1 Xómáꞌ rí ga̱jma̱á numuu náá mbiꞌi jamí nguáná phú ma̱ri̱gá mbá xúgíí rúꞌkhue̱n rá, a̱ngui̱nꞌ, tsíꞌyóo máꞌ rí mu̱tháánxo̱ꞌ ga̱jma̱á numuu rúꞌkhue̱n. 2 Numuu rí ikháanꞌlaꞌ ndu̱ya̱á májánlaꞌ rí Táta̱ ma̱ꞌkha̱a mbá mbiꞌi rí ndawa̱a̱ tsí i̱ju̱mu̱u̱, xómá na̱ꞌkha̱ mbáa ku̱ꞌwá awúun mbroꞌon. 3 Ído̱ rí muthan xa̱bo̱: «Mbá xúgíí tsímáá kri̱ga̱ jamí nda̱a̱ ngamí rá», a̱ꞌkhue̱n rí nda̱a̱ ajngóo ma̱mbá-ri̱gii̱n, xómá rí nda̱a̱ ajngóo naxnúu gaꞌkho̱ a̱ꞌgo̱ tsí jago̱-éda. Jamí ma̱xáxóo ma̱jáwíi̱n inuu jamínu̱ꞌ rí ma̱ꞌkha̱ mu̱dríguíi̱.

4 Xómáꞌ ikháanꞌlaꞌ rá, a̱ngui̱nꞌ, nánguá máꞌ juwalaꞌ ná mijína, kajngó ma̱ꞌne rí nda̱a̱ ajngóo gáxkama-ri̱gáanꞌlaꞌ mbiꞌi rí ma̱ꞌkha̱a Táta̱, xómá eꞌne rí nda̱a̱ ajngóo na̱ꞌkha̱ ku̱ꞌwá. 5 Numuu rí mbá xúgiáanꞌ ikháanꞌlaꞌ nu̱ne̱laꞌ rí máján jamí nu̱ne̱laꞌ rí na̱ni̱gu̱u̱ꞌ Ana̱ꞌlóꞌ, rí jaꞌnii xómá rí juwalaꞌ ná nambiꞌi agu. Tsíꞌne̱lóꞌ rí xkawe̱ꞌ ni máꞌ rí tsíni̱gu̱u̱ꞌ Ana̱ꞌlóꞌ, rí jaꞌnii xómá rí juwalóꞌ ná mijína. 6 Ikhaa jngó, mu̱xúꞌnulóꞌ xómá rí nune̱ i̱ꞌwíin xa̱bo̱, rí ga̱juwalóꞌ xawi jamí ga̱xa̱ba̱ꞌlóꞌ. 7 Numuu rí xa̱bo̱ tsí nunu, mbroꞌon nunii̱. Jamí xa̱bo̱ tsí naꞌwa̱a̱n iya najnga̱a̱ rá, mbroꞌon nune̱-majnga̱-mijnée̱. 8 Xómáꞌ ikháánꞌlóꞌ, tsáánꞌ juwalóꞌ ná nambiꞌi agu rá, ga̱ꞌne rí na̱xa̱ba̱ꞌlóꞌ. Numuu rí wéje̱ máꞌ a̱kia̱nꞌlóꞌ ná inuu Ana̱ꞌlóꞌ jamí nandalóꞌ máꞌ juꞌñúú xa̱bo̱, rí ñajuun xómá ajwa̱nꞌ rí katajmuu ná xo̱xta̱ꞌlóꞌ jamí tsu̱da̱ꞌlóꞌ. Mangaa máꞌ guáꞌthi̱ínlóꞌ ga̱jma̱á mbá jañii a̱kia̱nꞌlóꞌ rí ma̱jríñáaꞌlóꞌ, rí ñajuun xómá xtéde̱ ajwa̱nꞌ rí nambáyúu idxa̱ꞌlóꞌ.

9 Numuu rí Ana̱ꞌlóꞌ táraꞌwáa̱nꞌlóꞌ kajngó ma̱ꞌnii̱ rí mu̱drígúlóꞌ jamínu̱ꞌ, rí niraꞌwáa̱nꞌlóꞌ kajngó ma̱jríñáaꞌlóꞌ ga̱jma̱á majñu̱u̱ rí neꞌne Tátiálóꞌ Jesukrísto̱. 10 Numuu rí ikhaa̱ nijáñuu̱ ga̱jma̱á numalóꞌ, kajngó ma̱goo ma̱juwalóꞌ jámuu ga̱jma̱á nindxu̱u̱. Tsíꞌñuu máꞌ xí xóó juwa nduꞌyalóꞌ o nijáñalóꞌ máꞌ ído̱ gáthangaa̱. 11 Ikhaa jngó, gu̱xna̱-míjnálaꞌ tsiakhe̱ jamí gu̱mbáyú-mijnálaꞌ rí ma̱wajúnlaꞌ xa̱ꞌ, xómá rí nu̱ne̱laꞌ máꞌ.

12 A̱ngui̱nꞌ, nu̱tha̱n-jáñalaꞌxo̱ꞌ rí gu̱ya̱-makúúnlaꞌ xa̱bo̱ ede̱ tsí júwa̱ꞌ nu̱ñajun gakhe̱ ná majña̱ꞌlaꞌ. Ikhii̱n nduye̱e̱ ikhalaꞌ jamí nuthan-maꞌánlaꞌ. 13 Ikháanꞌlaꞌ gíꞌmaa mu̱ndxa̱ꞌwa̱-mijnálaꞌ rí ikhii̱n phú gíꞌdoo numúu̱ jamí phú ma̱galaꞌ ju̱ñúu̱ ga̱jma̱á numuu ñajun rí nuni̱i̱. Jamí ga̱juwalaꞌ tsímáá ju̱ya̱-mijnálaꞌ. 14 A̱ngui̱nꞌ, mangaa máꞌ nu̱tha̱n-jáñalaꞌxo̱ꞌ rí gu̱xprígúúnlaꞌ tsí trigi̱in naskúún, gu̱xnu̱úlaꞌ tsiakhe̱ tsí na̱nguá jañii a̱kui̱ín, xúꞌkhue̱n máꞌ gu̱mbáñúúlaꞌ tsí wabiin, jamí mba̱a̱ a̱kia̱nꞌlaꞌ gáꞌne ga̱jma̱á nindxu̱ún mbá xúgíin. 15 A̱gu̱ya̱álaꞌ rí nimbáa ma̱xárthanga̱a rí xkawe̱ꞌ ná inuu i̱mba̱a̱ꞌ rí xkawe̱ꞌ niꞌñuu̱. A̱ꞌkhue̱n gakon, jámba̱ miꞌtsú gu̱ne̱-mijnálaꞌ rí máján, jamí gajmíí mbá xúgíin xa̱bo̱ mangaa.

16 Ga̱juwalaꞌ gagi jámba̱ miꞌtsú. 17 Gu̱tha̱n-jáñíílaꞌ máꞌ xúꞌkhue̱n Ana̱ꞌlóꞌ. 18 Gu̱rígu̱ulaꞌ gamaku inuu Ana̱ꞌlóꞌ ga̱jma̱á numuu mbá xúgíí, numuu rí rúꞌkhue̱n ñajuun rí nandoo Ana̱ꞌlóꞌ rí mu̱ne̱laꞌ, tsáanꞌ xa̱bi̱i Krísto̱ Jesús ñajwanlaꞌ.

19 Mu̱xúsndui̱ꞌyíílaꞌ aguu Xu̱u̱ꞌ Ana̱ꞌlóꞌ ná xo̱xta̱ꞌlaꞌ. 20 Gu̱ꞌgíi idxa̱ꞌlaꞌ rí mu̱dxawíínlaꞌ ajngáa rí nagájnanga̱a ná inalaꞌ. 21 Gu̱ndxa̱ꞌwa̱-mijná májánlaꞌ ga̱jma̱á numuu mbá xúgíí, jamí gu̱drígúlaꞌ i̱ndo̱ó máꞌ rí máján. 22 Gu̱ne̱-janíí-mijnálaꞌ inuu mbá xúgíí inii rí xkawe̱ꞌ.

23 Jamí jmína̱a̱ꞌ máꞌ Ana̱ꞌlóꞌ tsí naꞌne rí ma̱juwalóꞌ tsímáá, gáꞌne-jaꞌwáanꞌlaꞌ mbá káxáanꞌlaꞌ jayu. Jamí ikhaa̱ máꞌ gáyánga̱wáanꞌlaꞌ mbá xa̱biáanꞌlaꞌ jayu: a̱kia̱nꞌlaꞌ, nímia̱ꞌlaꞌ jamí xuyalaꞌ. A̱ꞌkhue̱n rí ma̱xáríga̱ nimbá rí ra̱máján mi̱ꞌthán ga̱jma̱á numalaꞌ, ído̱ gáꞌkha̱a Tátiálóꞌ Jesukrísto̱. 24 Ana̱ꞌlóꞌ tsí nandxaꞌwálaꞌ phú jmbii̱, jamí ikhaa̱ máꞌ ma̱ꞌne-mbánuu̱ mbá xúgíí rúꞌkhue̱n.

25 A̱ngui̱nꞌ, gu̱tha̱n-jáñíílaꞌ Ana̱ꞌlóꞌ ga̱jma̱á numaxo̱ꞌ.

26 Gu̱ra̱xi̱inlaꞌ mbá xúgíin a̱ngia̱nꞌlóꞌ ga̱jma̱á gamaku.

27 Na̱xna̱-ñájwanlaꞌ ga̱jma̱á ski̱yu̱u̱ꞌ ajngóo Táta̱ rí gúꞌdo̱ꞌlo̱ꞌ, rí mu̱raxnuulaꞌ i̱yi̱i̱ꞌ ríge̱ꞌ ná inúú mbá xúgíin a̱ngia̱nꞌlóꞌ.

28 Tátiálóꞌ Jesukrísto̱ gáꞌne-tsakun-rámáaꞌlaꞌ mbá xúgiáanꞌlaꞌ, a̱ngui̱nꞌ. Xkuaꞌnii gáꞌne.*