1 Jesu kale a tatika kame uku ziga abantu ekamba lye ziba. Bungi ubu ka bumu bunganine ka buli bunene, kebaka la bulyao, kale a ngina mubwato no ku kala mo. U bwato mu menzi ka bukele, mi bungi bo bantu kale ba sigala ekamba lye ziba. 2 Kale aba ziga ibintu bingi ko manguli, mi mu ku ziga kwakwe buti katyo,

3 "Mu ni tegeleze, u mulimi na gaja ku ku mwaga imbuto jakwe. 4 Aa ka kwesi ku mwaga imbuto bobo, jimwinya kale ja gwila mu nzila, mi ibijuni kale bya keza ku jilya. 5 Imbuto jimwinya kale ja gwila mwivu ice lyo tubwe, jejo mbuto kale ja kangwa uku mena bwangu, ukuti taa na ja noka lwini muku jimwaga. 6 Kono ijuba aa selila kambami, ibi nabya mena byonse kale bya linyonya ukuti taa kabi kwesi nenja imiisi. 7 Jimwinya imbuto kale ja gwila mu miga, mi imiga kale ja kula bwangu no ku kangwisa imbuto uku kula nenja, mi taa na ja tula bweke. 8 Jimwinya imbuto kale ja gwila mwivu lyo mununo, no kumena no kukula nenja mi kale ja mena bu gongwele no kuaka nenja. Ulubuto lonke kale lwa kata imbuto jo makumi go tatwe, jimwinya a makumi ga tosanwe ne kumi, jimwinya makumi ge kumi."

9 Cwale Jesu kale aba lugwila buti, "Uju a kwesi a matwi go ku shugwa a shugwe."

10 Mi Jesu aa kakele genke, bekumi na bobile na bamwinya abantu kale ba mubuza byo manguli ibi gatyo. 11 Mi kale aba lugwila buti, "Inwe na mwa wegwa a magano go mubuso gwa Nyambe," Kono kwa babo aba bali kunze ibintu byonse mu manguli ba gambaguzwa, 12 kuti buti, "uku bona babone, kono baleke uku bonisisa, no kushugwa bashugwe, kono baleke uku shugwilisa, ati nabatenda bobo kame kuti naba bazoke, mi naba kwatile."

13 Mi kale abata buti, "Ta mu shugwisisi jeji inguli? Cwale buti na mu shugwilise ama manguli ga mwinya? 14 Imbuto iji naja byaligwa nijwi lya Nyambe. 15 Abantu bamwinya ba kukoza sinagwe ni mbuto iji naja gwila munzila, ijwi aa libyaligwa kwabo, bwangu bwangu, Satani sala keza ku basigulula. 16 Bamwinya ba kukoza imbuto naja gwila mwivu lyo tubwe, bala shugwa ijwi no ku li tambula bu jangele. 17 Kebaka lyo kubula miisi kwabo, basa zumina bulyo inako imfui. Mi a mapenzi no makababu aa ga keza kebaka lyee jwi ba sa leka ku zu mina ijwi lya Nyambe. 18 Bamwinya kame ba kukoza sinagwe ni mbuto naja gwili mu miiga, basa shugwa ijwi, 19 kono baba abantu basa bilaezwa mubintu ba botele uku gwana mu bumi bwabo bwa mwi longa basa shaka kuba no lubono no kushaka ibi bintu bikeza mumilelo jo lubonwa. Kebaka lya byebi ibintu byonse taba sitambuli ijwi lya Nyambe ubu libotelelwe. 20 Bamwinya bantu bakukoza sinsgwe ni mbuto naja gwila mwivu lyo mununo, aa bashugwa ijwi no kuli tambula no ku kata imbuto indotu jimwinya makumi go tatwe, jimwinya makumi ga tosanwe ne kumi ji mwinya makumi ge kumi."

21 Jesu kale aba buza buti, "Mu la gola ku fulumikila ilampi mu kasuba ko nkwaela kampa ku jitula mwisiko lyo bulo? Kampa mwasa jitula aa ku bonaala? 22 Ukuti takuli ici ntu ci libikite ici na cikane ku bonaala conse ici cili muluzinda kuti naci bibikuluke. 23 Uju akwesi amatwi go kushugwa ashugwe!"

24 Mi Jesu kale anunga ko buti, "Mutegeleze nenja ibi mushugwa, intikanyo muwa nenwe ne ntikanyo namu wegwe mane no kuitilila. 25 Ukuti gense uju akwesi ibintu bingi kuti nawegwe mu bungi mi uju akwesi mubuce kuti na tapigwe conse ici akwesi."

26 Jesu kame kale ata buti, "U mubuso gwa Nyambe gwa kukoza sinagwe muntu naga mwagila imbuto mwigwa lyakwe, 27 nanga nalele amasiku no kubuka amasiku siku imbuto naji tumpila no ku likulila bulyo ubu ta zekelele. 28 Ivu lyasa letela imbuto kukala ici menantu iminsi jasa tatika ukumena kokeza umumeno imbuto cwale no kutatika kuaka kulusati. 29 Ao bulyo inako jo kuzimbula aa sejilasiki, umuzimbuli gasa inda akafulo no ku koshagula.

30 Kale abalugwila buti, "Umubuso gwa Nyambe necinzi wawa ici saka tu gu kozanise? Kampa ni ngulinzi nzi iji saka tulitusise? 31 Go kukoza sinagwe ulubuto lo masitete ukuti aa lu byaligwa nalu nu nuwite lwini mwi mbuto jonse ja mwigwa. 32 Mi aa lubyaligwa lwasa kula no kuita ibi menantu byonse mu bunene mi ibijuni sebila jakila ibi jakilo kwintabi."

33 Jesu kagamba kwabo mu majwi mangi go ma nguli go kulikoza, buti a bantu ba shugwisise lwini. 34 Taa kagambagula bulyo kwabo uku tagambi mu manguli, kono kumbali aa ka kalanga genke na ba zigigwa bakwe kaba tolokelanga bintu byonse.

35 Ijuba limwinya a matengu, Jesu kale a lugwila abazigigwa bakwe buti, "Ndokweni tu lutile mwi silya lye ziba." 36 Aa sebala leki abantu bonse, kale bangina mubyato naje Jesu no ku tatika kuzuga kuja mwisilya. Ko kabali bantu bamwinya kaba ba sindikiza no maato. 37 Kale kwa fukuka inkuli inene, mi a makupezi kale ga tatika ku ngina mu bwato, mi u bwato see ka bu bumba a menzi, buti mane see ka bu shaka kulobela. 38 Mi Jesu kame kalele kwishule lyo bwato na samite aciputu, mi bazigigwa bakwe kale ba mu busa buti, "Muzigi towene buti setulafwa?"

39 Kale abuka no kujukukila inkuli no makupezi buti, "Ombelela!" Mi inkuli kale jaleka kuunga. 40 Jesu kale a lugwila bazigigwa bakwe buti, "Cinzi aa mula jogi lwini? Nashunwano tamukwesi intumelo?"

41 Mi kale bajoga lwini no ku ligambaguza buti, "Nini joju unkosi, buti mane inkuli ne makupezi bi mushugwe!"