عَننَبِ يٍرٍ مِ 26

عَننَبِ يٍرٍ مِ مَكِيتِقٍ

1 يٌسِيَ شَ دِ يٍهٌيَكِمِ شَ مَنفّيَ قْلّ يُدَيَ كُي، عَلَتَلَ نَشَ يِ مَسٍنيِ تِ عَننَبِ يٍرٍ مِ بّ، عَ نَشّ، 2 «عِ شَ تِ ﭑ مَ هْرْ مْبَنشِ تّتّ كُي، عِ سَ وْيّن حَمَ بّ نَشَن كٍلِشِ يُدَيَ تَايٍ كُي قَقٍ رَ عَلَتَلَ بَتُدٍ عَ شَ هْرْ مْبَنشِ كُي. عِ شَ قٍ بِرِن مَسٍن عٍ بّ ﭑ نَشَن قَلَمَ عِ بّ. عِ نَشَ سٍسٍ لُ. 3 تّمُندٍ عٍ عٍ تُلِ مَتِمَ نّ نَ رَ، عٍ فبِلٍن عٍ شَ وَلِ كٌبِيٍ قْشْ رَ. نَ تّمُي ﭑ قَن فبِلٍن ﭑ مَ نَتّ قْشْ رَ عٍ شَ قٍ حَاشِ شَ قٍ رَ. 4 عِ شَ عَ قَلَ عٍ بّ، ‹عَلَتَلَ بَرَ عَ مَسٍن، شَ وٌ مُ وٌ تُلِ مَتِ ﭑ مَ سّرِيّ رَ ﭑ وٌ يَمَرِشِ نَشَن نَ، 5 شَ وٌ مُ وٌ تُلِ مَتِ ﭑ مَ كٌنيِ نَمِحْنمّيٍ رَ، ﭑ نَشٍيٍ شّيشِ وٌ مَ، وٌ تٌندِشِ نَشٍيٍ شَ مَسٍنيِ رَ، 6 نَ تّمُي ﭑ قٍ رَبَمَ نّ وٌ رَ عَلْ ﭑ نَشَن نَبَشِ سِلٌ رَ. يِ تَا قِندِ مَ نّ تَا دَنكَشِ رَ دُنِحَ سِ بِرِن تَفِ.›»

7 سّرّشّدُبّيٍ، نَمِحْنمّيٍ، نُن حَمَ بِرِن نَشَ عَننَبِ يٍرٍ مِ شَ مَسٍنيِ مّ عَلَتَلَ شَ بَنشِ كُي. 8 عَننَبِ يٍرٍ مِ تٌ فّ عَلَتَلَ شَ مَسٍنيِ تِدٍ حَمَ بّ، سّرّشّدُبّيٍ، نَمِحْنمّيٍ، نُن حَمَ بِرِن نَشَ عَ سُشُ، عٍ قَ عَ قَلَ، «وٌن شَ عَ قَشَ، وٌن شَ عَ قَشَ!» 9 عٍ نَشَ عَ مَشْرِن، «مُنقٍ رَ عِ عَ مَسٍنشِ عَلَتَلَ شِلِ رَ عَ قَلَقٍ، يِ بَنشِ قَمَ نّ لُدٍ عَلْ بَنشِ نَشَن نَ سِلٌ، يِ تَا قَن قَ كَنَ، مِشِ يٌ مُ لُ عَ كُي؟» فَلِ بِرِن نُ بَرَ عَننَبِ يٍرٍ مِ رَبِلِن عَلَتَلَ شَ بَنشِ كُي.

10 يُدَيَ كُنتِفِيٍ تٌ نَ قٍ مّ، عٍ نَشَ كٍلِ مَنفّ شْنيِ، عٍ سِفَ عَلَتَلَ شَ بَنشِ، عٍ سَ دْشْ نَادّ نّينّ سّيتِ مَ مَرِفِ شَ بَنشِ سٌدٍ دّ رَ. 11 سّرّشّدُبّيٍ نُن نَمِحْنمّيٍ نَشَ عَ قَلَ كُنتِفِيٍ نُن حَمَ بّ، «عَ لَنمَ يِ شّمّ شَ قَشَ، بَرِ مَ عَ بَرَ يِ تَا شَ قٍ حَاشِ قَلَ. وٌ بَرَ نَ مّ وٌ يّتّ رَ.»

12 عَننَبِ يٍرٍ مِ نَشَ عَ قَلَ كُنتِفِيٍ نُن حَمَ بّ، «عَلَتَلَ نَن ﭑ شّيشِ يِ مَسٍنيِ تِدٍ يِ بَنشِ نُن يِ تَا شَ قٍ رَ. 13 يَكْسِ وٌ تَن شَ وٌ حّرّ كِ مَسَرَ، وٌ شَ وٌ تُلِ مَتِ وٌ مَرِفِ عَلَتَلَ شُي رَ، عَلَكٌ عَ شَ فبِلٍن عَ شَ نَتّ قْشْ رَ وٌ شَ قٍ رَ. 14 ﭑ نَ وٌ سَفٌي. وٌ شَ وٌ وَشْنقٍ رَبَ ﭑ نَ. 15 كْنْ وٌ شَ عَ كٌلٌن، شَ وٌ ﭑ قَشَ، وٌ تَن نُن دَرِ سَلَمُكَيٍ بَرَ يُنُبِ سْتْ ﭑ مَ قَشّ شَ قٍ رَ، بَرِ مَ ﭑ تَن مُ قٍ حَاشِ يٌ رَبَشِ. عَلَتَلَ نَن ﭑ شّيشِ يِ مَسٍنيِ قَلَدٍ وٌ بّ.»

16 كُنتِفِيٍ نُن حَمَ نَشَ عَ قَلَ سّرّشّدُبّيٍ نُن شّيرَيٍ بّ، «وٌ مُ نْمَ يِ شّمّ قَشَدٍ، بَرِ مَ عَ وْيّنشِ وٌن بّ عَلَتَلَ نَن شِلِ رَ.»

17 قٌرِ ندٍيٍ نَشَ كٍلِ، عٍ قَ عَ قَلَ حَمَ بّ، 18 «مِكَ مٌرٍ سٍتِكَ قَن نُ نَمِحْنمّ مَسٍنيِ تِمَ نّ يُدَيَ مَنفّ شٍسٍكِيَ شَ وَشَتِ. عَ نُ بَرَ عَ قَلَ،

‹مَنفّ عَلَتَلَ بَرَ عَ مَسٍن،

سِيٌن قَمَ نّ لُدٍ عَلْ شّ نَشَن بُشَشِ،

دَرِ سَلَمُ قِندِ فّمّ مَلَنشِيٍ رَ،

عَلَتَلَ شَ هْرْ مْبَنشِ قِندِ قْتْنيِ رَ.›»

19 «يُدَيَ مَنفّ شٍسٍكِيَ بَرَ قَشَ؟ عَ مُ عَلَتَلَ مَشَندِشِ شّ؟ نَ تّمُي عَلَتَلَ نَشَ فبِلٍن عَ شَ نَتّ قْشْ رَ. يَكْسِ، وٌن نَشَ وٌن يّتّ يٌ تْورْ.»

20 مِشِ فبّتّ قَن نُ نَ، نَشَن نُ بَرَ يِ مَسٍنيِ مْولِ تِ عَلَتَلَ شِلِ رَ دَرِ سَلَمُ نُن يُدَيَ شِلِ مَ، عَلْ عَننَبِ يٍرٍ مِ عَ رَبَشِ كِ نَشّ. عَ نُ شِلِ عُرِيَ سٍمَيَ شَ دِ كِرِيَتِ يٍيَرِ مِ. 21 مَنفّ يٍهٌيَكِمِ نُن عَ شَ كُنتِفِيٍ نُن عَ شَ سْورِيٍ تٌ نَ مَسٍنيِ مّ، عٍ نَشَ كَتَ عَ قَشَدٍ، كْنْ عُرِيَ تٌ عَ مّ، عَ نَشَ فَاشُ، عَ فِ سِفَقٍ رَ مِسِرَ بْشِ مَ. 22 مَنفّ يٍهٌيَكِمِ نَشَ عَكِبٌرِ شَ دِ عٍلِنَتَن نُن مِشِ ندٍيٍ شّي عَ قْشْ رَ مِسِرَ. 23 عٍ نَشَ قَ عُرِيَ رَ كٍلِقٍ مِسِرَ، عٍ عَ شَنِن مَنفّ يٍهٌيَكِمِ يِرٍ. يٍهٌيَكِمِ نَشَ عَ قَشَ سَنتِدّفّمَ رَ، عَ قَ عَ رَفَتَ سٍتَرٍيٍ شَ فَبُرِ يِرٍ.

24 نَ كُي سَقَن شَ دِ عَشِكَمَ نَشَ عَننَبِ يٍرٍ مِ مَلِ، عَلَكٌ حَمَ نَشَ عَ قَشَ.