1 João 3

Tsí ñajúún i̱ji̱in Ana̱ꞌlóꞌ

1 A̱gu̱ya̱álaꞌ rí ra̱ꞌkhá tháán nandoo Ana̱ꞌlóꞌ Mikhuíí jaꞌyalóꞌ, rí asndo naꞌne mbiꞌyalóꞌ i̱ji̱in Ana̱ꞌlóꞌ. ¡Jamí ikhaa máꞌ ñajwanlóꞌ!*3.1 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «Jamí ikhaa máꞌ ñajwanlóꞌ». Ikhaa numuu rúꞌkhue̱n xa̱bo̱ tsí júwa̱ꞌ ná numbaa ríge̱ꞌ tsíyáa̱ rí i̱ji̱in Ana̱ꞌlóꞌ ñajwanlóꞌ, numuu rí ikhii̱n tsínimbúu̱n juyáa̱ Ana̱ꞌlóꞌ. 2 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, rí xúge̱ꞌ rá, i̱ji̱in máꞌ Ana̱ꞌlóꞌ ñajwanlóꞌ, jamí xóó máꞌ tsíkujma rí ma̱nindxa̱ꞌlóꞌ nda̱wa̱á. I̱ndo̱ó máꞌ numuu rí nduꞌyáálóꞌ máꞌ rí ído̱ ma̱ꞌkha̱a Krísto̱, ma̱nindxa̱ꞌlóꞌ xómá jaꞌnii̱ jayu ikhaa̱, numuu rí mbu̱ꞌyáa̱lóꞌ xómá jaꞌnii̱ jayu ikhaa̱.