಮ ತಿಳದತೊ ನೈ ತಿಮ್ಮಜ಼ ಸರ್ವಶಕ್ತ ಥಯಲ ಕ್ಹುದಾನು ಕಾಮ ತಿಳದಿಲೆತಾ ನೈ. 6 ಪಾಟೆ ಬಿಯಾನೆ ಬಿತ್ತ; ಕ್ಹಾಂಜ಼ಲಕ್ಕಾ ತಾರೊ ಹತ್ತ ಪಾಚೊ ಕಾಡು ನಕೊ, ಆಂ ಸಫಲ ಥಾವಸತೊ ನೈತೊ ತೆ ಸಫಲಥಾವಸ, ನೈತೊ ಯಕ್ಕಳೆ ಭಂಭಿ ಚೊಕಾ ಥಾವಸತೊ ತುನೆ ತಿಳದಸ. 7 ಕ್ಹರಿಮಾಜ಼ ಉಜಾಲು ಚೊ಼ಕುಬಿ, ವರಿ ಸುರ್ಯಾನೆ ದೆಕಾನು ಡೊಳಾನೆ ಚೊ಼ಕು ರ‍್ಹವಸ. 8 ಘನಾ ವರ‍ಕ್ಹ ಜ್ಯುತೊ ರ‍್ಹಯಲವಾಲೊ ತೆ ಕ್ಹಾರಾವೊನಿ ಕ್ಹುಶಿ ಥಾವಾದೆ, ತೆನೈಸೊ ಅಂದಕಾರನಾ ದಿನೊನೆ ಸ್ಹೆಂನೆ ಲಾವಾದೆ, ಕಾಕದ್ಯಾಮ ತೆ ಘನ್ನಾ ರ‍್ಹಯಲ ರ‍್ಹವಸ. ಅಗು ಥಾವಾನು ಕ್ಹಾರುಜ಼ ವ್ಯರ್ಥ ವ್ಹೈ.

9 ಜಾಂಜಿಮಾನ, ಜಾಂಜಿಮಾನ ರ‍್ಹತಾಮಾ ಕ್ಹುಶಿಕ್ಹು ರ‍್ಹೆ,ಜಾಂಜಿಮಾನನಾ ದಿನ್ನೊಮಾ ತುನೆ ತಾರು ಮನಸ ಕ್ಹುಶಿ ಕರಾದೆ. ಮನಸನೆ ಆಯಲ ತಿಮ್ಮ, ಡೊಳಾನೆ ಚೊ಼ಕು ಲಾಗಲ ತಿಮ್ಮ ಚಾ಼ಲಿಲೆ. ತೆನೈಸೊ ಆಂ ಕ್ಹಾರಿ ವಿಷಯಮಾ ಕ್ಹುದಾ ತುನೆ ನ್ಯಾಯ ವಿಚಾ಼ರನಾ ಫೈಸ್ಲಾನೆ ಗುರಿ ಕರಸ. 10 ತಾರಾ ಮನಸಮಾ ದುಖನಾಹುತಿ ಚಿಂತಾ ಕರು ನಕೊ, ತು ಘನ್ನಾ ದಿನ್ನ ಲಕ್ಕಾ ಅಮ್ಮಜ಼ ಜಾಂಜಿಮಾನ ಥೈನ ರ‍್ಹತೊ ನೈ.