1 Ikhúúnꞌ ñajunꞌ Páblo̱, mbáa xa̱bo̱ tsí waxúngua̱a̱ꞌ neꞌne Jesukrísto̱ numuu rí xkuaꞌnii ndiyoo Ana̱ꞌlóꞌ, tsí nixuda-mina̱ꞌ rí mbu̱ꞌyalóꞌ jámuu ga̱jma̱á majñu̱u̱ Krísto̱ Jesús.

2 Na̱xu̱ꞌmá i̱yi̱i̱ꞌ ríge̱ꞌ inaaꞌ ikháánꞌ, a̱ꞌdéꞌ Timotéo̱, tsáánꞌ phú nandoꞌ ja̱ya̱a̱ꞌ. Na̱ra̱xi̱ínlo̱ꞌ.

Ana̱ꞌlóꞌ Mikhuíí jamí Tátiálóꞌ Jesukrísto̱ gúne̱-tsakun-rámááꞌ. Ikhii̱n máꞌ gáñáwíin a̱kuíi̱n juyaa̱ꞌ jamí gúni̱i̱ rí ma̱ra̱xtaa tsímáá.

3 Mbámbá mbiꞌi na̱rmáꞌáan a̱kui̱nꞌ ja̱ya̱a̱ꞌ ído̱ rí na̱tha̱n-jáñuu Ana̱ꞌlóꞌ, mbiꞌíí mbruꞌwíín na̱rígu̱u gamaku ná inuu Ana̱ꞌlóꞌ ga̱jma̱á numaaꞌ. Ikhúúnꞌ jaꞌwu a̱kui̱nꞌ na̱ñajun ná inuu Ana̱ꞌlóꞌ xómá rí nene̱ táta̱-xi̱ꞌñúꞌ wajyúú. 4 Ído̱ na̱rmáꞌáan a̱kui̱nꞌ rí ni̱ta̱mbi̱ya̱ꞌ nákhí rí ni̱ꞌthángoo-mijnálóꞌ, naꞌne a̱kui̱nꞌ rí mba̱ya̱a̱ꞌ mbu̱júꞌ kajngó ma̱jni̱í rí gagi ná awúun a̱kui̱nꞌ gátha̱ne̱. 5 Na̱rmáꞌáan a̱kui̱nꞌ rí phú gakon rí wéje̱ a̱kia̱anꞌ ná inuu Ana̱ꞌlóꞌ, xómá rí ginii jayu ni̱we̱je̱ a̱kui̱in nána̱ xíñaaꞌ Lóida̱ ga̱jma̱á nániáaꞌ Euníse̱. Ikhaa jngó naꞌne jañii a̱kui̱nꞌ rí xkuaꞌnii máꞌ wéje̱ a̱kia̱anꞌ mangáánꞌ.

6 Ikhaa numuu rúꞌkhue̱n na̱nda̱ꞌa̱a̱ꞌlo̱ꞌ rí ma̱ta̱skráꞌa̱a aguu ñajun rí nixnáaꞌ Ana̱ꞌlóꞌ ma̱tha̱ne̱ nákhí rí ni̱xkrámáálo̱ꞌ ga̱jma̱á ñawúnꞌ. 7 Numuu rí Ana̱ꞌlóꞌ táxniálóꞌ Xu̱u̱ꞌ kajngó ma̱mi̱ꞌñálóꞌ gúne̱ xa̱bo̱, rí nixniálóꞌ Xu̱u̱ꞌ kajngó ma̱ri̱gá tsiakhe̱ gúꞌne̱lóꞌ, xúꞌkhue̱n máꞌ rí ma̱galóꞌ juꞌñúú xa̱bo̱ jamí rí ma̱ꞌnga̱lóꞌ mu̱ꞌthán-ñájun-mijnálóꞌ.

8 Ikhaa jngó, ma̱xáti̱ya̱a̱ꞌ rí ma̱ra̱thu̱ún xa̱bo̱ ga̱jma̱á numuu Tátiálóꞌ, ni máꞌ ga̱jma̱á numuꞌ ikhúúnꞌ, tsúún kru̱ꞌúún géjwa̱nꞌ ga̱jma̱á numuu̱ ikhaa̱. A̱ꞌkhue̱n gakon, ski̱yu̱u̱ꞌ Ana̱ꞌlóꞌ gáꞌne rí ma̱ra̱xtaa na̱ma̱ñaaꞌ rí ma̱ta̱míni̱í mangáánꞌ ga̱jma̱á numuu ajngáa máján. 9 Ana̱ꞌlóꞌ neꞌne-jríñáaꞌlóꞌ jamí nindxaꞌwálóꞌ rí ma̱nindxa̱ꞌlóꞌ xa̱bo̱ xuajñuu̱ tsí jaꞌwuun. Ra̱ꞌkhá ga̱jma̱á numuu rí máján ne̱ꞌne̱lóꞌ, rí numuu rí xkuaꞌnii ndiyoo̱ ikhaa̱, jamí ga̱jma̱á numuu rí nandoo Ana̱ꞌlóꞌ jaꞌyalóꞌ ga̱jma̱á majñu̱u̱ Krísto̱ Jesús asndo nákhí máꞌ xóó tágu̱ma-ku̱maa numbaa. 10 Xómáꞌ xúge̱ꞌ rá, nigájnuu máꞌ ná pa̱jnu rí nandoo Ana̱ꞌlóꞌ jaꞌyalóꞌ ga̱jma̱á numuu rí nikujmaa Jesukrísto̱, tsí naꞌne-jríñáaꞌlóꞌ. Ikhaa̱ neꞌne-gámbo̱o̱ tsiakhe̱ rí naꞌne rí ma̱ja̱ñúú xa̱bo̱ jamí niꞌnii̱ rí ma̱kujma xó rí ma̱juwalóꞌ jámuu ga̱jma̱á majñu̱u̱ ajngáa máján. 11 Ga̱jma̱á numuu ajngáa máján rúꞌkhue̱n, ikhúúnꞌ ninindxu̱ꞌ xa̱bo̱ tsí naꞌthán-ráꞌa, mbáa xa̱bo̱ tsí waxúngua̱a̱ꞌ jamí tsí naꞌsngúún xa̱bo̱ tsí ra̱ꞌkháa judío̱ ñajúún.* 12 Ikhaa máꞌ numuu ajngáa máján rúꞌkhue̱n na̱mínu̱u̱ꞌ mbá xúgíí ríge̱ꞌ. Xómáꞌ ikhúúnꞌ tsíti̱yu̱ꞌ, numuu rí nda̱yo̱o̱ máꞌ tsáa ñajuun tsí ninimbo̱ꞌ ja̱yo̱o̱, jamí ikhúúnꞌ nda̱yo̱o̱ mújúnꞌ rí ikhaa̱ gíꞌdoo̱ tsiakhe̱ rí ma̱ña̱wu̱u̱n rí ni̱xna̱ngáwoo̱lo̱ꞌ asndo mbiꞌi rí ma̱ꞌkha̱a Krísto̱.

13 Ma̱xáta̱tsi̱ꞌñáá gisngáá máján rí ni̱sngáaꞌlo̱ꞌ, rí ma̱we̱je̱ a̱kia̱anꞌ ná inuu Ana̱ꞌlóꞌ jamí rí ma̱gaaꞌ xtañúú xa̱bo̱ ga̱jma̱á majñu̱u̱ Krísto̱ Jesús. 14 Ga̱jma̱á majñu̱u̱ ski̱yu̱u̱ꞌ Xu̱u̱ꞌ Ana̱ꞌlóꞌ tsí xtáa ná awúun a̱kia̱nꞌlóꞌ, a̱tia̱wa̱án májáanꞌ gisngáá rí waꞌxnángawaaꞌ.

15 Nathayáá máꞌ rí mbá xúgíin tsí júwa̱ꞌ ná numbaa Ásia̱ ni̱ni̱ñi̱ꞌ, asndo Fijélo̱ jamí Ermóje̱ne̱s mangiin.

16 Ga̱ñáwíin a̱kui̱in Táta̱ jaꞌñúú mbá guꞌwíin xa̱bi̱i Onesífo̱ro̱, numuu rí phú mbaꞌa nothon ni̱ꞌkhe̱e̱ gáxníꞌ tsiakhe̱, jamí táti̱yu̱u̱ꞌ rí kru̱ꞌúún géjwa̱nꞌ. 17 A̱ꞌkhue̱n gakon, ído̱ rí ni̱ꞌkhe̱e̱ ná xuajen Róma̱, mbá xúgíí ningrigo̱o̱ꞌ ndiꞌñúu̱ asndo náá nixkamúu̱. 18 Ga̱ñáwíin a̱kui̱in Táta̱ jaꞌyoo̱ ído̱ gága̱nú mbiꞌi rí ndámba̱wóo. Nathayáá májáanꞌ máꞌ ikháánꞌ wátha̱ nimbáyálóꞌ Onesífo̱ro̱ ná xuajen Éfe̱so̱.