1 Na̱tháánlo̱ꞌ ajngáa ríge̱ꞌ ma̱ꞌga ná inalaꞌ, ikháanꞌlaꞌ tsáanꞌ ñajwanlaꞌ xómá i̱ji̱nꞌ, kajngó mu̱xúne̱laꞌ aꞌkhán. Jamí xí mbáa neꞌne aꞌkhán rá, kuaꞌdaalóꞌ mbáa tsí maꞌthán mbáá numalóꞌ ná inuu Ana̱ꞌlóꞌ Mikhuíí. Ikhaa tsúꞌkhue̱n ñajuun Jesukrísto̱ tsí jmbii. 2 Ikhaa̱ nixnáxe̱-mine̱e̱ꞌ rí ma̱ja̱ñúu̱ kajngó ma̱goo ma̱ꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlóꞌ. Jamí ra̱ꞌkhá máꞌ i̱ndo̱ó ga̱jma̱á numuu aꞌkhánlóꞌ ikháánꞌlóꞌ, rí ga̱jma̱á máꞌ numuu aꞌkhúún mbá xúgíin xa̱bo̱ numbaa mangaa.

3 Xí nu̱ꞌne̱-mbáníílóꞌ xtángawoo Ana̱ꞌlóꞌ, a̱ꞌkhue̱n rí naꞌne jañii a̱kia̱nꞌlóꞌ rí nu̱ꞌne̱-nuwii̱nlóꞌ ikhaa̱. 4 Xúꞌkhue̱n máꞌ xí mbáa xa̱bo̱ naꞌthán: «Ikhúúnꞌ na̱ne̱-núwíinlo̱ꞌ Ana̱ꞌlóꞌ», jamí tsíꞌne-mbánuu̱ rí naꞌthán xtángawoo Ana̱ꞌlóꞌ, ikhaa xa̱bo̱ tsúꞌkhue̱n mi̱nduwaa, jamí nda̱a̱ rí gakon ná a̱kuii̱n. 5 Xómáꞌ tsí nandoo jaꞌyoo Ana̱ꞌlóꞌ ga̱jma̱á mbá jañii a̱kui̱in rá, tsúꞌkhue̱n tsí naꞌne-mbánuu ajngóo Ana̱ꞌlóꞌ. Xí xúꞌkhue̱n e̱ꞌne̱lóꞌ, nduꞌyáálóꞌ rí juwalóꞌ mbóó ga̱jma̱á nindxu̱u̱ Ana̱ꞌlóꞌ. 6 Xa̱bo̱ tsí naꞌthán rí xtáa jayu ga̱jma̱á nindxu̱u̱ Ana̱ꞌlóꞌ, gíꞌmaa ma̱xtáa̱ xómá rí nixtáa Jesukrísto̱.

7 A̱ngui̱nꞌ, tsítháánlo̱ꞌ mbá xtángoo nuxe̱ꞌ rí ma̱ꞌga ná inalaꞌ, rí na̱tháánlo̱ꞌ xtángoo wayuu rí ni̱drígúlaꞌ máꞌ asndo nákhí ginii jayu. Xtángoo ríge̱ꞌ ñajuun ajngáa rí ni̱dxawíínlaꞌ máꞌ asndo nákhí ginii jayu. 8 I̱ndo̱ó máꞌ numuu rí xtángoo nuxe̱ꞌ ñajuun ne̱ mangaa. Xómá rí nixtáa Krísto̱ jamí xómá rí juwa ikháanꞌlaꞌ, nasngájma rí gakon ne̱. Numuu rí na̱ka̱-rayámba̱ máꞌ rí mijína, jamí agu rí gakon na̱ka̱-rambiꞌi máꞌ.

9 Tsí naꞌthán rí xtáa ná nambiꞌi agu, jamí tsíyoo jaꞌyoo dxájuu, xóó máꞌ xtáa̱ ná mijína. 10 Xómáꞌ xa̱bo̱ tsí nandoo jaꞌyoo dxájuu rá, tsúꞌkhue̱n xtáa mbá jayu ná nambiꞌi agu, jamí nda̱a̱ nitháan rí ma̱ꞌne-ngra̱ꞌa-mine̱e̱ꞌ ga̱jma̱á. 11 Xómáꞌ tsí tsíyoo jaꞌyoo dxájuu rá, xtáa̱ ná mijína, jamí xóó ngrigo̱o̱ꞌ ná mijína. Na̱nguá iꞌyoo̱ náá i̱ke̱e̱, numuu rí mijína naꞌne rí tsífrigo̱o̱ꞌ.

12 I̱ji̱nꞌ, na̱tháánlo̱ꞌ i̱yi̱i̱ꞌ ríge̱ꞌ ma̱ꞌga inalaꞌ,

numuu rí ga̱jma̱á majñu̱u̱ Krísto̱, Ana̱ꞌlóꞌ naꞌne mba̱a̱ a̱kui̱in jaꞌyoo aꞌkhánlaꞌ.

13 Xa̱bo̱ buanuu, na̱tháánlo̱ꞌ i̱yi̱i̱ꞌ ríge̱ꞌ ma̱ꞌga inalaꞌ,

numuu rí nu̱ne̱-nuwiinlaꞌ tsí xtáa asndo nákhí ginii jayu.

Jñáma, na̱tháánlo̱ꞌ i̱yi̱i̱ꞌ ríge̱ꞌ ma̱ꞌga inalaꞌ,

numuu rí ni̱ꞌnga̱ꞌlaꞌ ne̱ne̱-gajmiálaꞌ xa̱bo̱ xkawi̱i̱ꞌ.

I̱ji̱nꞌ, na̱tháán i̱yi̱i̱ꞌ* ríge̱ꞌ ma̱ꞌga inalaꞌ,

numuu rí ne̱ne̱-nuwiinlaꞌ Ana̱ꞌlóꞌ Mikhuíí.

14 Xa̱bo̱ buanuu, ni̱tháán i̱yi̱i̱ꞌ ríge̱ꞌ ma̱ꞌga inalaꞌ,

numuu rí ne̱ne̱-nuwiinlaꞌ tsí xtáa asndo nákhí ginii jayu.

Jñáma, ni̱tháán i̱yi̱i̱ꞌ ríge̱ꞌ ma̱ꞌga inalaꞌ,

numuu rí gúkuáa̱nꞌlaꞌ,

xúꞌkhue̱n máꞌ ríga̱ jayu ajngóo Ana̱ꞌlóꞌ ná awúun a̱kia̱nꞌlaꞌ,

jamí ni̱ꞌnga̱ꞌlaꞌ ne̱ne̱-gajmiálaꞌ xa̱bo̱ xkawi̱i̱ꞌ.

15 Ma̱xágalaꞌ ju̱ya̱á rí xkawe̱ꞌ nune̱ xa̱bo̱ ná numbaa ríge̱ꞌ, ni máꞌ ma̱xágalaꞌ ju̱ya̱á rí ríga̱ guéño ná inuu numbaa. Xí mbáa nandoo jaꞌyoo rí xkawe̱ꞌ nune̱ xa̱bo̱ ná numbaa ríge̱ꞌ, ikhaa tsúꞌkhue̱n tsíyoo jaꞌñúú xa̱bo̱ xómá naꞌne Ana̱ꞌlóꞌ Mikhuíí. 16 Numuu rí mbá xúgíí rí ríga̱ ná numbaa ríge̱ꞌ, ikhaa ñajuun: rí nandoo xuyuu xa̱bo̱, rí na̱ni̱gu̱u̱ꞌ xa̱bo̱ ma̱gi̱ꞌdoo rí ndaꞌyoo, jamí rí nakúxe̱-mina̱ꞌ xa̱bo̱ ga̱jma̱á numuu rí gíꞌdoo. Mbá xúgíí rúꞌkhue̱n na̱ꞌkha̱ ná numbaa ríge̱ꞌ, ra̱ꞌkhá ná inuu Ana̱ꞌlóꞌ Mikhuíí i̱ꞌkha̱ ne̱. 17 Mbáá máꞌ rí numbaa na̱ka̱-rayámba̱a la, ga̱jma̱á mbá xúgíí rí na̱ni̱gu̱u̱ꞌ guéño xa̱bo̱. Xómáꞌ tsí naꞌne rí nandoo Ana̱ꞌlóꞌ, ma̱xtáa mbá jámuu.

18 I̱ji̱nꞌ, na̱ka̱-ra̱tri̱go̱o̱ máꞌ mbiꞌi rí ma̱mbá numbaa. Xómá rí ni̱dxawíínlaꞌ rí wéje̱ rí ma̱ꞌkha̱ xa̱bo̱ tsí sia̱nꞌ ga̱jma̱á Krísto̱, xkuaꞌnii máꞌ xúge̱ꞌ na̱ka̱-rakujmii guéño xa̱bo̱ tsí sia̱nꞌ gajmíí Krísto̱. Ikhaa numuu rúꞌkhue̱n nduꞌyáálóꞌ rí na̱ka̱-ra̱tri̱go̱o̱ máꞌ mbiꞌi rí ma̱mbá numbaa. 19 Xa̱bo̱ tsúꞌkhue̱n nigájnúú ná majña̱ꞌlóꞌ, i̱ndo̱ó máꞌ numuu rí ra̱ꞌkhíin a̱ngia̱nꞌlóꞌ ñajúu̱n. Xí numuu rí a̱ngia̱nꞌlóꞌ ñajúu̱n, tágájnúu̱ máꞌ ná majña̱ꞌlóꞌ xúꞌkhue̱n rá. I̱ndo̱ó máꞌ numuu rí nigájnúu̱, kajngó ma̱kujma rí ra̱ꞌkhá mbá xúgíin tsí júwa̱ꞌ ná majña̱ꞌlóꞌ ñajúún a̱ngia̱nꞌlóꞌ.

20 Xómáꞌ ikháanꞌlaꞌ ni̱dríguíilaꞌ Xu̱u̱ꞌ Ana̱ꞌlóꞌ neꞌne Krísto̱, ikhaa jngó nu̱ne̱-nuwiinlaꞌ mbá xúgíí rí gakon. 21 Na̱tháánlo̱ꞌ i̱yi̱i̱ꞌ ríge̱ꞌ ma̱ꞌga inalaꞌ, ra̱ꞌkhá numuu rí tsíne̱ nuwiinlaꞌ rí gakon, rí na̱tháán ne̱ numuu rí nu̱ne̱-nuwiinlaꞌ ne̱, jamí tsígájnuu nimbá rí mi̱nduwa ná awúun rí gakon. 22 Tsáa ñajuun tsí mi̱nduwaa rá. Ikhaa tsí naꞌthán rí ra̱gákon rí Jesús ñajuun Krísto̱. Tsúꞌkhue̱n ñajuun xa̱bo̱ tsí sia̱nꞌ ga̱jma̱á Krísto̱, numuu rí tsíya-makuu̱ Ana̱ꞌlóꞌ Mikhuíí ni máꞌ A̱dée̱. 23 Jámba̱a̱ tsí tsíya-makuu A̱dée Ana̱ꞌlóꞌ, ndawa̱a̱ Ana̱ꞌlóꞌ Mikhuíí ga̱jma̱á nindxu̱u̱. Xómáꞌ tsí naꞌthán rí nanimbo̱o̱ꞌ jaꞌyoo A̱dée Ana̱ꞌlóꞌ rá, xtáa Ana̱ꞌlóꞌ Mikhuíí ga̱jma̱á nindxu̱u̱.

24 Ga̱ri̱gá jayu ná awúun a̱kia̱nꞌlaꞌ rí ni̱dxawíínlaꞌ asndo nákhí ginii jayu. Xí rí ni̱dxawíínlaꞌ asndo nákhí ginii jayu ríga̱ jayu ná awúun a̱kia̱nꞌlaꞌ, a̱ꞌkhue̱n rí ma̱juwalaꞌ jayu ga̱jma̱á nindxu̱u̱ A̱dée Ana̱ꞌlóꞌ jamí ga̱jma̱á nindxu̱u̱ máꞌ Ana̱ꞌlóꞌ Mikhuíí. 25 Jamí ríge̱ꞌ ñajuun rí nixuda-mina̱ꞌ Jesukrísto̱ ga̱jma̱á nindxa̱ꞌlóꞌ, rí ma̱juwalóꞌ mbá jámuu.

26 Na̱tháán i̱yi̱i̱ꞌ ríge̱ꞌ ma̱ꞌga inalaꞌ ga̱jma̱á numúú xa̱bo̱ tsí nandúún gúne̱-nduwáanꞌlaꞌ. 27 Xómáꞌ ikháanꞌlaꞌ, ni̱dríguíilaꞌ Xu̱u̱ꞌ Ana̱ꞌlóꞌ neꞌne Jesukrísto̱, xúꞌkhue̱n máꞌ xtáa̱ jayu ga̱jma̱á nindxa̱ꞌlaꞌ, ikhaa jngó tsíꞌyóo máꞌ rí nimbáa maꞌsngálaꞌ. Ikhaa máꞌ Xu̱u̱ꞌ Ana̱ꞌlóꞌ naꞌsngálaꞌ mbá xúgíí rí gakon, jamí ra̱ꞌkhá rí mi̱nduwa ñajuun ne̱. Ikhaa jngó xómá rí Xu̱u̱ꞌ Ana̱ꞌlóꞌ niꞌsngálaꞌ, xkuaꞌnii máꞌ ga̱juwalaꞌ jayu ga̱jma̱á nindxu̱u̱ Krísto̱.

28 Rí xúge̱ꞌ rá, i̱ji̱nꞌ, ga̱juwalaꞌ jayu ga̱jma̱á nindxu̱u̱ Krísto̱, kajngó ído̱ gákujmaa̱ inalóꞌ, a̱ꞌkhue̱n rí mbá jañii a̱kia̱nꞌlóꞌ gájuwalóꞌ inuu̱, xúꞌkhue̱n máꞌ ma̱xáti̱ya̱ꞌlóꞌ ído̱ mbu̱ꞌyáa̱lóꞌ. 29 Numuu rí ndu̱ya̱álaꞌ máꞌ rí Krísto̱ ñajuun tsí naꞌne rí máján, xúꞌkhue̱n máꞌ mangaa a̱gu̱ya̱álaꞌ rí jámba̱a̱ tsí naꞌne rí máján, tsúꞌkhue̱n ñajuun a̱dée Ana̱ꞌlóꞌ.